پاريجدە سۋپەرماركەتتەن قۇنى 4 ملن. ەۋرونى قۇرايتىن ەسىرتكى تابىلدى

استانا. 3 ءساۋىر. فرانتسيا استاناسى - پاريجدەگى «اشان» سۋپەرماركەتىنىڭ قويماسىنان 80 كگ. كوكاين تابىلدى. ەسىرتكىنى ەڭ العاش ساۋدا ورتالىعىنىڭ قىزمەتكەرلەرى بايقاعان. بۇل تۋرالى ريا «نوۆوستي» حابارلادى. قىزمەتكەرلەر قويماعا بانان الۋعا كەلگەن. قوراپتاردىڭ ءبىرىن اشقان كەزدە ولار بەلگىسىز ۇنتاققا تاپ بولعان. جەرگىلىكتى قۇقىق قورعاۋ ورگانى وكىلدەرىنىڭ ايتۋىنشا, سۋپەرماركەت اكىمشىلىگى بىردەن پوليتسياعا حابارلاسقان. قوراپتى سىرتقا الىپ شىققان پوليتسەيلەر ۇنتاقتى ساراپتاماعا جىبەردى. ناتيجەسىندە, ونىڭ ەسىرتكى زاتى, سونىڭ ىشىندە كوكاين ەكەنى انىقتالدى. تابىلعان ەسىرتكىنىڭ جالپى قۇنى شامامەن 4 ميلليون ەۋرونى قۇرايدى. الدىن الا بولجام بويىنشا, بۇل تاۋار فرانتسياعا كولۋمبيادان جەتكىزىلگەن. ال ازىق-ت ۇلىك دۇكەنىنە قاتەلەسىپ اكەلىنۋى مۇمكىن. قازىر وسى ىسكە قاتىستى تەرگەۋ جۇمىستارى جۇرگىزىلۋدە. پوليتسەيلەر ءىرى كولەمدە ەسىرتكى ساۋداسىمەن اينالىساتىن قىلمىسكەرلەر مەن ولارعا شەتەلدەن جەتكىزىپ بەرۋشىلەردى ىزدەۋ شارالارىن باستاپ كەتتى. ەلامان قوڭىر. دەرەك, سۋرەت: ريا «نوۆوستي».