فيفا اقش-تىڭ رەسەيگە قارسى سەناتورلارىنا جاۋاپ بەردى

استانا. 3 ءساۋىر. فيفا (FIFA) فۋتبولدان 2018 جىلعى الەم چەمپيوناتىنىڭ رەسەيدە وتۋىنە قارسى بولعان اقش سەناتورلارىنىڭ حاتىن قاناعاتتاندىرمادى. بۇل تۋرالى lenta.ru حابارلادى. فيفا-نىڭ كوممۋنيكاتسيا بويىنشا ديرەكتورى دەلي فيشەر وسى ماسەلەگە قاتىستى اقپارات قۇرالدارىنا حات جولدادى. وندا ساياسي قاقتىعىستار ءۇشىن سپورتتىق شارالارعا بايكوت جاريالاۋ ءتيىمدى شەشىم ەمەستىگى ايتىلعان. سونداي-اق, حاتتا: «مۇنداي دەڭگەيدەگى جارىستار كوزقاراستارى قايشى تاراپتاردىڭ ساياسي ديالوگ وتكىزۋىنە مۇمكىندىك بەرەدى. سونىڭ ىشىندە فۋتبولدان الەم چەمپيوناتىنىڭ ماڭىزى قانداي ەكەنىن ءبارىمىز بىلەمىز. سوندىقتان فيفا 2018 جىلى رەسەيدە وتەتىن الەم چەمپيوناتى وسى ماقساتتا پايدالى بولادى دەپ سانايدى», – دەلىنگەن. ايتا كەتەيىك, وسىعان دەيىن اقش-تىڭ 13 سەناتورى فيفا پرەزيدەنتى يوزەف بلاتتەرگە حات جازىپ, الەم چەمپيوناتىنىڭ رەسەيدە وتۋىنە قارسىلىق بىلدىرگەن. بۇل اقش ساياساتكەرلەرىنىڭ ءبىرىنشى قارسىلىقتارى ەمەس. 2014 جىلدىڭ ناۋرىزىندا سەناتورلار مارك كيرك پەن دەن كواتس رەسەيدىڭ دوپ دوداسىن وتكىزۋگە لايىق ەمەسىن ايتىپ, بلاتتەرگە حات جولداعان. الايدا, ول كەزدە دە قارسى جاۋاپ بەرىلدى. اقش سەناتورلارىنان بولەك, كەيبىر قۇرامالاردىڭ جاتتىقتىرۋشىلارى مەن بەلگىلى ساياساتكەرلەر دە اتالعان ماسەلەگە قاتىستى قارسى پىكىر بىلدىرگەنىن ايتا كەتەيىك. دەسەك تە, فيفا ولارعا جاۋاپ رەتىندە ءوز شەشىمىن وزگەرتپەيتىنىن ايتىپ وتىر. ەلامان قوڭىر. دەرەك, سۋرەت: lenta.ru.