«سارىارقا» جارتىلاي فينالدان اسا المادى

استانا. 3 ءساۋىر. جوعارى حوككەي ليگاسىندا «براتينا» كۋبوگىنا تالاسقان قاراعاندىنىڭ «سارىارقاسى» جارتىلاي فينالدان اسا المادى. «توروسپەن» بولعان ءتورتىنشى ويىندا ءبىزدىڭ كوماندا 0:2 ەسەبىمەن جەڭىلدى. بۇل تۋرالى egemen.kz حابارلادى. نەفتەكامسكىدە وتكەن ويىننىڭ العاشقى كەزەڭىندە جانكۇيەرلەر گول كورە المادى. ال ەكىنشى كەزەڭدە ايدىن يەلەرى ەسەپ اشىپ, باسىمدىققا يە بولدى. كومانداسىن العا شىعارعان حوككەيشى – الەكسەي ميتروفانوۆ (33-مينۋت). شەشۋشى كەزەڭدە «سارىارقا» حوككەيشىلەرى نامىسقا تىرىسىپ, قارقىنىن كۇشەيتتى. دەگەنمەن, «براتينا» كۋبوگىنىڭ قازىرگى يەگەرلەرىنە ساتتىلىك جەتىسپەدى. قاجەت ناتيجەگە قول جەتكىزگەن «توروس» ويىننىڭ ءۇشىنشى بولىگىندە كوبىندە قورعانىسقا كوڭىل ءبولدى. دەسەك تە, رەتى كەلگەندە قارىمتا شابۋىلدى دا ۇمىتقان جوق. كەزدەسۋدىڭ سوڭعى مينۋتىندا قاراعاندىلىقتار ساپىنان ءبىر ويىنشى كىشى ايىپپەن جازالاندى. بۇل مۇمكىندىكتى ءمۇلت جىبەرمەگەن «توروس» ويىنشىلارى 60-مينۋتتا ەسەپتى ەسەلەپ, فينالعا بەرىلەر جولداماعا يە بولدى. وسىلايشا قوس كوماندا اراسىنداعى جارتىلاي فينالدىق باسەكەنىڭ جالپى ەسەبى رەسەيلىكتەردىڭ پايداسىنا 4:0 بولدى. «توروس» فينالدا تۆەردىڭ تحك-ءسى مەن يجەۆسكىنىڭ «ءيجستالى» اراسىنداعى جەڭىمپازبەن كۇش سىناسادى. بۇل جۇپتا ازىرگە ءۇش ويىن ءوتتى. الدا «يجستال» كومانداسى كەلەدى (2:1). ەلامان قوڭىر. دەرەك: egemen.kz. سۋرەت: hc-saryarka.com.