قوستاناي. 28 تامىز. قوستانايمەن كورشى چەليابى وبلىسىنداعى ماسكەۋ-چەليابى تاس جولىنىڭ بويىندا التى اۆتوموبيل سوعىسقان ءىرى جول-كولىك اپاتى ورىن الدى. سونىڭ سالدارىنان 6 ادام قازا تاپتى. كولىكتەردىڭ اراسىنداعى Volvo جۇك كولىگىندە 1986 جىلى تۋعان قازاقستاندىق بولعان. بۇل تۋرالى egemen.kz ءتىلشىسى حابارلادى.
DAF جۇك كولىگىنىڭ جۇرگىزۋشىسى, قورعان وبلىسىنىڭ تۇرعىنى, 1966 جىلعى ازامات رۋلگە يە بولا الماي, چەليابى وبلىسىنىڭ 1992 جىلى تۋعان تۇرعىنى جۇرگىزىپ كەلە جاتقان KIA Carens, كراسنويارسك وبلىسىنىڭ 1976 جىلى تۋعان تۇرعىنى جۇرگىزىپ كەلە جاتقان Honda Freed اۆتوموبيلدەرىنە سوقتىعىسادى, سونىڭ سالدارىنان ماشينالار جولدان تومەنگە ۇشىپ كەتەدى. مۇنان كەيىن DAF جۇك كولىگى ۆاز-2115, Mitsubishi Pajeroجانە Ford Focus جەڭىل ماشينالارىنا سوقتىعىسادى, ءتورت ماشينا بارىپ, رۋلىندە قازاقستاندىق ازامات كەلە جاتقان Volvo جۇك ماشيناسىنا سوقتىعىسادى. سونىڭ سالدارىنان بارلىق 4 ماشينا وتقا ورانادى. اپاتتىڭ سالدارىنان ۆاز-2115 كولىگىندەگى 4 جولاۋشى, Mitsubishi Pajero كولىگىنەن ەكى ادام سول جەردە قازا بولادى. KIA ماشيناسىنىڭ جۇرگىزۋشىسى مەن Honda كولىگىنىڭ جولاۋشىسى ءتۇرلى جاراقاتتارمەن اۋرۋحاناعا جەتكىزىلەدى. الدىن الا مالىمەتتەرگە قاراعاندا, قايعىلى ءىرى اپاتقا DAF جۇك كولىگى تەجەگىشىنىڭ ىستەن شىعۋى سەبەپكەر بولسا كەرەك. قازاقستاندىق ازاماتتىڭ ءولى-ءتىرىسى, كىم ەكەندىگى جونىندە مالىمەت جوق.
ءنازيرا جارىمبەتوۆا.
دەرەك, سۋرەت: ng.kz
