مەملەكەتتىك حاتشى جۇمىس ساپارىمەن توكيوعا باردى

استانا. 28 تامىز. مەملەكەتتىك حاتشى گۇلشارا ابدىقالىقوۆا جاپونيا پرەمەر-ءمينيسترى س.ابەنىڭ شاقىرۋىمەن ايەلدەرگە ارنالعان «WAW! Tokyo 2015» اتتى بۇكىلالەمدىك كونفەرەنتسيانىڭ ەكىنشى وتىرىسىنا قاتىسۋ ءۇشىن جۇمىس ساپارىمەن توكيوعا باردى. بۇل تۋرالى akorda.kz حابارلادى. مەملەكەتتىك حاتشى جاپونيا پرەمەر-ءمينيسترى س.ابەمەن كەزدەستى, سونداي-اق جاپونيانىڭ ءبىلىم, مادەنيەت, سپورت, عىلىم جانە تەحنولوگيالار ءمينيسترى ح.شيمومۋرامەن كەلىسسوزدەر وتكىزدى. كەزدەسۋدە تاراپتار قازاقستان مەن جاپونيا اراسىنداعى مادەني-گۋمانيتارلىق, سونداي-اق سپورت سالاسىنداعى ىنتىماقتاستىقتىڭ دامۋ پەرسپەكتيۆالارى جونىندە پىكىر الماستى. گ.ابدىقالىقوۆا ەكى ەلدىڭ جوعارى وقۋ ورىندارى مەن عىلىمي ورتالىقتارى اراسىنداعى الماسۋلاردى جانداندىرۋدىڭ ماڭىزدىلىعىن ايتا كەلىپ, اكادەميالىق ىنتىماقتاستىقتى جولعا قويۋ ءۇشىن جاپون عالىمدارىنىڭ ءبىزدىڭ جەتەكشى جوعارى وقۋ ورىندارىنا, سونداي-اق قازاقستان عالىمدارىنىڭ جاپونيا عىلىم جانە ءبىلىم ورتالىقتارىنا ساپارلارىن ۇيىمداستىرۋدى ۇسىندى. سونىمەن بىرگە, مادەنيەت سالاسىنا قاتىستى قولدانىستاعى كەلىسىمدى وزەكتەندىرە تۇسۋگە ۇسىنىس جاسالدى. جاپونيانىڭ ايەلدەر ىستەرى, اكىمشىلىك رەفورما جانە مەملەكەتتىك قىزمەت جونىندەگى مەملەكەتتىك ءمينيسترى ح.اريمۋرامەن كەزدەسۋدە «100 ناقتى قادام» – ۇلت جوسپارىن ىسكە اسىرۋ اياسىنداعى, ونىڭ ىشىندە اكىمشىلىك باسقارۋ مەن مەملەكەتتىك قىزمەت سالاسىنداعى ءوزارا ءىس-قيمىل ماسەلەلەرى تالقىلاندى. سونىمەن قاتار, تاراپتار ايەلدەردىڭ ەكونوميكالىق بەلسەندىلىگىن ىلگەرىلەتۋ ماسەلەلەرىندە تاجىريبە الماسۋعا دايىن ەكەندىكتەرىن ءبىلدىردى. مەملەكەتتىك حاتشى ح.اريمۋرانى 2016 جىلى وتەتىن استانا ەكونوميكالىق فورۋمىنىڭ ايەلدەر كوشباسشىلىعىنا ارنالعان پانەلدىك سەسسياعا قاتىسۋعا شاقىردى. جاپونيانىڭ ەكونوميكا, ساۋدا جانە يندۋستريا ءمينيسترى ي.ميازاۆامەن «نۇرلى جول» باعدارلاماسىن ىسكە اسىرۋعا بايلانىستى جاپون بيزنەسى ءۇشىن اشىلىپ جاتقان جاڭا مۇمكىندىكتەر, سونداي-اق جاپون كومپانيالارىنىڭ ەكسپو-2017 حالىقارالىق كورمەسىنە قاتىسۋ ماسەلەسى تالقىلاندى. كورمەدەگى ەڭ ءىرى پاۆيلون جاپونيانىكى بولادى دەپ جوسپارلانۋدا. دەنساۋلىق ساقتاۋ, ەڭبەك جانە حالىقتى الەۋمەتتىك قورعاۋ ءمينيسترى يا.شيوزاكيمەن كەزدەسۋدە مەديتسينا سالاسىندا بايلانىستار ورناتۋ, حالىقتى مىندەتتى مەديتسينالىق ساقتاندىرۋ جۇيەسىن ەنگىزۋ جونىندەگى جاپونيا تاجىريبەسىن زەردەلەۋ, ءدارى-دارمەك سالاسىنداعى ىنتىماقتاستىق ماسەلەلەرى كوتەرىلدى. سونىمەن قاتار, گ.ابدىقالىقوۆا جاپونياداعى حالىقارالىق ىنتىماقتاستىق جونىندەگى اگەنتتىكتىڭ جانە ەكونوميكالىق ىنتىماقتاستىق جانە دامۋ ۇيىمىنىڭ (ەىدۇ) توكيوداعى وكىلدىگى باسشىلارىمەن كەزدەسىپ, KazAID-ءتى دامىتۋ (دامۋعا رەسمي كومەك) ءۇشىن ءوزارا ءىس-قيمىل مەن تاجىريبە الماسۋدىڭ, ەلدىڭ ەكونوميكالىق ساياساتىنىڭ دامۋىنا تالداۋ جاساۋ ءۇشىن ەىدۇ-نىڭ ساراپتامالىق الەۋەتىن پايدالانۋدىڭ ماسەلەلەرىن تالقىلادى. ايدار ورىسباەۆ. دەرەك: akorda.kz. سۋرەت: khabar.kz.