مەملەكەت باسشىسى سەربيا پرەزيدەنتىمەن كەزدەستى

استانا. 28 تامىز. مەملەكەت باسشىسى استاناعا رەسمي ساپارمەن كەلگەن سەربيا رەسپۋبليكاسىنىڭ پرەزيدەنتى توميسلاۆ نيكوليچپەن كەزدەستى. بۇل تۋرالى akorda.kz حابارلادى. كەزدەسۋ بارىسىندا ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق سالالارداعى ەكىجاقتى قارىم-قاتىناس ماسەلەلەرى تالقىلاندى. ەكى ەل كوشباسشىلارى حالىقارالىق كۇن تارتىبىنە دە قاتىستى پىكىر الماستى. ەلباسى قازاقستاننىڭ سەربيا رەسپۋبليكاسىمەن سىندارلى قارىم-قاتىناستى دامىتۋعا مۇددەلى ەكەنىن اتاپ ءوتتى. «قارىم-قاتىناستارىمىزعا تىڭ سەرپىن بەرە الامىز دەپ سانايمىن. بۇگىن بيزنەس-فورۋم وتەدى, وندا ەلدەرىمىزدىڭ ىسكەر توپتارى ءوزارا تىعىز بايلانىستاردى جولعا قويا الادى», – دەدى نۇرسۇلتان نازارباەۆ. ت.نيكوليچ قازاقستانعا شاقىرعانى ءۇشىن نۇرسۇلتان نازارباەۆقا العىس ءبىلدىردى جانە استانانىڭ اۋقىمدى دامۋ قارقىنى ءوزىن ءتانتى ەتكەنىن ايتتى. سەربيا پرەزيدەنتى سونداي-اق قازاقستان حالقىن «استانا» فۋتبول كلۋبىنىڭ ۋەفا چەمپيوندار ليگاسىنىڭ توپتىق كەزەڭىنە وتۋىنە بايلانىستى قۇتتىقتادى. كەزدەسۋ سوڭىندا ت.نيكوليچ نۇرسۇلتان نازارباەۆقا سەربيا رەسپۋبليكاسىنىڭ وردەنىن تاپسىردى. «مەن بۇل وردەنمەن ءسىزدى ەلدەرىمىزدىڭ اراسىنداعى قارىم-قاتىناستى نىعايتۋعا قوسقان ۇلەسىڭىز ءۇشىن عانا ەمەس, ءوز حالقىڭىزعا جاساپ جاتقان يگىلىكتەرىڭىز ءۇشىن جانە قازاقستاننىڭ حالىقارالىق قۇقىق قاعيداتتارىن ساقتاۋداعى تاباندىلىعى ءۇشىن ماراپاتتاپ وتىرمىن. ءسىز – الەمدىك اۋقىمداعى, سيرەك ساناتتاعى كوشباسشىسىز», – دەدى سەربيا پرەزيدەنتى. ايدار ورىسباەۆ. دەرەك, سۋرەت: akorda.kz.