ەلباسى كونستيتۋتسياسىنىڭ 20 جىلدىعىنا ارنالعان كونفەرەنتسياعا قاتىستى

استانا. 28 تامىز. پرەزيدەنت قازاقستان رەسپۋبليكاسى كونستيتۋتسياسىنىڭ 20 جىلدىعىنا ارنالعان «كونستيتۋتسيا: بىرلىك, تۇراقتىلىق, وركەندەۋ» اتتى حالىقارالىق عىلىمي-تاجىريبەلىك كونفەرەنتسياعا قاتىستى. بۇل تۋرالى akorda.kz حابارلادى. كونفەرەنتسيا جۇمىسىنا ۇكىمەت مۇشەلەرى, پارلامەنت پالاتالارىنىڭ توراعالارى مەن دەپۋتاتتارى, كونستيتۋتسيالىق كەڭەس توراعاسى مەن مۇشەلەرى, بەدەلدى حالىقارالىق ۇيىمدار دەلەگاتسيالارى, سونداي-اق 28 ەلدىڭ قۇقىق قورعاۋ مەكەمەلەرى مەن پروكۋراتۋرالارىنىڭ, سوتتارىنىڭ, كونستيتۋتسيالىق باقىلاۋ ورگاندارىنىڭ باسشىلارى, وتاندىق جانە شەتەلدىك تانىمال زاڭگەر-عالىمدار, ساياساتتانۋشىلار مەن ساراپشىلار قاتىستى. مەملەكەت باسشىسى كونفەرەنتسياعا قاتىسۋشىلارعا ارناعان سوزىندە 1995 جىلعى 30 تامىزدا كونستيتۋتسيا جونىندەگى رەفەرەندۋمدا بىردەن-ءبىر دۇرىس جول تاڭدالعانىن اتاپ ءوتتى. «ەگەر ءبىزدىڭ مەملەكەت قۇرۋ جولىنداعى قادامدارىمىز اسىعىس, ساياسي تۇرعىدان ابستراكتىلى جوبالارعا نەگىزدەلەتىن بولسا, وندا ساتسىزدىككە ۇشىرايتىنىمىز انىق ەدى. ونىڭ زالالى وراسان بولار ەدى. ءبىز مەملەكەت قۇرۋ اسا جاۋاپتى, كۇردەلى, ۇزاق ءارى شەتىن ۇدەرىس ەكەنىن كوپتەگەن تاۋەلسىز جاڭا مەملەكەتتەردىڭ تاجىريبەسىنەن, كەيدە اسا وكىنىشتى مىسالدارىنان بىلەمىز. مەملەكەت قۇرۋ قاتاڭ كەستە نەمەسە ۋتوپيالىق جوسپارلار نەگىزىندە جۇزەگە اسىرىلۋى مۇمكىن ەمەس. ەكونوميكالىق پروگرەسس جانە حالىق باقۋاتتىلىعى بولمايىنشا ورنىقتى تۇراقتىلىق بولمايدى. ال ەلدەگى تۇراقتىلىقسىز تابىستى وزگەرىستەر جاساۋ مۇمكىندىگى دە قالماس ەدى», – دەدى قازاقستان پرەزيدەنتى. نۇرسۇلتان نازارباەۆ ەلىمىز كونستيتۋتسيا ەرەجەلەرىن باسشىلىققا الا وتىرىپ, نەبارى ەكى ونجىلدىقتا ۇلكەن جولدى ءجۇرىپ وتكەنىن ايتتى. «قازاقستان – بۇگىندە ابدەن قالىپتاسقان, الەمنىڭ ابىرويلى جانە لايىقتى مەملەكەتى. بۇل – ءبىزدىڭ نەگىزگى زاڭىمىزدىڭ بارلىق ەرەجەلەرى مەن قاعيداتتارىنىڭ ناقتى ءىس جۇزىنە اسۋى. جاقسى جاعىنا قاراي وزگەرۋگە بەيىم تۇراتىن مەملەكەتتىك جانە قوعامدىق قۇرىلىس قانا ءتيىمدى بولىپ سانالادى. ءبىزدىڭ اتا زاڭىمىزدا تابىستى دامۋ ءۇشىن دە, ۇلتتىڭ ءوزىن-ءوزى جاڭعىرتۋى ءۇشىن دە قاجەتتى بارلىق قۇقىقتىق تەتىكتەر بار. ءبىز 2050 جىلعا دەيىنگى ستراتەگيالىق باعدارلامامىزدىڭ نەگىزىندە الدىمىزعا قازاقستاندى الەمدەگى ەڭ دامىعان 30 ەلدىڭ بىرىنە اينالدىرۋ جونىندە جاھاندىق ماقسات قويدىق», – دەدى ەلباسى. سونىمەن قاتار, مەملەكەت باسشىسى كونفەرەنتسياعا قاتىسۋشىلاردىڭ جۇمىستارى جەمىستى جانە تابىستى بولۋىنا تىلەكتەستىك ءبىلدىردى. ءىس-شارا بارىسىندا ەۋروپا كەڭەسى ۆەنەتسيا كوميسسياسىنىڭ ۆيتسە-پرەزيدەنتى ە.تانچەۆ, ەۋرازيالىق ەكونوميكالىق وداق سوتىنىڭ توراعاسى, ارمەنيا رەسپۋبليكاسىنىڭ كونستيتۋتسيالىق سوتىنىڭ توراعاسى, جاڭا دەموكراتيا ەلدەرى كونستيتۋتسيالىق باقىلاۋ ورگاندارى كونفەرەنتسياسىنىڭ توراعاسى گ.ارۋتيۋنيان ءسوز سويلەدى. كونفەرەنتسياعا قاتىسۋشىلار كونستيتۋتسيالىق قۇرىلىستاعى قازاقستاننىڭ تاجىريبەسىنە جوعارى باعا بەرىپ, ەلدىڭ كونستيتۋتسيالىق تۇرعىدان دامۋىنداعى نۇرسۇلتان نازارباەۆتىڭ اتقارعان ءرولى ايرىقشا ەكەنىن اتاپ ءوتتى. شەتەلدىك قوناقتار قازاقستاننىڭ قوعامدىق-ساياسي تۇراقتىلىقتى ساقتاۋداعى, ەتنوسارالىق جانە دىنارالىق كەلىسىمدى قامتاماسىز ەتۋدەگى تابىستارىن, سونداي-اق دەموكراتيالاندىرۋ جانە ىرىقتاندىرۋ ۇدەرىسىندەگى ورنىقتىلىق پەن جۇيەلىلىكتى اتاپ كورسەتتى. ايدار ورىسباەۆ. دەرەك, سۋرەت: akorda.kz.