رەسەيدىڭ جاستارى شىعىس وڭىرىندەگى دەمالىس لاگەرىنە كەلدى

وسكەمەن. 28 تامىز. رەسەي فەدەراتسياسىنان «التاي جاستارى» حالىقارالىق لاگەرىنە كەلگەن قوناقتار وزدەرىنىڭ اسەرلەرىمەن ءبولىستى. بۇل تۋرالى egemen.kz حابارلادى. ەكى كۇن بويى رەسەيلىك جاستار قازاق حالقىنىڭ سالت-ءداستۇرى مەن مادەنيەتىمەن جاقىن تانىسادى. اتالعان شاراعا رەسەيدىڭ التاي ايماعى مەن ەلىمىزدىڭ شىعىس وڭىرىندەگى جوعارى وقۋ ورىندارىنان 50-گە جۋىق ادام قاتىسۋدا. «ءبىزدىڭ باستى ماقساتىمىز – تاجىريبە الماسۋ, قازاق حالقىنىڭ ۇلتتىق مادەنيەتىمەن جەتە تانىسۋ, ەڭ باستىسى, كورشى ەلمەن دوستىق بايلانىس ورناتۋ. سونداي-اق ءبىز, شىعىس قازاقستان وبلىسىنىڭ جاستارىن وزىمىزگە قوناققا شاقىرعىمىز كەلەدى. ءبىزدىڭ مەملەكەتتەرىمىز ۇزاق جىلدار بويى بارلىق سالادا ارىپتەستىك قارىم-قاتىناستى ۇزگەن ەمەس. سوندىقتان, ەكى ەلدىڭ تۇرعىندارى تىعىز بايلانىستا بولۋىمىز قاجەت. ال قازىر ءبىز شىعىس مادەنيەتىنىڭ عاجاپ ۇلگىلەرىن كورىپ, تامسانۋدامىز», – دەدى رەسەيدىڭ التاي ايماعىنان كەلگەن اننا لازاتوۆا. لاگەردە جاستار ءتۇرلى سەمينارلارعا, جاستار ساياساتى بويىنشا وزەكتى ماسەلەلەر قوزعالاتىن سۇحبات الاڭدارىنا, «Fort Boyard» فورماتىنداعى سپورتتىق-زياتكەرلىك ويىندارعا, «حولي» بوياۋ فەستيۆالىنە جانە ۇلتتىق ويىندار مەن وزگە دە شارالارعا قاتىسادى. اتالعان باعدارلاما وسكەلەڭ ۇرپاق اراسىنداعى ەتنيكاارالىق قارىم-قاتىناستى نىعايتۋعا سەپتىگىن تيگىزبەك. دۋمان اناش. دەرەك, سۋرەت: egemen.kz.