وسكەمەن. 28 تامىز. وسكەمەن مەن سەمەي قالالارىندا دەمالىس اۋماقتارىن قايتا جوندەۋ جۇمىستارى جالعاسۋدا. بۇل تۋرالى egemen.kz حابارلادى.
كەلەسى جىلدان باستاپ ەكى قالانىڭ دەمالىس اۋماقتارى تۇرعىندار ءۇشىن قولايلى ءھام قايتالانباس كەلبەتكە يە بولادى. ياعني, وسكەمەندە جولدار كەڭەيتىلىپ, ۇلى وتان سوعىسى ارداگەرلەرىنە ارنالعان ەسكەرتكىش اۋماعى اباتتاندىرىلعان ساياباققا اينالماق. سەمەيدە ەرتىستىڭ سول جاعالاۋىنداعى باس الاڭدى اباتتاندىرۋ جۇمىستارى اياقتالادى. وسى جونىندە ايتقان وبلىس اكىمى دانيال احمەتوۆ سەمەيدى كورىكتەندىرۋ باعىتىندا وبلىس بيۋدجەتىنەن قاجەتتى قاراجات بولىنگەنىن, ال وبلىس ورتالىعىندا كەلەر جىلى ءۇش دەمالىس ايماعى پايدالانۋعا بەرىلەتىنىن جەتكىزدى.
«قايتا جوندەۋدەن ءوتىپ, كەڭەيتىلگەن سلاۆسكي اتىنداعى جاعالاۋ مەن داڭق مەموريالى وسكەمەندەگى دەمالىسقا ارنالعان باستى ورىنداردىڭ ءبىرى بولادى. سونىمەن بىرگە ۇلى وتان سوعىسىنا قاتىسۋشىلارعا ارنالعان ەسكەرتكىش اۋدانىنىڭ اۋماعى كىشىگىرىم ساياباققا اينالىپ, كومەندانتكانى كورىكتەندىرۋ جۇمىستارى اياقتالادى», – دەدى دانيال احمەتوۆ.
ءوڭىر باسشىسى پروتوزانوۆ كوشەسىن ءۇلبى كوپىرىنە دەيىن كەڭەيتۋ جانە ساتپاەۆ داڭعىلىنىڭ قاراما-قارسى جولاقتارى اراسىندا ورنالاسقان جاسىل بەلدەۋدىڭ ەسەبىنەن جولدى 12 مەترگە دەيىن كەڭەيتۋ جونىندە تاپسىرما بەردى. ەڭ باستىسى, وبلىس اكىمىنىڭ تاپسىرماسى بويىنشا 1 قىركۇيەكتەن باستاپ سول جاعالاۋداعى ساياباق كەشەنىنە كىرۋ تەگىن بولماق.
«وبلىس ورتالىعىنداعى ەڭ ۇلكەن ساياباققا كىرۋ اقىسى ەرەسەكتەرگە 400 تەڭگە, بالالارعا 200 تەڭگەنى قۇرايدى. الەمنىڭ بىردەپ-ءبىر قالاسىندا مۇنداي جوق. ماسكەۋدە سوكولنيككە ەركىن كىرەسىز. مۇندا بالالار بوس ۋاقىتىن وتكىزە المايدى, سپورتشىلار جۇگىرە المايدى. تۇرعىندارعا بۇل مۇمكىندىكتى بەرۋىمىز كەرەك. ارينە, بۇرىنعىدان كوپ كۇش جۇمساۋعا, تازالىق شارالارىن كۇشەيتۋگە تۋرا كەلەدى. اتا-انالار مەن اجەلەر ساياباقتىڭ ىشىندەگى اتتراكتسيوندارعا تولەماقى تولەۋگە بەيىلدى. سوندىقتان, گاگارين بۋلۆارىنداعى سياقتى بالالار الاڭدارىن جابدىقتاۋ جونىندە ويلانۋ كەرەك», – دەدى ايماق باسشىسى.
دۋمان اناش.
دەرەك, سۋرەت: egemen.kz.
