اقتوبە قالاسىنىڭ اكىمى ەرحان وماروۆ ۇلى جەڭىستىڭ 70 جىلدىعىنا وراي كەلگەن سانكت-پەتەربۋرگ قالاسى نەۆا اۋدانىنىڭ ارداگەرلەر كەڭەسىنىڭ دەلەگاتسياسىن قابىلدادى. دەلەگاتسيانىڭ كەلۋ ماقساتى – قازاقستاندىق ارداگەرلەرمەن كەزدەسۋ, باۋىرلاس قازاق حالقىنىڭ تاريحىمەن جانە مادەنيەتىمەن تانىسۋ, پاتريوتتىق تاربيە بەرۋ شارالارىنا قاتىسۋ.
پەتەربۋرگتىك قوناقتاردى قابىلداۋ سالتاناتىندا شاھار باسشىسى ءسوز الىپ, ەكى ەل اراسىنداعى ىنتىماقتاستىقتىڭ كوكجيەگى كەڭەيىپ وتىرعانىن جەتكىزدى. ۇلى جەڭىستىڭ 70 جىلدىعى وڭىردە وتە كەڭ كولەمدە اتالىپ وتكەنىن, مۇنداي ىزگىلىكتى كەزدەسۋلەردىڭ سوعىس كەزىندەگى اعا ۇرپاقتىڭ ەرلىك ىستەرى مەن جانقيارلىق ەڭبەگىن جاستاردىڭ جادىندا جاڭعىرتىپ, ولاردىڭ بويىندا وتانسۇيگىشتىك قاسيەتتى قالىپتاستىرۋعا ىقپال ەتەتىنىن اتاپ ءوتتى.
– ۇلى وتان سوعىسىنا 122 مىڭنان استام اقتوبەلىك قاتىسىپ, سونىڭ 36 مىڭنان استامى تۋعان جەرگە ورالمادى. كوپتەگەن اقتوبەلىكتەر اقتوبەدە قۇرىلعان №316 اتقىشتار ديۆيزياسى مەن №101 دەربەس ۇلتتىق اتقىشتار بريگاداسىنىڭ قۇرامىندا ماسكەۋدى قورعاۋعا قاتىستى, ودان ءارى مايدان جولدارىنان ءوتتى. اقتوبەلىك جاۋىنگەرلەر سول كەزدەگى لەنينگرادتى – قازىرگى سانكت-پەتەربۋرگتى جاۋدان قورعاۋ جانە ازات ەتۋ شايقاستارىندا ەرلىكپەن سوعىستى. اعا ۇرپاقتىڭ ەرلىك ىستەرى ەشقاشان ۇمىتىلمايدى. ساپارلارىڭىزعا ساتتىلىك تىلەيمىن. قالادا ۇلى جەڭىستىڭ 70 جىلدىعىنا وراي جاسالعان جۇمىستاردى ءوز كوزدەرىڭىزبەن كورۋگە بارلىق جاعداي جاسايمىز. جالپى, ەكى قالانىڭ بارلىق سالادا ىنىماقتاستىق بايلانىسىن نىعايتۋعا بەرىك نەگىز بار, – دەدى ە.وماروۆ. سانكت-پەتەربۋرگتىڭ نەۆا اۋدانى ارداگەرلەر كەڭەسىنىڭ ءتوراعاسى ميحايل شەۆچۋك اقتوبەلىكتەردىڭ اياق-قولدارىن جەرگە تيگىزبەي جىلى قارسى الۋلارىنا ريزاشىلىعىن ءبىلدىرىپ, ىنتىماقتاستىق ساپارلارىنىڭ الدا دا جالعاسا بەرەتىنىن, ءوز ۇيلەرىنە كەلگەندەي سەزىمدە ەكەندىكتەرىن جەتكىزسە, نەۆا اۋدانى اكىمشىلىگىنىڭ جاستار ساياساتى جانە قوعامدىق ۇيىمدارمەن بايلانىس ءبولىمىنىڭ باستىعى اندرەي ليابين اقتوبە قالاسىندا جاساقتالعان №74 دەربەس تەڭىز اتقىشتار بريگاداسىنىڭ جانە مىڭداعان قازاقستاندىقتاردىڭ لەنينگراد قالاسىن قورعاۋعا جانە جاۋدان بوساتۋعا قاتىسقانىن, قازاقستاننىڭ قورشاۋداعى قالاعا ازىق-ت ۇلىك, قارۋ-جاراق, جىلى كيىم جەتكىزىپ تۇرعانىن تىلگە تيەك ەتە كەلىپ, سوعىس جىلدارىندا تانكىگە وق وتكىزبەۋگە پايدالانىلعان فەرروحرومدى اقتوبە فەرروقورىتپا زاۋىتى بەرگەنىن اتاپ ءوتتى. ول سودان كەيىن ءبىر توپ اقتوبەلىك سوعىس ارداگەرلەرىنە «1941-1945 جىلدارداعى ۇلى وتان سوعىسىنداعى جەڭىسكە 70 جىل» مەرەكەلىك مەدالىن جانە ەسكەرتكىش سىيلىقتى سالتاناتتى جاعدايدا تاپسىردى. ءوز كەزەگىندە اقتوبەلىكتەر تاراپىنان دا ەسكەرتكىش سىيلىقتار ۇسىنىلدى. قوناقتار «ماڭگىلىك الاۋ» داڭق مەموريالى جانىنداعى «سول جىلدارعا باس يەمىز» اكتسياسىنا قاتىستى. كەڭەس وداعىنىڭ باتىرى ءاليا مولداعۇلوۆانىڭ مەموريالدىق كەشەنىنە جانە باتىرلار اللەياسىنا گۇل شوقتارىن قويدى, قالانىڭ بىرقاتار كاسىپورىندارى مەن مۋزەيلەرىندە, جوعارى جانە ارناۋلى ورتا وقۋ ورىندارىندا بولىپ, ەڭبەك ۇجىمدارىمەن جانە ستۋدەنت-جاستارمەن كەزدەستى. جىلى جۇزدەسۋلەر مەن قىزىقتى كەزدەسۋلەردەگى پىكىر الىسۋلارعا ەكى قالانىڭ ىنتىماقتاستىعى جانە ۇلى جەڭىستىڭ 70 جىلدىعى ارقاۋ بولدى.
ساتىبالدى ءساۋىرباي, «ەگەمەن قازاقستان».
اقتوبە وبلىسى.
