تۇلەگەن تۇبەك تىنىسى

ەلىمىزدە بيىل اسسامبلەيا جىلى. وسى مەرەكە اياسىندا كەڭ-بايتاق قازاقستاندى ارالاپ, ساپارعا شىققان «مەنىڭ قازاقستانىم» پويىزى ەلىمىزدەگى ۇلتارالىق تاتۋلىق پەن بەيبىتشىلىك مودەلىنىڭ سالتانات قۇرعانىن پاش ەتەتىن ماڭىزدى شارالاردىڭ ۇيىتقىسىنا اينالدى. 1 ءساۋىر كۇنى «مەنىڭ قا­زاقستانىم» پويىزى ماڭعىستاۋ وبلىسىنىڭ بەينەۋ اۋدانىنا اتباسىن تىرەگەن ەدى. بەينەۋ اۋدانى تاۋەلسىزدىكتىڭ العاشقى جىلدارى رەسپۋبليكامىزداعى ەڭ ارتتا قالعان وتىز اۋداننىڭ ءبىرى بولاتىن. ارادا ءبىراز ۋاقىت وتكەننەن كەيىن, ياعني بۇگىنگى كۇنى اۋداننىڭ ەكونوميكاسى وركەندەپ, دونورلىق دارەجەگە جەتكەن. تۇرعىندار سانى 22 مىڭنان 62 500 ادامعا جەتىپ, اتالعان مەرزىم ىشىندە ءۇش ەسەگە دەيىن وسكەن. اۋدان ورتالىعى – بەينەۋ  كەنتىندە 46 مىڭ ادام تۇرادى. جۋرناليستەرمەن بولعان ءباسپاسوز ءماسليحاتىندا بەينەۋ اۋدانىنىڭ اكىمى باسشى ءازىرحانوۆ الەۋمەتتىك جانە ەكونوميكالىق جاعداي تۋرالى بىلاي دەدى: «اۋدانىمىزدا, اسىرەسە, سوڭعى كەزدەرى كىشى كاسىپكەرلىك سالاسى جاقسى دامىپ وتىر. جاڭادان 1 919 ۋاقىتشا جانە تۇراقتى جۇمىس ورىندارى اشىلىپ, وعان 1 466 ادام ورنالاستىرىلدى, 392 ادام اقىلى قوعامدىق جۇمىسقا تارتىلدى, 151 ادام الەۋمەتتىك جۇمىس ورىندارىنا جىبەرىلدى, «جاستار پراكتيكاسى» باعدارلاماسى اياسىندا 187 جاس مامان ۋاقىتشا جۇمىسقا قابىلدانىپ, ونىڭ ۇشتەن ءبىرى تۇراقتى جۇمىسقا ورنالاستى. «جۇمىسپەن قامتۋ-2020», «بيزنەستىڭ جول كارتاسى-2020» باعدارلاماسى بويىنشا 96 ادام قايتا دايارلاۋ جانە بىلىكتىلىگىن ارتتىرۋ كۋرستارىنا, 47 جاس مامان جاستار پراكتيكاسىنا جىبەرىلدى. 16 تۇرعىن 45,2 ملن. تەڭگە نەسيە الىپ, 18 جۇمىس ورنىن اشتى. دەنساۋلىق ساقتاۋ سالاسىنا وبلىستىق بيۋدجەتتەن 1 ملرد. تەڭگەدەن استام قارجى ءبولىندى, 35,8 ملن. تەڭگەنىڭ اقىلى قىزمەتى كورسەتىلدى. اۋداندا 32 ماماندىق بويىنشا 90 دارىگەر مەن 383 ارناۋلى ورتا ءبىلىمدى مامان جۇمىس ىستەيدى. اۋدانىمىزدا ءوندىرىس, كاسىپكەرلىك, ينفراقۇرىلىمدى دامىتۋ جاقسى جولعا قويىلعان. وتكەن جىلى 600,8 مىڭ توننا مۇناي مەن 339,5 ملن. تەكشە مەتر گاز ءوندىرىلدى. نەگىزگى كاپيتالعا سالىنعان ينۆەستيتسيا 54,7 ملرد. تەڭگەگە, ونەركاسىپ ءونىمىنىڭ كولەمى 70,8 ملرد. تەڭگەگە جەتتى». بەينەۋ اۋدانىنىڭ تىزگىنىن 25 جىلدان بەرى ۇستاپ كەلە جاتقان, ەلدىڭ سوناۋ قيىن-قىستاۋ كەزدەگى جاعدايىن بۇگىنگى كۇنى جوعارى دارەجەگە جەتكىزگەن باسشى ايجاناق ۇلى بۇدان باسقا دا اۋدانعا قاتىستى ءبىراز دەرەكتەردى جۋرناليستەردىڭ الدىنا جايىپ سالدى. ماسەلەن, ستراتەگيالىق اسا ءىرى جوبالاردىڭ ءبىرى سانالاتىن «بەينەۋ – بوزوي» ماگيسترالدى گاز قۇبىرىنىڭ قۇرىلىسى باستالدى. سونداي-اق, ۇستىمىزدەگى جىلى «قازازوت» جشس «شاعىرلى-ءشومىشتى»  كەن ورنىن يگەرۋ جۇمىستارى باستالادى ەكەن. اۋدانداعى استىق تەرمينالى 14,3 مىڭ توننا ۇنمەن, 12,9 مىڭ توننا جەممەن قامتىلعان. اۋداندا مال شارۋاشىلىعىندا ءوسىپ-وركەندەۋ سيپاتى بايقالادى. قازىر جەكە ادامداردىڭ قولىندا 3 927 باس سيىر, 92 418 باس قوي مەن ەشكى, 8 582 باس جىلقى, 13 356 باس تۇيە بار.  202 شارۋا قوجالىعى بيۋدجەتكە 3,2 ملن. تەڭگەنىڭ سالىعىن تولەگەن. كاسىپكەرلىك نىساندارىنىڭ سانى بۇرىنعى جىلعا قاراعاندا 10 پايىزعا وسكەن, تۇرعىنداردىڭ 26 پايىزى وسى سالادا جۇمىس ىستەيدى. ولار 1,5 ملرد. تەڭگە سالىق تولەپ, اۋداندىق بيۋدجەتتىڭ مەنشىكتى كىرىسىنىڭ 57 پايى­زىن قۇرادى. «بيزنەستىڭ جول كارتاسى-2020» باعدارلاماسى بويىنشا ەكى كاسىپكەر 30,8 ملن. تەڭگەنىڭ نەسيەسىن السا, ميكروكرەديتتىك ۇيىمدار ارقىلى 39 تۇرعىن 140,5 ملن. تەڭگەنىڭ نەسيەسىن الىپ, 65 جۇمىس ورنىن اشتى. بەينەۋدە اشىلعان «دامۋ» قورىنىڭ كاسىپكەرلەرگە قىزمەت كورسەتۋ ورتالىعى 100 ادامعا ارنايى سەرتيفيكات بەردى. اقجىگىت, تاجەن, سىڭعىرلاۋ اۋىلدارىن سۋلاندىرۋ جۇمىستارى تولىق اياقتالدى. رەسپۋبليكالىق بيۋدجەت قارجىسىنا اۋىلىشىلىك سۋ قۇبىرىن تارتۋ جانە سۋ تازارتۋ قوندىرعىسىن ورناتۋ جۇمىستارى باستالدى. جىل ىشىندە 64 مىڭ شارشى مەتر بولاتىن 494 جەكەمەنشىك تۇرعىن ءۇي سالىندى. «قولجەتىمدى تۇرعىن ءۇي-2020»  باعدارلاماسىنا ساي بەينەۋدە 4 پاتەرلى 6 كوممۋنالدىق تۇرعىن ءۇي پايدالانۋعا بەرىلدى. «مەنىڭ قازاقستانىم» پويىزىنىڭ بەينەۋ كەنتىندەگى جۇمىسى ناتيجەلى بولدى. ادىلەت مينيسترلىگى ماماندارىنىڭ قابىلداۋىندا 15 ادام بولىپ, وزدەرىنە ءتيىستى سۇراقتارىنا جاۋاپ الدى. اۋىل شارۋاشىلىعى, «دامۋ» قورى, ۇلتتىق پالاتا ماسەلەلەرىنە قاتىستى 31 ادام ءوز سۇراقتارىمەن قابىلداۋعا كەلدى. حالىققا قىزمەت كورسەتۋ ورتالىعى بويىنشا 15 ادام, الەۋمەتتىك ماسەلەلەر بويىنشا 10 ادام مامانداردىڭ قابىلداۋىندا بولدى. «مەنىڭ قازاقستانىم» پويىزى دارىگەرلەرىنە 361 ادام قارالىپ, دارىگەرلىك كەڭەس بەرىلىپ, ەم قابىلدادى. بەينەۋ كەنتىنىڭ ورتالىعىنداعى ستاديوندا استانالىق جانە الماتىلىق ونەر قايراتكەرلەرىنىڭ كونتسەرتىنە 10 مىڭنان اسا ادام قاتىسىپ, رۋحاني ءلاززات الدى. شارافاددين ءامىروۆ, «ەگەمەن قازاقستان». ماڭعىستاۋ وبلىسى, بەينەۋ اۋدانى.