شالعايداعى مادەني-ساۋىقتىرۋ كەشەنى

جەكە كاسىپكەرلەردىڭ قارجىلىق قولداۋىمەن سالىنىپ,  پايدالانۋعا بەرىلدى قۇرتاي اۋىلدىق وكرۋگىنە قاراستى جارقىن اۋىلىندا جارتى مىڭعا جۋىق ادام تۇرادى. شاڭىراعى شايقالماعان, ءتۇتىنى ءتۇزۋ ۇشقان ەڭسەلى ەلدى مەكەندە بىرقاتار الەۋمەتتىك ماسەلەلەر شەشىمىن تاپقانىمەن, كلۋبتىڭ بولماۋى, سپورت زالىنىڭ تارلىعى سالدارىنان جاستارعا قالىپتى مادەني دەمالىستىڭ تۋدىرىلماۋى ۇلكەندەردى قاتتى ويلاندىراتىن. وسى سەبەپتى جۇرتشىلىق اتىنان جازىلعان حات وبلىستىق اكىمدىككە جولدانىپ, مادەني شارالار مەن سپورت جارىستارىن ۇيىمداستىراتىن ورتالىق سالىپ بەرۋ سۇرالعان بولاتىن. جاۋاپ كوپ كۇتتىرگەن جوق. ءوتىنىش ءوڭىر باسشىسى ەرىك سۇلتانوۆتىڭ تاراپىنان قولداۋ تاپقانىن ەستىپ, تۇرعىندار قۋانىسىپ قالعان. كوپ ۇزاماي “سەۆيمستالكون” جشس مەن “مامونتوۆ” جك كەشەندى تۇرعىزۋدى ءوز مىندەتتەرىنە الىپ, قۇرىلىس جۇمىستارىنا جىلدام تۇرعىزىلاتىن عيماراتتار زاۋىتى, پەتروپاۆل قۇرىلىس ماتەريالدارى زاۋىتى سەكىلدى جەرگىلىكتى كاسىپورىنداردىڭ بولات قۇرىلعىلارى, پلاستيك تەرەزەلەرى مەن ەسىكتەرى كەڭىنەن پايدالانىلدى.  نە كەرەك, قىسقا مەرزىم ىشىندە 800 شارشى مەتردەن استام اۋماقتى الىپ جاتقان وسى زامانعى نىسان بوي كوتەردى. ءبىرىنشى قاباتتا باسكەتبول, ۆولەيبول, شاعىن فۋتبول وينايتىن ستاندارتتى زال, جاتتىعۋ جاسايتىن, تەننيستەن, شاحمات-دويبىدان, توعىزقۇمالاقتان جارىس وتكىزەتىن بولمەلەر, ەكىنشى قاباتتا كۇرەس زالى ورنا­لاستى. تالاپقا ساي جىلى دارەتحانا مەن دۋش بولمەسى جۇمىس ىستەيدى. كوپبەيىندى كەشەن مەكتەپتىڭ بۋ قازاندىعىنا قوسىلدى. دەنە شىنىقتىرۋ-ساۋىقتىرۋ ورتالى­عىنىڭ اشىلۋ سالتاناتىنا قاتىسقان ەرىك حامزا ۇلى جارقىندىقتاردى ايتۋلى وقيعا­مەن قۇتتىقتاپ, بالعىن سپورتشىلارعا ترەناجەرلار مەن دوپتاردى سىيعا تارتتى. – ەلباسى جەرگىلىكتى بيلىك ورىندارىنا اۋىلدىق جەرلەردە بۇقارالىق سپورتتى بارىنشا دامىتۋ تالابىن قويعان بولاتىن. وسى باعىتتا قىزىلجار وڭىرىندە  كوپتەگەن شارالار اتقارىلىپ كەلەدى. وبلىس ورتالىعىندا جابىق مۇز ايدىنى, امبەباپ سپورت كەشەنىنىڭ قۇرىلىستارى جۇرگىزىلۋدە. ع.مۇسىرەپوۆ اۋدانىندا دەمەۋشىلىك كومەكپەن ءجۇزۋ باسسەينى بار سپورت ورتالىعى ىسكە قوسىلدى.  الداعى ۋاقىتتا بۇل سالا بويىنشا مەملەكەت-جەكەمەنشىك ارىپتەستىگىن نىعايتا بەرەتىن بولامىز. مىنا نىسانعا شاعىن جانە ورتا بيزنەس وكىلدەرى 57 ميلليون تەڭگە قاراجات جۇمسادى. بۇدان بىلاي مادەنيەت وشاعىنىڭ مىندەتىن دە اتقاراتىن بولادى. ورتالىقتىڭ بۇقارالىق سپورتتى جانداندىرىپ, ۇلتتىڭ دەنساۋلىعىنا قىزمەت ەتۋىنە تىلەكتەسپىن,–دەدى ە. سۇلتانوۆ ءوز سوزىندە. ارداگەرلەر كەڭەسىنىڭ توراعاسى مۇقاناي بايعوجين, جاپون كۇرەسىنەن سپورت شەبەرى ەركەبۇلان قۇرمانوۆ ەلباسىنىڭ ساليقالى ساياساتىن قولداپ, يگىلىكتى ىسكە باستاماشى بولا بىلگەن كاسىپكەرلەر ءالىمجان ىسمايىلوۆقا, سۇلتانبەك گازديەۆكە شىنايى العىستارىن ءبىلدىردى. تۇساۋكەسەر راسىمىنەن كەيىن الىس-جاقىننان جينالعان قوناقتار كەشەندى ارالاپ, سپورتتىق جابدىقتالۋىمەن تانىستى. تيميريازەۆ قازاق مەكتەپ-ينتەرناتىنىڭ, دميتريەۆكا, ينتەرناتسيونال جانە جارقىن ورتا مەكتەپتەرىنىڭ قۇراما كوماندالارىنىڭ باسكەتبولدان جانە قازاقشا كۇرەستەن كۇش سىناسۋىن تاماشالادى. – اۋىلدا 100-گە جۋىق وتباسى بار. ەكى قاباتتى مەكتەپتىڭ سپورت زالى, اۋىل جاستارىن ايتپاعان كۇننىڭ وزىندە, ءارتۇرلى سەكتسيالار وتكىزۋگە وقۋشىلارعا تارلىق ەتەتىن. ەندى شاحمات-دويبى, توعىزقۇمالاق, تەننيس سەكتسيالارىن وتكىزەتىن ارنايى كابينەتتەر بار. اسىلبەك بايلين جەتكىنشەكتەردى اپتاسىنا ەكى رەت قازاقشا كۇرەسكە باپتايتىن بولادى. جاتتىعۋ قۇرىلعىلارى قويىلعان بولمە قازىردىڭ وزىندە وقۋشىلاردىڭ سۇيىكتى ورنى سانالادى. كورشى ەلدى مەكەن جاستارىنىڭ وسىندا كەلىپ جاتتىعۋىنا, ءتۇرلى ساۋىق كەشتەرىن ۇيىمداستىرۋىنا اركەز جول اشىق, – دەيدى جارقىن ورتا مەكتەبى دەنە تاربيەسى ءپانىنىڭ مۇعالىمى ءادىلحان قاجىباەۆ. ءومىر ەسقالي, «ەگەمەن قازاقستان». سولتۇستىك قازاقستان وبلىسى, تيميريازەۆ اۋدانى. سۋرەتتى تۇسىرگەن امانگەلدى بەكمۇراتوۆ.