قوستانايدا سافلور مايى وندىرىلەتىن بولادى

ينۆەستورلار قوستاناي وڭىرىنە ءجيى اتباسىن بۇراتىن بولدى. جاقىندا وبلىس اكىمى نۇرالى سادۋاقاسوۆ پەن «كaz-ir اgro» قازاقستان-يران كومپانياسىنىڭ باس ديرەكتورى  حاميدرەزا زابيحوللاح اليناگيان اراسىنداعى اڭگىمە اۋىل شارۋاشىلىعىنا ينۆەستيتسيا تارتۋ جونىندە بولدى. بۇگىندە «Kaz-Ir Agro» جاۋاپكەرشىلىگى شەكتەۋلى سەرىكتەستىگى سافلور وسىرۋگە جانە ودان سافلور ما­يىن وڭدەپ, كۇنجارا وندىرۋدە ماماندانىپ, جاقسى تابىسقا جەتكەن. ءوندىرىس جامبىل وبلىسىندا ورنالاسقان. كاسىپورىن ايىنا 100 مىڭ ليتر سافلور مايىن وڭدەيدى, ال 2017 جىلى كومپانيا بۇل كورسەتكىشتى 500 مىڭ ليترگە جەتكىزۋدى مەجەلەپ وتىر. الىنعان ءونىم رەسەيگە, گرۋزياعا, يرانعا, امەريكا قۇراما شتاتتارىنا, قىتايعا ەكسپورتتالادى. كومپانيا جۇعىمدى ءارى ەمدىك قاسيەتى مول ازىقتى قوستاناي ءوڭىرىنىڭ قۇنارلى توپىراعىنا دا ەگۋدى ويلاس­تىرىپ, ينۆەستيتسيا قۇيۋعا تاۋەكەل ەتىپتى. بۇرىن ەگىن شارۋاشىلىعى نەگىزىنەن استىق وندىرۋگە باعىتتالعان جىتىقارا اۋدانىندا ەندى سافلور وسىمدىگى وسىرىلەتىن بولادى. بۇل ءۇشىن وسى اۋدانداعى ۆولگوگراد سەلوسى اۋماعى تاڭدالدى. جىتىقارا وبلىستاعى يندۋستريالىق ايماق قۇرىلىپ جاتقان اۋدان, سوندىقتان وسىندا سافلور ما­يىن وڭدەيتىن وندىرىستىك بازا دا سالىناتىن بولادى. الدىن الا ەسەپتەۋلەر بويىنشا, ماي وڭدەۋ زاۋىتىن سالۋ ءۇشىن 300 ميلليون تەڭگە قارجى قاجەت. ونىڭ 50 ميلليون تەڭگەسىن كومپانيا ءوزى سالادى, قالعان 250 ميلليون تەڭگە نەسيە قاراجاتى رەتىندە تارتىلماق. جوسپارلانعان جوبا بويىنشا زاۋىت تاۋلىگىنە 7 توننا ماي شىعارادى, كاسىپورىن جەرگىلىكتى تۇرعىندارعا 40 جۇمىس ورنىن ۇسىناتىن بولادى. جىتىقارا اۋدانى باسشىلارى مەن ماماندارى ينۆەستورمەن بىرلەسىپ جۇمىستى باستاپ تا كەتتى. ءنازيرا جارىمبەتوۆا, «ەگەمەن قازاقستان». قوستاناي.