بالقاش قالاسىنىڭ تۇرعىنى حالىق اياشبەكوۆ شيرەك عاسىر بويى ىشكى ىستەر ورگاندارىندا جەمىستى قىزمەت ەتىپ, ميليتسيا پودپولكوۆنيگى شەنىندە قۇرمەتتى ەڭبەك دەمالىسىنا شىققان ارداگەر ساقشى.
حالىق اعانىڭ كىر جۋىپ, كىندىك كەسكەن جەرى بالقاش كولىنىڭ جاعاسىنداعى سارىشاعان دەگەن ەلدى مەكەن. ۇلى وتان سوعىسى ارداگەرىنىڭ وتباسىندا دۇنيەگە كەلدى. اكەسى شايماعانبەت پەن اناسى سارا ۇزاق جىلدار تەمىرجول سالاسىندا ابىرويلى قىزمەت ەتكەن قاراپايىم جاندار.
كۇندەردىڭ ءبىر كۇنىندە ۇستىمە مۋندير كيىپ, ءتارتىپ ساقشىسى بولام-اۋ دەگەن وي حالىق اعانىڭ ءۇش ۇيىقتاسا تۇسىنە كىرمەگەن. اسكەري قىزمەتىن وتەپ كەلگەننەن كەيىن قارقارالىداعى مال دارىگەرلىك تەحنيكۋمدى ءبىتىرىپ, ماماندىعى بويىنشا ەڭبەك ەتۋگە قۇلشىنىپ جۇرگەن كەزى-تۇعىن. سول كەزدە ەكى يىعىنا ەكى كىسى مىنگەندەي الىپ دەنەلى جىگىتتى ىشكى ىستەر ورگاندارىنىڭ باسشىلارى كەزدەيسوق بايقاپ قالىپ, جۇمىسقا شاقىرعان. قىلمىسكەردىڭ نەشەمە تۇرىمەن اياماي كۇرەس جۇرگىزۋ ءۇشىن دە ءدال وسى حالىق اعاداي قارا كۇشكە مىعىم, ءتارتىبى تەمىردەي جىگىتتەر اۋاداي قاجەت بولاتىن.
ءسويتىپ, ويلاماعان جەردەن ىشكى ىستەر قىزمەتكەرى بولىپ شىعا كەلگەن. ەڭبەك جولىن سمۇكب (وبحسس) – سوتسياليستىك مەنشىكتى ۇرلاۋعا قارسى كۇرەس بولىمىندە باستادى. ءبولىم باستىعى ا.نۇرىشەۆ جانە ا.باينازاروۆ, م.كياكين سىندى قىزمەتكەرلەرمەن ءتىل تابىسىپ, تىزە قوسا ەڭبەك ەتتى. تالعات قاسەنوۆ سىندى ۇستازىنىڭ شاپاعاتىن دا كوپ كوردى.
حالىق شايماعانبەت ۇلىنىڭ تۋعان اعاسى قالقامان دا ىشكى ىستەر سالاسىندا ۇزاق جىلدار ەڭبەك ەتىپ, پودپولكوۆنيك شەنىندە زەينەت دەمالىسىنا شىققان جان. قىزمەتىن ادال اتقارىپتى. العىس پەن ماراپات قانا العان. ءتىپتى اعاسىنىڭ ارداق دەگەن قىزى دا الماتى قالاسىنىڭ جول پوليتسياسىندا جەمىستى قىزمەت ەتىپ, بۇل كۇندە قۇرمەتتى ەڭبەك دەمالىسىنا شىققان ەكەن.
حالىق اعانىڭ ۇيدەگى زايىبى بايان باكەنقىزى دا ىشكى ىستەر ورگاندارىنىڭ ارداگەرى. ەندى كەلىپ, «اكە كورگەن وق جونار» دەمەكشى, ەكەۋىنىڭ ۇلدارى دا اتا-انانىڭ جولىن قۋىپ, ءتارتىپ ساقشىسى بولدى. ەكى ۇلدىڭ ەكەۋى دە اكە مەن شەشەنىڭ ابىرويىنا كىر كەلتىرمەدى. قىزمەتتەرىن ءمىنسىز اتقارىپ ءجۇر. ۇلكەنى دارحان «ءمىنسىز قىزمەتى ءۇشىن» مەدالىنىڭ ءۇش بىردەي دارەجەسىمەن ماراپاتتالعان. قازىرگى ۋاقىتتا پوليتسيا مايورى شەنىندە. ال ەكىنشى ۇل داستان دا اعاسىنان قالىسپاي, ابىروي بيىگىنەن كورىنىپ كەلەدى. جاس كاپيتان «ءمىنسىز قىزمەتى ءۇشىن» مەدالىنىڭ ءىى, ءىىى دارەجەلەرىن ومىراۋىنا تاققان.
قازىرگى ۋاقىتتا ەكەۋى دە ءۇيلى-باراندى. اكە مەن شەشەگە نەمەرە سىيلاپ, بالقاشتاعى ارقا-جارقا بولىپ وتىرعان بازارلى وتباسىلاردىڭ ءبىرى.
اياشبەكوۆتەر وتباسى بيىل بالقاش قالاسىندا وتكەن «مەرەيلى وتباسى» بايقاۋىندا توپ جارىپ شىقتى. پوليتسيانىڭ ءمىنسىز قىزمەتكەرلەرى كورەرمەن قاۋىم مەن قازىلار القاسىن سان قىرلى ونەرىمەن جانە دە ومىرگە دەگەن شىنايى كوزقاراستارىمەن باۋراپ العان بولاتىن. ال قاراعاندىدا وتكەن «مەرەيلى وتباسىنىڭ» وبلىستىق سىنىندا تالاي وتباسىنىڭ اراسىنان وزىپ شىعىپ, جۇلدەلى ءۇشىنشى ورىندى جەڭىپ الدى.
«مۇنداي بايقاۋلاردى ۇيىمداستىرۋشىلارعا زور العىسىمدى ايتقىم كەلەدى. بىلە-بىلگەن ادامعا «مەرەيلى وتباسى» سىندى بايقاۋلار ەل ىشىندە وتباسى ۇعىمىنىڭ قادىرىن ارتتىرىپ, بەرەكە-بىرلىكتى كۇشەيتە تۇسەدى. ال وتباسى ايرانداي ۇيىسا, ەل قابىرعاسى دا بەكي تۇسەدى. سونان سوڭ مۇنداي سىناقتار كەيىنگى جاستارعا دا ۇلگى-ونەگە بولاتىن يگى شارا», دەيدى وتاعاسى حالىق اعا اياشبەكوۆ.
قايرات ءابىلدينوۆ,
«ەگەمەن قازاقستان».
قاراعاندى وبلىسى.
