«شيەلى-متس» ءوز جۇمىسىن باستادى

ەلباسى تاپسىرمالارىنا وراي, الەمدىك داعدارىستىڭ الدىن الۋ شارالارى ءار ايماقتا قۇمبىل جۇرگىزىلىپ كەلەدى. وبلىس اكىمى قىرىمبەك كوشەرباەۆ دەمالىس, مەرەكە كۇندەرى دەمەستەن ات ۇستىنەن تۇسپەي, شەتكى ايماق تۇرعىندارىمەن جۇزدەسۋدى جيىلەتتى. ءار اۋداندا تالاپقا ساي ءىس-قيمىلدىڭ ءتيىمدى جوسپارلانىپ, ءوز كەزەگىندە ىسكە اسىرىلۋىنا مۇرىندىق بولىپ كەلەدى. «بۇل ءان بۇرىنعىدان وزگەرەك» دەپ شاكىرىم ايتپاقشى, مەملەكەت باسشىسى الاڭداۋشىلىق ءبىلدىرىپ وتىرعان بۇل تاپسىرمانىڭ جۇگى اۋىرلاۋ, ارينە جاۋاپكەرشىلىگى دە كۇشتى ەكەندىگى انىق. ويتكەنى, مۇنىڭ ارتىندا حالىق تاعدىرى, «ماڭگىلىك ەل» يدەيا­سىن جۇزەگە اسىرۋشى مەملەكەتتىڭ بولاشاعى تۇر. ەلدىڭ ىنتىماعىن ۇيىستىرا ءتۇسىپ, ەكونوميكانى بەكەمدەۋ ارقىلى حالىقتىڭ الەۋمەتتىك جاعدايىن قۇلدىراتپاۋ ەرتەڭگى كۇننىڭ مۇنان دا شۋاقتى, مەملەكەتىمىزدىڭ قۋاتتى بولۋىنىڭ شارتتارى دەپ تۇسىنگەن ءجون بولەر. جۋىردا شيەلىدەگى 1,5 ملرد. تەڭگەگە سالىناتىن ۇرلەمەلى سۋ توسپاسىنىڭ قۇرلىسىمەن تانىسۋ بارىسىندا وبلىس اكىمى شيەلى اۋدانىنىڭ اكىمى قايراتبەك سارسەنباەۆقا تۇرعىنداردىڭ جاپپاي جۇمىسقا تارتىلىپ, ارقايسىسىنىڭ ءوز قابىلەتىنە قاراي ەڭبەك ەتۋىنە مۇمكىندىك جاساۋ جولىندا ىزدەنىستى قىزمەت ەتۋىن تاعى دا ءبىر شەگەلەي ايتقان بولاتىن. وسى باعىتتا جەرگىلىكتى اكىمدىك ءوز قابىلەت-قارىمىن تانىتا وتىرىپ, تىڭ سۇرلەۋدى تاپقان سەكىلدى. ول – كوپتەگەن شارۋا قوجالىقتارىنىڭ اگروتەحنيكالىق شارالاردى ءوز مەرزىمىندە تالاپقا ساي ورىنداي الۋىنا جاعداي جاساۋ, مامىلەگەرلىكپەن ءونىمدى ەڭبەك ەتۋىن ۇيىمداستىرۋ, ياعني ءىرىلى-ۋاقتى شارۋا قوجالىقتارىنىڭ ۋاقتىلى جەرىن جىرتىپ, تىرمالاپ, ءدانىن سەبۋگە قاجەتتى تەحنيكانى جۇمىلدىرۋ ارقىلى اۋىل ادامدارىنىڭ بويىندا سەنىمدىلىك مەن جىگەرلىلىكتى ۇستانىم ەتۋى. وسى ورايدا شيەلى اۋدانىندا ءبىرشاما ۋاقىتتان بەرى ايتىلعانىمەن جۇزەگە اسپاي كەلە جاتقان ورتالىقتاندىرىلعان مەحانيكالاندىرىلعان تەحنيكالىق ستانسا قۇرۋ ءىسى ەدى. مىنە, اۋدان اكىمىنىڭ بەلسەنە كىرىسۋى ناتيجەسىندە «شيەلى-متس» جشس قاجەتتى قۇجاتتارىن رەسىمدەپ, جۇمىسقا كىرىسىپ تە كەتتى. جاۋاپكەرشىلىگى شەكتەۋلى سەرىكتەستىگىمىزدە ازىرگە 29 دانا ءتۇرلى اۋىلشارۋاشىلىق تەحنيكاسى بار. ونىڭ ىشىندە ارينە, ك-701 تراكتورلارى, ICB- I5235 جاپوندىق ەكسكۆاتورى, كاماز, HOWA 22 اۋىر جۇك كولىكتەرى, جۇك تيەگىش تەحنيكالار, شاعىن ەگىس القاپتارىندا جۇمىس ىستەۋگە ءتيىمدى متز-82 دوڭعالاقتى تراكتورلارى, باسقا دا قۇرال-سايماندار بار, دەيدى جاڭادان قۇرىلعان قۇرىلىم ديرەكتورىنىڭ ورىنباسارى ايات ەسجانوۆ بىزبەن اڭگىمەسىندە. سونداي-اق, اۋىلشارۋاشىلىعى تەحنيكالارىنىڭ ەگىس القاپتارىندا جىلدام قوزعالىسىن ۇيىمداستىرۋعا وتە قاجەتتى تاسىمالداۋ تەحنيكاسىن ۋفا قالاسىنان الۋعا كەلىسىمگە كەلگەندىگىن بىلدىك. بيىلعى جىلى شيەلى اۋدانىندا 24 مىڭ گەكتاردىڭ ۇستىندە ءتۇرلى اۋىلشارۋاشىلىق داقىلدارىن ەگۋ جوس­پارلاندى. ونىڭ 9600 گەكتارى ءداندى داقىلدار بولسا, كۇرىش كولەمى 8500 گەكتاردان كەم بولماۋى ءتيىس. سول سەكىلدى مالازىقتىق داقىلدار, مايلى داقىلدار دا ەگىلەدى. ال كوكونىس, باقشا, كارتوپ داقىلدارىنىڭ جالپى كولەمى 2000 گەكتار بولماقشى. ارينە, بۇل ازىرگە جوبا, ءتۇرلى جاعدايلارعا بايلانىستى ازداعان وزگەرىستەردىڭ ورىن الۋى بەك مۇمكىن. دەگەنمەن, جىلدا تەحنيكا ىزدەپ سارسىلىپ, اركىمگە ءبىر جۇگىرەتىن مايدا شارۋا قوجالىقتارىنىڭ باسشىلارى اۋداندا متس قۇرىلۋىن قۋانا قۇپتاپ, مەيلىنشە كوپ ەگىن ەگۋگە, وعان اۋىلداستارىن جۇمىلدىرۋعا قۇلشىنىپ, الاقاندارىن ىسقىلاپ وتىر. يىركول اۋىلدىق وكرۋگىندەگى «جەرۇيىق», «ى.جاقاەۆ», «داۋرەن», «جانكەلدى» شارۋا قوجالىق­تارى, جۋانتوبە اۋىلدىق وكرۋگىندەگى «جاڭا العاباس», «باسقوجا», «بەكمۇرزاەۆ» شارۋاشىلىقتارى جىلدا بىزبەن ارىپتەس رەتىندە جاقسى ناتيجەگە قول جەتكىزىپ كەلگەن. سوندىقتان دا ولار العاشقى كەزەكتە ءبىزدىڭ قىزمەتىمىزدى پايدالانۋعا سەنىم ارتىپ, كەلىسىمشارتقا وتىرىپ تا ۇلگەردى. كوكتەم جىلت ەتىسىمەن اتالمىش شارۋاشىلىقتاردىڭ جەر دايىنداۋ جۇمىسىنا كىرىسەمىز. جالپى, بيىل 3 مىڭ گەكتاردان استام جەرگە تەحنيكالىق قىزمەت كورسەتەمىز دەپ وتىرمىز. اۋدان اكىمىنىڭ قولداۋىمەن ءوز اۋقىمىمىزدى كەڭەيتە بەرەرىمىز انىق, دەيدى ا.ەسجانوۆ. نۇرماحان ەلتاي. قىزىلوردا وبلىسى, شيەلى اۋدانى.