ورتاق ناتيجە ءۇشىن تەر توگەمىز

جاقىندا الەكساندر كورەشكوۆ «بارىس» حوككەي كلۋبىنىڭ پرەزيدەنتى بولىپ تاعايىندالدى. ول – قازاقستانعا عانا ەمەس, شەتەلگە دە تانىمال ءارى بەدەلدى سپورتشى. ا.كورەشكوۆ قازاقستان قۇراماسىنىڭ ساپىندا الەم چەمپيوناتتارى مەن وليمپيا ويىندارىنا دا قاتىستى. سوڭعى جىلدارى قازاقستان حوككەي فەدەراتسياسىندا وتاندىق كوماندالاردى حالىقارالىق جارىستارعا قاتىسۋعا ازىرلەدى. قازاقستاننىڭ ەرەسەكتەر مەن جاسوسپىرىمدەر قۇراما كوماندالارىنىڭ باس مەنەدجەرى بولىپ تابىلادى. – الەكساندر گەننادەۆيچ, ءسىزدى جاڭا قىزمەتىڭىزبەن – «بارىس» حوككەي كلۋبىنىڭ پرەزيدەنتى بولىپ تاعايىندالۋىڭىزبەن قۇت­تىق­تايمىن! – راحمەت. بۇل كلۋبتى باسقارۋ اسا زور جاۋاپكەرشىلىك جۇكتەيدى. مەن قامقورشىلار كەڭەسىنە وسىنداي سەنىم بىلدىرگەنى ءۇشىن العىسىمدى ايتامىن جانە ولاردىڭ سەنىمىن اقتاۋعا بار كۇشىمدى سالامىن. – ءسىزدىڭ قازاقستان قۇراما كومان­­داسىنىڭ باس مەنەدجەرى ءمىن­دەتىڭىز سول كۇيىندە قالا ما؟ – ءيا. الداعى الەم چەمپيوناتىنا دايىندىق ءبىرازدان بەرى ءجۇرىپ جاتىر. 4 ساۋىردەن باستاپ, حوككەيشىلەر وقۋ جاتتىعۋلارىنا كىرىسەدى. قازىر ءبىزدىڭ الدىمىزدا كەڭەيتىلگەن قۇراما جاساقتاۋ تاپسىرماسى تۇر. باپكەرلەر شتابىنىڭ نەگىزگى قۇراماعا كىمدەردى قابىلداۋ كەرەكتىگىن ناقتى تاڭداي الاتىن مۇمكىندىگى بولۋى كەرەك. ءبىزدىڭ جوسپارىمىزشا, قۇراماعا «بارىس» حوككەيشىلەرىنەن باسقا, وسكەمەننەن بەس ادام, پاۆلوداردان ءتورت ويىنشى, قاراعاندىدان بەس, رۋدنىيدان ءبىر ويىنشى قوسىلاتىن سىڭايلى. – سوڭعى كەزدەرى باق-تاردا «با­رىسپەن» جاڭا كەلىسىم­شارت­تاردىڭ جاسالماۋى­نا بايلانىستى بارلىق قازاق­ستاندىق حوككەي­شىلەر قۇراما كوماندا ساپى­نا قوسىلا المايدى دەگەن قاۋە­سەت تارادى. بۇل جونىندە نە دەيسىز؟ – حوككەيشىلەردىڭ كەلىسىم­شارت­تارى ءساۋىردىڭ 30-ىنا دەيىن جارامدى. سوندىقتان دا, «بارىس» الدىمەن قازاقستان قۇراما كومانداسىنا كىرەتىن ويىنشىلاردىڭ جايىن قارايدى. وسىعان بايلانىستى, مەن قازاقستاندىق ويىنشىلارمەن كەلىسىمشارتتى الەم چەمپيوناتىنان كەيىن جاساۋ كەرەك دەگەن پىكىردى ۇستانامىن. ال چەمپيونات ءساۋىردىڭ 25-ىندە اياقتالادى. ونىڭ سىرتىندا, ويىنشى ەلىمىزدىڭ حوككەي قۇراماسىندا ويناعاندى ۇلكەن دارەجە دەپ ساناپ, ساۋدالاسپاۋى ءتيىس. – ءبىرىنشى باسشىنىڭ اۋىسۋىنا بايلانىستى كلۋبتا تۇبەگەيلى وزگەرىستەر بولا ما؟ – تۇبەگەيلى وزگەرىستەر بولمايدى. اۋەلى مەن «بارىس» كلۋبىنىڭ ۇجىمىمەن تانىسامىن. كىمنىڭ ءارى قاراي جۇمىس جاساعىسى كەلەتىنىن انىقتايمىن. ماعان كلۋبتىڭ جۇمىسىن بارىنشا ناتيجەلى ەتىپ ۇيىمداستىرۋ مەن كوممەرتسيالىق مۇمكىندىگىن كوتەرۋ تاپسىرىلدى. وعان قوسا جاڭا ماۋسىمدا كلۋب 12 مىڭ ادامدىق جاڭا مۇز ايدىنىندا ونەر كورسەتەتىن بولادى. – جانكۇيەرلەر قازاقستان قۇراما كومانداسى ساپىنا كىر­مەيتىن ەكى حوككەيشىنىڭ جايىنا الاڭدايدى. ولار – نايدجەل دوۋس پەن يان لاتسو. بۇل ەكەۋى تۋرالى نە ايتا الاسىز؟ – تاعى دا قايتالاپ ايتامىن, ماعان بارلىق جۇمىستى قابىلداپ الۋعا ۋاقىت كەرەك. ازىرگە بۇل ماسەلەنىڭ باسى اشىق. بارلىعى مەنىڭ عانا پىكىرىمە بايلانىس­تى ەمەس. ۇلتتىق سپورتتىق جوبا رەتىندە «بارىس» تۋرالى شەشىم القالى تۇردە, اشىق شەشىلۋى ءتيىس. باپكەرلىك شتابتىڭ پىكىرى ەسكەرىلەدى, ارينە. – ءسىز ەندى قازاقستان قۇراما­سى­نىڭ باس مەنەدجەرى رەتىندە ۇلتتىق كوماندانىڭ باس باپكەرى اندرەي نازا­روۆپەن بىرگە جۇمىس جاسايسىز. ول تۋرالى پىكىرىڭىز قانداي؟ – اندرەي نازاروۆ – وتە تاجىريبەلى مامان. مەنىڭ ويىمشا, بارلىعىمىز ناتيجەگە جەتۋ ءۇشىن تاباندى تۇردە بىرلەسىپ تەر توگەتىن بولامىز. – جانكۇيەرلەر قازاقستان قۇرا­ماسىن جاس ويىنشىلارمەن تولىقتىرۋ تۋرالى كوپ ايتادى. بۇعان نە دەيسىز؟ – قازاقستان قۇراما كومانداسى الدىنا وتە جوعارى مەجە قويىپ وتىر. ول –تەك جەڭىسكە جەتۋ. ارينە, كوماندانى جاستارمەن تولىقتىرۋ ماسەلەسى كۇن تارتىبىندە تۇر. بىراق بۇل بىردەن جۇزەگە اسىرىلاتىن وڭاي شارۋا ەمەس. ەڭ باستىسى – بىزدە رەزەرۆ بار. – اڭگىمەڭىزگە راحمەت. جۇمى­سىڭىزعا تابىس تىلەيمىن. اڭگىمەلەسكەن داستان كەنجالين, «ەگەمەن قازاقستان».