قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا حالىقارالىق ەڭبەك ۇيىمىنىڭ شىعىس ەۋروپا مەن ورتالىق ازيا ەلدەرىندەگى وڭىرلىك بيۋروسىنىڭ ديرەكتورى حاينتس كوللەرمەن كەزدەستى. گ.ابدىقالىقوۆا حالىقارالىق ەڭبەك ۇيىمىنىڭ (حەۇ) بۇۇ جۇيەسىندەگى ەڭبەك قاتىناستارىن رەتتەۋ ماسەلەلەرى ءجونىندەگى حالىقارالىق بەدەلدى ۇيىم رەتىندەگى ءرولىن اتاپ ءوتتى. مەملەكەتتىك حاتشى قازاقستاننىڭ بۇل حالىقارالىق ۇيىممەن ىنتىماقتاستىققا ايرىقشا ءمان بەرەتىنىن جانە حەۇ-نىڭ نەگىزگى ءىس-شارالارىنا جىل سايىن بەلسەندى تۇردە قاتىساتىنىن ايتتى. سونىڭ ىشىندە بيىلعى ماۋسىمدا وتەتىن حەۇ باس كونفەرەنتسياسى 104-سەسسياسىنىڭ تاقىرىبى ماڭىزدى ەكەنىنە ەرەكشە توقتالدى.
سونىمەن قاتار, تاراپتار ەڭبەك قاتىناستارى سالاسىنداعى قازاقستان مەن حەۇ ىنتىماقتاستىعىنىڭ كەلەشەگىن تالقىلادى. مەملەكەتتىك حاتشى مەملەكەت باسشىسى ۇسىنعان بەس ينستيتۋتتىق رەفورما مەملەكەتتىك ينستيتۋتتاردى ساپالى جاڭارتۋعا, ەكونوميكالىق باعدارلامالاردىڭ تيىمدىلىگىن ارتتىرۋعا, مەملەكەتتىك قىزمەتتەر ساپاسىن جاقسارتۋعا جانە كەڭ اۋقىمدى ينفراقۇرىلىمدىق جوبالاردى جۇزەگە اسىرۋعا باعىتتالعانىن اتاپ كورسەتتى. گ.ابدىقالىقوۆا «نۇرلى جول» مەملەكەتتىك باعدارلاماسى ەكونوميكانىڭ ورنىقتى ءوسۋىن قامتاماسىز ەتۋ, بۇگىنگى جۇمىس ورىندارىن ساقتاۋ جانە سىرتقى نارىقتاعى احۋالدىڭ ناشارلاۋى جاعدايىندا جاڭالارىن اشۋ ءۇشىن ەرەكشە مانگە يە ەكەنىن ايتتى.
اتالعان مىندەتتەردى ىسكە اسىرۋ ەل ەكونوميكاسىن جانداندىرادى, يكەمدىلىكتى ارتتىرادى جانە حالىقتىڭ جۇمىسپەن قامتىلۋىن بارىنشا قامتاماسىز ەتە وتىرىپ, كاسىپكەرلىك پروبلەمالارىنىڭ شەشىلۋىنە مۇمكىندىك تۋعىزادى. كەزدەسۋ بارىسىندا, سونىمەن بىرگە, قازاقستاندا جاستاردى جۇمىسپەن قامتاماسىز ەتۋ ءۇشىن ۇلتتىق ءىس-قيمىل جوسپارىن قابىلداۋ, سونداي-اق, ەڭبەكتى قورعاۋ جانە جۇمىس كۇشىنىڭ يكەمدىلىگى جونىندە زەرتتەۋ ءجۇرگىزۋدىڭ ۇلتتىق باعدارىن ازىرلەۋ جونىندە حەۇ-نىڭ تەحنيكالىق قولداۋ كورسەتۋى ماسەلەلەرى قارالدى. كەزدەسۋ اياسىندا جۋرناليستەرگە سۇحبات بەرگەن حالىقارالىق ەڭبەك ۇيىمىنىڭ شىعىس ەۋروپا جانە ورتالىق ازيا ەلدەرىندەگى وڭىرلىك بيۋروسىنىڭ ديرەكتورى ح.كوللەر بيىلعى ماۋسىمدا وتەتىن حەۇ باس كونفەرەنتسياسىنىڭ 104-سەسسياسىندا ۇيىمعا مۇشە 185 ەلدىڭ وكىلدەرى قاتىسىپ, وندا بولاشاقتا ەڭبەك نارىعىندا قالىپتاساتىن جاعدايلار, ەڭبەكپەن قامتۋ ماسەلەلەرى قوزعالاتىنىن جەتكىزدى. «VIII استانا ەكونوميكالىق فورۋمىندا كوتەرىلەتىن ماسەلەلەردىڭ ءبىرى – حالىقتى ەڭبەكپەن قامتۋ ساياساتى. بۇل – حالىقارالىق قوعامداستىقتىڭ كۇن تارتىبىندە تۇرعان وزەكتى ماسەلە. قازىرگى تاڭدا الەم ەلدەرىنىڭ باسىم كوپشىلىگىندە جۇمىسسىزدىق ۋشىعىپ تۇر. ماسەلەن, الەمدە 200 ملن. ادام جۇمىسسىز. بۇل وتكەن جىلعى كورسەتكىشپەن سالىستىرعاندا 30 ملن. ادامعا كوپ. دەمەك, بۇل ماسەلە ءبىز ءۇشىن ايرىقشا ماڭىزدى, سول سەبەپتى دە ول استانا ەكونوميكالىق فورۋمىنىڭ الاڭىندا جان-جاقتى تالقىلانادى», – دەدى ح. كوللەر.
ءلايلا ەدىلقىزى, «ەگەمەن قازاقستان».
