جۇمىسسىزدىق دەڭگەيى ازايىپ كەلەدى

اگلومەراتسيالىق ايماقتاعى ارشالى اۋدانىندا جۇمىسسىزدىق دەڭگەيى ازايىپ كەلەدى. وتكەن جىلدىڭ قورىتىندىسى بويىنشا اۋداندا جۇمىسپەن قامتىلعانداردىڭ كورسەتكىشى 90 پايىزدى قۇراپ, 2013 جىلمەن سالىستىرعاندا 3,8 پايىزعا ارتتى. ال بيىلعى جىلدىڭ باسىنان بەرى وڭىردە بىردە-ءبىر ادام جۇمىسسىز رەتىندە رەسمي تىركەلمەگەن. وتكەن جىلى 412 ادام جۇمىسقا ورنالاستىرۋ جونىندە كومەك سۇراپ جۇگىنگەن ەدى, دەيدى اۋداندىق جۇمىسپەن قامتۋ ءبولىمىنىڭ باسشىسى گۇلزادا جەكەباەۆا. ەسەسىنە 415 جاڭا جۇمىس ورنىن قۇرا بىلدىك (270-ءى كاسىپكەرلىك, 132-ءسى اۋىل شارۋشىلىعى سالاسىندا). حالىقتى ەڭبەكپەن قامتۋدا «جۇمىسپەن قامتۋدىڭ جول كارتاسى-2020» مەملەكەتتىك باعدارلاماسىنىڭ ءرولى زور. اتالعان باعدارلاما بويىنشا بارلىعى 103 جاڭا جۇمىس ورنى اشىلدى. مەملەكەتتىك باعدارلامانى دۇرىس ۇيلەستىرە ءبىلۋدىڭ ارقاسىندا جۇرتشىلىقتى جۇمىسپەن قامتۋ بەلسەندى سيپات الۋدا. ماسەلەن, باعدارلامانىڭ ءبىرىنشى باعىتى بو­يىنشا 35,3 ميلليون تەڭگەگە جاستار ورتالىعى عيماراتىنا كۇردەلى جوندەۋ جۇمىستارى جۇرگىزىلدى. ەكىنشى باعىتى بويىنشا 19 ادام ءوز كاسىبىن اشۋ ءۇشىن بارلىعى 53 ميلليون تەڭگەنىڭ شاعىن نەسيەسىنە قول جەتكىزدى. وسىنىڭ ناتيجەسىندە 32 جاڭا جۇمىس ورنى اشىلدى. شاعىن نەسيە العانداردىڭ اراسىندا 3-توپتاعى مۇگەدەك ازامات بار ەكەن. ال ءۇشىنشى باعىت بويىنشا 46 ادام الەۋمەتتىك جۇمىس ورىندارىنا جىبەرىلسە, 24 ادام جاستار تاجىريبەسىنەن ءوتتى. سونداي-اق, 7 ادام قايتا دايارلىقتان ءوتىپ, 3 ادام كاسىبي ءبىلىمىن شىڭداعان. قازىرگى تاڭدا اۋداندا 214 كاسىپورىن جۇمىس ىستەپ تۇر. ولاردىڭ بارلىعىمەن ۇجىمدىق كەلىسىمشارت جاسالعان. باقبەرگەن امالبەك,  «ەگەمەن قازاقستان». اقمولا وبلىسى, ارشالى اۋدانى.