التىن ارتقان پويىز

پولشادا ءۇشىنشى رەيحتىڭ قازىناسى تابىلدى بۇل ەكىنشى دۇنيەجۇزىلىك سوعىس اياقتالعالى بەرى جۇرت اۋزىندا ايتىلىپ جۇرگەن اڭىزعا بەرگىسىز اڭگىمە ەدى. سۇراپىل جىلداردىڭ سوڭىندا, 1945 جىلى كەڭەس اسكەرلەرى كەلىپ جەتەر كەزدە پولشانىڭ ۆروتسلاۆ قالاسىنا جاقىن ماڭدا ناتسيستەردىڭ قازىنا تيەگەن ۆاگونى كەنەت جوعالىپ كەتەدى. سول كەزدە تاراعان قاۋەسەتكە سەنسەك, ءۇشىنشى رەيح اسكەرلەرى 1944 جىلى ىشىنە التىن, كۇمىس قۇيمالارى مەن ءارتۇرلى ونەر تۋىندىلارى تيەلگەن «قازىنا ەشالونىن» بۋداپەشتتەن گەرمانياعا جونەلتپەك بولادى. قىمبات باعالى زاتتار وسىندا قولعا تۇسكەن ۆەنگەر ەۆرەيلەرى گەتتوسىنان جيناپ الىنعان ەكەن. بىراق سوستاۆ ءوزى كوزدەگەن جەرىنە جەتە المايدى. جولدا ونى الدىمەن امەريكا ارمياسىنىڭ جاۋىنگەرلەرى توقتاتادى. كەيىن اقش جاعى جۇرگىزگەن تەكسەرۋ جۇمىستارى اتالعان قازىنانىڭ ءبىر بولىگىن سول اسكەرلەردىڭ الىپ قويعانىن انىقتايدى. سودان كەيىن قىزىل ارميانىڭ جاقىنداپ قالۋىنا بايلانىستى نەمىستەر قازىنانى 150 مەترلىك بروندى پويىزبەن الىپ كەتپەك بولعان دەگەن دە اڭىز تارايدى. ونىڭ بۇدان ارعى جەلىسى ۆاگون تومەنگى سيلەزيا تاۋلارىن تەسىپ وتەتىن توننەلدىڭ اۋزىنا دەيىن بارعانىمەن, ونىڭ ارعى بەتكە شىققانىن ەشكىم كورمەگەنىن العا تارتاتىن ەدى. ەندى, مىنە, بىرنەشە كۇننەن بەرى پولشادا تۇراتىن ءبىرى – پولياك, ەكىنشىسى نەمىس ۇلتتارىنىڭ وكىلدەرى بولىپ كەلەتىن ەكى ەر كىسى وزدەرىنىڭ سول «التىن ۆاگوندى» تاپقاندارى تۋرالى جارياعا جار سالعاندارى بەلگىلى بولىپ وتىر. وسىعان بايلانىستى ۆالبجيحا اۋدانىنىڭ بيلىگى قازىر مالىمدەمەنىڭ قانشالىقتى شىندىققا جاناسىمدى ەكەنىن تەكسەرىپ جاتىر. ماسەلە مىنادا, قازىنا تاپقاندارىن جەتكىزگەن كىسىلەر سول جۇكتىڭ 10 پايىزدىق مولشەرى وزدەرىنە جازىلمايىنشا, ونىڭ قايدا جاتقانىن ايتۋدان باس تارتىپ وتىر. بۇل ءۇشىن ولار الدىمەن سول ماڭداعى زاڭگەرلەر كەڭسەسىنە بارىپ, كەڭەس سۇراعان بولىپ شىقتى. وسى كۇندەرى زاڭگەرلەر, ارميا جانە ءورت سوندىرۋشىلەر بريگاداسى وسى ماسەلەمەن اينالىسىپ جاتقانعا ۇقسايدى. ال جەرگىلىكتى سايتتار ايتىلىپ وتىرعان اڭگىمەنىڭ وسىندا ەرتەدەن تاراعان التىن تيەلگەن ۆاگوننىڭ كششونج زاموگى اۋدانىندا جوعالىپ كەتكەنى تۋرالى اڭىزعا ۇقسايتىنىن جازۋدا. ايتا كەتەتىن جايت, بۇعان دەيىنگى جىلدار بويى ءجۇر­گىزىلگەن قازىنا ىزدەۋ جۇمىستارى ءوزىنىڭ وڭ ناتيجەسىن بەرمەگەن بولاتىن. ساكەن ق ۇلىمباي.