ۇندىستەردىڭ ەتنومۋزىكالىق توبى

قىزىلجار وڭىرىنە كەلىپ قىزىقتى كونتسەرت قويدى پەتروپاۆلدىقتار وڭتۇستىك امەريكانى مەكەن ەتكەن ءۇندىس تايپالارىنىڭ ءبىرى كيچۋا ەكەنىن ەكۆادور رەسپۋبليكاسىنان كەلگەن «قانداس باۋىرلار» ەتنومۋزىكالىق توبىنىڭ مۇشەلەرىنەن ەستىپ ءبىلدى. ونىڭ قۇرامىندا كوپتەن بەرى ونەر كورسەتىپ كەلە جاتقان البەرتو ماراليس چيسا جانە ەرنەستو اگيلار ەسىمدى تالانتتى انشىلەر جۇرگەن جەرلەرىندە كيچۋا ۇندىستەرىنىڭ مۋزىكاسىن تالماي ناسيحاتتاپ, ونەردە شەكارا بولمايتىنىن ۇقتىرۋدى داستۇرگە اينالدىرىپتى. قىزىلجار وڭىرىندە دە ۇلتتىق اسپاپتاردا ناشىنە كەلتىرە ويناپ, تامىلجىتا ءان شىرقاپ, كورەرمەندەرىن ريزا ەتتى. – شىعارماشىلىق توپتى «قانداس باۋىرلار» دەپ اتاۋىمىزدا ۇلكەن ءمان بار. ونداعى ماقسات–اتا-بابا مەكەنىنەن ەرىكسىز قۋىلىپ, رەزەرۆاتسياعا ۇشىراعان ۇندىستەردىڭ سالت-ءداستۇرىن, ادەت-عۇرپىن, ءتىلىن, مادەنيەتىن پاش ەتۋ, دەيدى انشىلەر. ەكۆادور رەسپۋبليكاسىنىڭ وتاۆالو استاناسىنان شىعىپ, الەمدى شارلاپ كەلە جاتقان كوڭىلدى جىگىتتەر وبلىس ورتالىعىندا بىرنەشە كۇن ايالداپ, قىزىقتى كونتسەرتتىك باعدارلامالار ۇسىندى. ۇلتتىق كيىمدەرى بويلارىنا جاراسىپ, سامپونيا, پانا, كەنا سەكىلدى ۇلتتىق اسپاپتاردا قۇيقىلجىتا وينادى. كۇندەلىكتى ناپاقالارى مەن جول شىعىندارىن وتەۋ ءۇشىن وزدەرىمەن الا كەلگەن ەكزوتيكالىق بۇيىمدار مەن كۇيتاباقتاردى ساۋدالادى. كوبىنە «مارحابات», «راحمەت» سوزدەرىن ءجيى قولدانىپ, ىستىق ىقىلاستارى مەن ريزالىق سەزىمدەرىن ءبىلدىرىپ جاتتى. انشىلەر قوشتاساردا قازاق­ستاننىڭ, تۇرعىنداردىڭ قاتتى ۇناعانىن, ءدامدى ەتىپ ازىرلەگەن تاعامدارىن سۇيسىنە جەگەندەرىن قايتا-قايتا ايتىپ, العىستارىن جاۋدىردى. ءومىر ەسقالي, «ەگەمەن قازاقستان». سولتۇستىك قازاقستان وبلىسى.