قوستاناي. 21 مامىر. وبلىستاعى توتەنشە جاعدايلار دەپارتامەنتى ءباسپاسوز قىزمەتىنىڭ حابارلاۋىنشا, امانگەلدى اۋدانىنداعى «التىن دالا» مەملەكەتتىك تابيعي رەزەرۆاتىندا قىرىلعان كيىكتىڭ سانى 27 681-گە جەتتى. بۇل تۋرالى egemen.kz ءتىلشىسى حابارلادى.
قىرىلعان كيىكتىڭ سانى كۇن سايىن مىڭداپ ءوسىپ بارادى. مامىردىڭ 20-كۇنى وقيعا ورنىندا جۇرگەن ماماندار ولگەن كيىكتىڭ سانى 20 مىڭعا جۋىقتاعانىن ايتسا, 21 مامىر كۇنى ونىڭ سانى 27 مىڭنان اسىپ وتىر. ولەكسەلەردى جويۋ ءۇشىن امانكەلدى اۋدانىنىڭ كيىك قىرىلىپ جاتقان توڭىرەگىنە تەحنيكالار, جۇمىسشىلار دا كوپتەپ جۇمىلدىرىلۋدا. قازىر وندا 534 ادام, 93 تەحنيكا جويۋ جۇمىستارىن جۇرگىزۋدە. تەك 20 مامىر كۇنى عانا 8 360 كيىكتىڭ ولەكسەسى كومىلدى.
ەسكە سالا كەتسەك, امانگەلدى اۋدانىنىڭ وڭتۇستىگىندەگى «التىن دالا» رەزەۆاتىندا كيىكتەردىڭ ولە باستىعىنى تۋرالى 11 مامىر كۇنى دابىل تۇسكەن بولاتىن. العاشقىدا ولاردىڭ كوتەرەمدىگىنەن, پاستەرەللەز دەگەن بولجامدار ايتىلدى. بۇگىنگە دەيىن توپىراقتان, سۋدان, بيولوگيالىق ماتەريالداردان سىناما العان رەسپۋبليكالىق لابوراتوريادان تابيعي اپاتتىڭ سەبەبى تۋرالى قورىتىندى شەشىم كەلگەن جوق.
ءنازيرا جارىمبەتوۆا.
دەرەك, سۋرەت: egemen.kz
