امان تولەەۆ بيلىككە نارازىلىق رەتىندە پارتيادان شىعادى

استانا. 3 ءساۋىر. رەسەيدىڭ كەمەروۆو وبلىسىنىڭ گۋبەرناتورى امان تولەەۆ كرەملگە قىر كورسەتۋ رەتىندە ءوزىنىڭ «ەدينايا روسسيا» پارتياسىنان شىعاتىنىن مالىمدەدى. بۇل تۋرالى «رودنوي نوۆوكۋزنەتسك» سايتى حابارلادى. پورتال مۇنى «ەدينايا روسسيا» پارتياسى قالالىق بولىمشەسىندەگى مانبەسىنە سۇيەنىپ جەتكىزگەن. پارتيا وكىلى جۋرناليستەرگە امان تولەەۆتىڭ بۇل ساياسي پارتيامەن بارلىق قارىم-قاتىناسىن ءۇزىلدى-كەسىلدى ءۇزۋ ويى بار ەكەنىن ايتقان. كەمەروۆو وبلىسىنىڭ 4 ماۋرىتتەن بەرگى ۇزدىكسىز باسشىسى 2003 جىلدان بەرى بيلىكتىڭ «ەدينايا روسسيا» پارتياسىنىڭ مۇشەسى بولىپ كەلەدى. وسى ۋاقىتتىڭ ونە بويىندا ول بارلىق دەڭگەيدەگى سايلاۋلاردا پارتيانىڭ ايماقتىق ءتىزىمىنىڭ ۇدايى باسىندا تۇرعان. «بىراق تولەەۆتىڭ «ەدرا»-نىڭ كەيبىر فۋنكتسيونەرلەرىمەن قارىم-قاتىناسى تاياۋ ارادا بۇزىلدى, - دەپ جازادى «رودنوي نوۆوكۋزنەتسك» سايتى. – گۋبەرناتوردىڭ «ەدينايا روسسيامەن» اراسىنىڭ ناشارلاپ كەتۋىنىڭ ىقتيمال سەبەبى پارتيا باس كەڭەسىنىڭ حاتشىسى, نوۆوكۋزنەتسكىلىك سەرگەي نەۆەروۆتىڭ وركوكىرەكتىگى بولعان سياقتى. ۇزاق جىلدار بويى تاپ سول تۇلعا كۋزباسس گۋبەرنايتورى مەن «ەدينايا روسسيا» اراسىنداعى بايلانىسشى بۋىن بولىپ كەلىپ ەدى. تولەەۆتىڭ ارقاسىندا «ەدرا»-نىڭ ايماقتاعى رەيتينگىسى دە جوعارى بولىپ تۇردى. ال گۋبەرناتور مۇنى دۋماداعى ورىنتاقتى ءوز اينالاسىنداعى ادامدارمەن تولىقتىرىپ وتىرۋعا پايدالاندى. ينتەرنەت-پورتالدىڭ مالىمەتى بويىنشا, قازىر نەۆەروۆ الدا بولاتىن ايماق باسشىسى سايلاۋىنا تۇتاس ءبىر «نوۆوكۋزنەتسكىلىك بلوكتىڭ» قاتىسۋىن كرەمل ارقىلى شەشۋ جولىندا بەلسەنە جۇمىس جاساپ ءجۇر. بۇل بلوكقا ونىڭ ءوزى دە كىرەدى. تىزىمدە بۇدان بولەك, ءبىر كەزدەرى «يۋجكۋزباسسۋگولدە» جانە وبلىستىق اكىمشىلىكتە ىستەگەن, قازىر رف پرەزيدەنتىنىڭ كەڭەسشىسى بولىپ جۇرگەن انتون كوبياكوۆ پەن سەرگەي كۋزنەتسوۆ بار. سايتتىڭ مالىمەتىنە قاراعاندا, امان تولەەۆ «ەدينايا روسسيانىڭ» ايماقتىق بولىمشەسىنىڭ قارىمتا سوققى بەرۋ ءۇشىن دە ونىڭ قاتارىنان شىققالى وتىر. وسى ورايدا «رودنوي نوۆوكۋزنەتسك» پورتالى: «ەندى كۋزباسستىڭ كوپتەگەن ساياساتكەرلەرى مەن دەپۋتتارى ودان ۇلگى الىپ, «ەدينايا روسسيادان» گۋبەرناتورلىق» سلۋجۋ كۋزباسسۋ» بلوگىنا وتەدى دەپ كۇتىلىپ وتىر, - دەپ جازادى سايت تاعى. – بۇل ساياسي قادام «ەدينايا روسسيانىڭ» كەمەروۆو وبلىسىنداعى بولىمشەسىن جويىپ قانا قويمايدى, ونىڭ باسشىسى نەۆەروۆتىڭ پارتيا فۋنكتسيونەرى رەتىندەگى بەدەلىنىڭ بىت-شىتىن شىعارادى. سونىمەن بىرگە, ول كرەملگە ايماق ەليتاسى تولەەۆتىڭ توڭىرەگىنە توپتاسقانىن تانىتىپ بەرەدى. ال بيىلعى قىركۇيەك ايىندا وتەتىن گۋبەرناتور سايلاۋى قارساڭىندا مۇنىڭ ماڭىزى زور», - دەپ «ەدينايا روسسيا» قالالىق بولىمشەسى وكىلىنىڭ سوزىنەن دايەكتەمە كەلتىرەدى. كۋزباسس گۋبەرناتورى پارتيانىڭ جەرگىلىكتى بولىمشەسى قۇرامىنان شىعاتىن شەشىم قابىلداپ وتىرعانىن وبلىستاعى باسقا سايتتار دا جازىپ جاتىر. «تولەەۆ جيىن شاقىرىپ, ءوزىنىڭ نارازىلىعىن انىق ءبىلدىردى. ول پارتيانىڭ قازىر ءوزىنىڭ مۇددەسىن قورعاماي وتىرعانىنا رازى ەمەس. قازىر فەدەرالدى باق-تاردا تولەەۆتىڭ گۋبەرناتور سايلاۋىنا قاتىسۋى ماسەلەسى تالقىلانۋدا. ونى ءوزى ۇزاق جىلدار ايماقتاعى بارلىق دەڭگەيدەگى سايلاۋلاردا وتە جوعارى پروتسەنت الدىرىپ بەرىپ كەلگەن «ەدينايا روسسيانىڭ» وسى تۇستا ءالىپتىڭ ارتىن باعۋ پوزيتسياسىن ۇستانىپ وتىرعانى ىزالاندىرادى, - دەپ جازادى Sيو42. – جيىننىڭ سوڭىندا ول پارتيانىڭ ءوزى ءۇشىن قۇرامىنان شىققاننان باسقا ەشتەڭە قالدىرماعانداي تىرلىك ەتىپ جۇرگەنىن اشىقتان-اشىق ايتتى». الايدا, امان تولەەۆتىڭ پارتيا قاتارىنان شىعاتىنى جونىندە وبلىستىق اكىمشىلىكتىڭ ءباسپاسوز قىزمەتىنەن ازىرگە بىردە-ءبىر رەت مالىمدەمە بەرىلگەن ەمەس. مۇرات ايتقوجا. مانبە: رودنوي نوۆوكۋزنەتسك. سۋرەت: ۆكونتاكتە.