«استانا» فۋتبول كلۋبىنا قۇتتىقتاۋ جولدادى

كەشە ەلباسى نۇرسۇلتان نازارباەۆ «استانا» فۋتبول كلۋبىنىڭ ۋەفا چەمپيوندار ليگاسى توپتىق كەزەڭىنە وتۋىنە بايلانىستى قۇتتىقتاۋ جولدادى, دەپ حابارلادى پرەزيدەنتتىڭ ءباسپاسوز قىزمەتى. بۇل ءبىر شىن مانىندە دە قازاقستان فۋتبولى ءۇشىن ناعىز اق تۇيەنىڭ قارنى جارىلعان اق­جارىلقاپ كۇن بولدى. بۇرناعى كۇنى تۇندە كيپر­دىڭ ورتالىعى – نيكوسيادا جەرگىلىكتى اپوەل كلۋبىمەن چەمپيوندار ليگاسى ىرىكتەۋ كەزەڭى پلەي-وفف ويىندارىنىڭ قا­رىمتا كەزدەسۋىن وتكىزگەن «استانا» كومان­داسى 1:1 ەسەبىمەن تەڭ ءتۇسىپ, ەكى ماتچتىڭ قو­رى­­تىندىسى بويىنشا قۇرلىقتاعى ەڭ بەدەلدى كۋبوك جارىستارىنىڭ توپتىق كە­زەڭىنە جولداما الدى. بۇعان ءبىزدىڭ جەرلەس­تەرىمىزدىڭ سوڭعى ويىندى تەڭ اياقتاي ءبىلۋ­لەرىمەن بىرگە, بۇدان ءبىر اپتا بۇرىن اتالعان قارسىلاسىن ءوز الاڭىندا 1:0 ەتىپ جەڭىپ كەلگەنى جول اشىپ بەردى. ءسويتىپ, «استانا» فۋتبول كلۋبى ءوزىنىڭ قىسقا تاريحىندا عانا ەمەس, جالپى قازاق­ستان كوماندالارى اراسىندا ءبىرىنشى بولىپ ەۋ­روپا كۋبوكتارىنىڭ توپتىق كەزەڭىندە ويناي­تىن العاشقى جاساق اتاندى. كوماندانى وسىناۋ وراسان زور تابىسىمەن ەلباسى نۇر­سۇلتان نازارباەۆتىڭ ءوزى ارنايى قۇتتىق­تادى. شىن جۇرەكتەن ايتىلعان جانە لايىق­تى وقيعاعا بايلانىستى جەتكىزىلگەن سول قۇت­تىقتاۋعا ءبىز دە قوسىلامىز. قازىر استانالىقتاردىڭ وسى جا­ۋاپتى ويىندا ايبىندارى اسىپ تۇسەتىنىن ىشتەي بىلدىك دەسەك, بالكي, مۇنىمىز بولارى بولىپ قويعاننان كەيىن ايتىلا سالعان ارزانقولداۋ ساۋەگەيلىك بولىپ كورىنەر, بىراق, شىنىندا دا, نەگە ەكەنى بەلگىسىز, ويىندى ونلاين-جەلىدەن كورىپ وتىرعان كەزىمىزدە ونىڭ قورىتىندىسى ءوزىمىز ءۇشىن قولايلى بولاتىنىنا دەگەن ءبىر سەنىم بويىمىزدان ءۇيىرى­لىپ شىقپاي قويىپ ەدى. ءتىپتى, ەكىنشى تايمنىڭ بەل ورتاسىنا قاراي الاڭ يەلەرى كۇتپەگەن جەردەن كەرەمەت گول سوعىپ كەتىپ, ءبىزدىڭ قاقپانىڭ باعانىن قاقىراتىپ وتكەندە دە سول سەزىمنەن اجىراي قويماعانبىز. بۇعان, شاماسى, الاڭداعى ۋاقىتتارىنىڭ باسىم بولىگىن قورعانىستا وتكىزگەندەرىمەن, جىگىت­تەرىمىزدىڭ جەمە-جەمگە كەلگەندە, قارعا بويلى قارسىلاستارىنان تومەن تۇسە قويماعاندارى, ارا-تۇرا جاساعان قارسى جورىقتارى كوپ جاعدايدا قاۋىپتىرەك بولىپ شىعىپ جاتقاندارى اسەر ەتسە كەرەك. نە دەگەندە دە, استانالىقتاردىڭ سىرت الاڭداعى بۇل ويىنىنان كوڭىلگە كۇدىك الا قوياتىنداي ەشتە­ڭە تاپپاعانبىز. كەرەك دەسەڭىز, مۇنىڭ ءوزى ولاردىڭ وزىندىك ءبىر تاكتيكالىق ويىن جۇيەسى ىسپەتتى بولىپ كورىنگەن. ولاي دەيتىنىمىز, مۇنىڭ الدىندا استانادا وتكەن ءبىرىنشى كەزدەسۋدە دە ءبىزدىڭ جىگىت­تەر كەرەكتى كەزىندە عانا قاۋىرت شابۋىلدارعا كوشىپ, قال­عان ۋاقىتتىڭ كوبىندە دوپتى قارسىلاستارىنا بەرىپ قويعان بولاتىن. «استانا» ءوزىنىڭ وسى ويىن ورنەگىنەن ءتىپتى ءبىرىنشى اينالىمدا-اق ادەمى ناتيجە شىعارۋعا شاق قالعان. بۇدان بۇرىن ءفيننىڭ حيك كومانداسىمەن وتكەن ماتچتا الىس­تان وتە ادەمى گول سوعىپ, كورەرمەن قاۋىمنىڭ كوزايىمىنا اينالعان دميتري شومكو مۇندا دا سول ەرلىگىن قايتالاي سالا جازدادى. الايدا, بۇل جولى وتكەندەگىدەي اۋەلەتىپ ەمەس, بەلدەۋ بويلاتىپ ۇرعان ونىڭ دوبىن كيپرلىكتەر قاقپاشىسى بوي ۆاتەرمان سوڭعى مەزەتتە قايتارىپ ۇلگەرىپ, داربازاسىن دابىلداپ كەلگەن گولدان ساقتاپ قالدى. مۇنىڭ جانىندا ويىننىڭ ونە بويىندا ءبىزدىڭ جاققا قاراي جانۇشىرا ۇمتىلۋمەن بولعان اپوەل فۋتبولشىلارىنىڭ مۇلتتەرى اسا ءبىر كوپ بولا قويماعان سياقتى. ولار مۇنداي ماۋرىتتەردىڭ ءبىر-ەكەۋىن ماتچتىڭ ەكىنشى تايمىندا جىبەرىپ العانى بولماسا, تۇتاستاي العاندا, تاپاپ تاستايتىنداي ارتىقشىلىققا قول جەتكىزە العان جوق. بۇل, ارينە, ويىن بارىسىندا باسەكەلەستەرىنىڭ الىس-جاقىننان ۇرعان, بۇرىشتامادان جىبەرگەن دوپتارىن ءالسىن-ءالسىن قاعىپ الىپ, قاۋىپتىڭ بەتىن سول بويدا قايتارىپ تۇرعان قاقپاشىمىز نەناد ەريچتىڭ ەرلىككە پارا-پار ەڭبەگىن استە جوققا شىعارۋ ەمەس. كەزدەسۋدە سونداي-اق استانالىقتار ساپىنان سوعىلعان گولدىڭ ۇيىم­داستىرۋشىسى باۋىرجان جولشيەۆ پەن ونىڭ بەرگەن پاسىن اشىق قاقپاعا سۇڭگىتە سالعان نەمانيا ماكسيموۆيچ, سونداي-اق جوعارىدا ايتىلعان دميتري شومكو مەن گەورگي جۋكوۆ وزدەرىن وتە جاقسى قىرلارىنان تانىتتى. ءبىزدىڭ جىگىتتەر ءتىپتى ماتچتىڭ اياقتالۋىنا ساناۋلى مينۋتتار قالعان كەزدە, دالىرەگى, تورەشىنىڭ قوسقان ۋاقىتىنىڭ ەڭ اقىرعى ساتتەرىندە كيپرلىكتەردىڭ قاقپا­سىنا تاعى ءبىر گول سوعىپ, جەڭىپ تە كەتە جازدادى. ماتچتىڭ وزدە­رى ءۇشىن ۇتىلىسقا بەت الدىرىپ بارا جاتقانىن بىلگەن الاڭ يەلەرى سوڭعى مينۋتتاردا ءجۇدا ۆا-بانككە بارعانداي قالىپ تانىتىپ, العا تايلى-تاياعى قالماي, تۇگەل ۇمتىلعان. سونداي كەزدەر­دە استانالىقتار كەمىندە ءۇش رەت وتە جاقسى قارسى شابۋىل ۇيىمداستىرا ءبىلدى. بۇلاردىڭ سوڭعىسى سونىڭ الدىندا الاڭعا شىققان الەكسەي ششەتكيننىڭ وراشولاقتىعى ارقا­سىندا عانا ناقتى گولعا اينالماي قالعانداي كورىندى. كيپرلىكتەر قاقپاسى ما­ڭىنا جاقىن جەردە دوپ العان ول مۇنى الدىڭعى جاقتا جالعىز قورعاۋشىنىڭ جانىندا جۇرگەن ءۇش كوماندالاسىنىڭ بىرىنە تەز اسىرا قويعاندا, ءبارى باسقاشا بولار ما ەدى, كىم ءبىلسىن! دەگەنمەن, قاناعات! ءبىز ءۇشىن وسىنىڭ ءوزى جەڭىس. «استانا» وسىلاي سىرت الاڭدا جەڭىسكە بەرگىسىز تەڭ ويىنعا قول جەتكىزدى. الاڭداعى لوندوننان شاقىرىلعان اربيتر مارتين اتكينسون ماتچتىڭ سوڭعى ىسقىرىعىن بەرگەن كەزدە, وسىنىڭ ءبارى ءبىزدىڭ جۇرەگىمىزگە قۋانىش بولىپ قۇيىلدى, شاتتىق بولىپ تاسىدى. بۇل راسىندا دا ناعىز ۇلكەن جەڭىس ەدى. قازاق فۋتبولى وسىلاي جىل ساناپ ءبىر قادام بولسا, العا اتتاپ, بىرتىندەپ ىلگەرى جىلجىپ كەلەدى. بىلتىر قاراعاندى «شاحتەرىنىڭ» چەمپيوندار ليگاسى ىرىكتەۋ تۋرني­رىندە جاقسى ونەر كورسەتىپ, وسىنداي پلەي-وفف كەزەڭىندە ەكى ويىننىڭ قورىتىندىسىمەن شوتلانديانىڭ «سەلتيگىنە» جول بەرىپ العانىنىڭ ءوزىن ەداۋىر جەتىستىك ساناعانبىز. كەشە تۇندە چەمپيوندار لي­گاسىنىڭ توپتىق كەزەڭىنە شىققان 32 كوماندانىڭ اراسىندا جەرەبە تاستاۋ ءراسىمى بولىپ ءوتتى. ول «استانانىڭ» ەندى كىمدەرمەن وينايتىنىن انىقتاپ بەرەدى. بۇعان قوساتىنىمىز, 15-16 قىركۇيەكتە ويىندارى باستالاتىن بۇل كەزەڭ 8-9 جەلتوقساندا اياقتالادى. سوعان دەيىن كوماندالار 6 تۋردىڭ كەزدەسۋلەرىن وتكىزىپ, ءوز توبىنداعى قارسىلاستارىمەن ەكى رەتتەن ويناپ ۇلگەرەدى. ءبىز استانالىقتارعا ءتۋرنيردىڭ بۇل تۇسىندا دا ءساتتى ويناۋدى تىلەيمىز. سوسىنعى ايتارىمىز: كەشە تۇندە ەۋروپا ليگاسىنىڭ پلەي-وفف كەزەڭىنە شىققان الماتىنىڭ «قايراتى» ءوز الاڭىندا فرانتسۋز­دىڭ «بوردوسىن» قابىلدادى. قا­رىمتا ماتچ رەتىندە وينالعان بۇل كەزدەسۋدە قايراتتىقتار قار­سىلاستارىن ەكى دوپ ايىرىمىمەن ۇتسا, توپتىق كەزەڭگە شىعادى. كوماندالاردىڭ بۇدان ءبىر اپتا بۇرىن بوردودا وتكەن ويىنىندا الاڭ يەلەرى 1:0 ەتىپ ۇتقان ەدى. سەرىك ءپىرنازار, «ەگەمەن قازاقستان».