مەكسيكا شىعاناعى مۇناي تابانىنداعى ءورت ءسوندىرىلدى

استانا. 3 ءساۋىر. مەكسيكا شىعاناعىندا ورنالاسقان Abkatun Permanente پلاتفورماسىنداعى ءورت ءسوندىرىلدى. بۇل تۋرالى Lenta.Ru حابارلادى. مۇناي كەنىشىندەگى ەكى كۇنگە سوزىلعان ءورتتىڭ سوندىرىلگەنى تۋرالى اقپاردى پلاتفورما يەسى – Pemex كومپانياسى Twitter الەۋمەتتىك جەلىسىندە مالىمدەگەن. حابارلامادا سونداي-اق ينتەرنەتتە جاريالاعان پلاتفورمانىڭ قيراپ قالعانىن كورسەتەتىن سۋرەتتىڭ شىندىققا جاناسپايتىنى اتاپ وتىلگەن. Pemex كومپانياسىنىڭ وكىلى Abkatun Permanente پلاتفورماسىندا ورىن العان ينتسيدەنتكە بايلانىستى باسقى نىسانداردا مۇناي ءوندىرۋ اۋقىمىن ارتتىرۋعا تۋرا كەلەتىنىن العا تارتادى. Reuters حابارلاعانداي, ءورتتىڭ سالدارىنان مۇندا 4 ادام قازا تاۋىپ, 45 ادام جاراقات العان. پلاتفورمادان 302 قىزمەتشى اكەتىلگەن. ءورتتىڭ شىعۋ سەبەبى ءالى بەلگىسىز. ول Abkatun Permanente اۋماعىندا 1 ءساۋىر كۇنى باستالعان. سوڭعى جىلدارى مەكسيكانىڭ Pemex مەملەكەتتىك كومپانياسىنىڭ نىساندارىندا بىرنەشە رەت ءارتۇرلى ينتسيدەنتتەر ورىن الدى. 2013 جىلى ونىڭ شتاب-پاتەرىندە جارىلىس بولىپ, كەم دەگەندە 37 ادام قازا تاپتى. 2012 جىلعى قىركۇيەكتە Pemex زاۋىتتارىنىڭ بىرىندە لاپ ەتكەن ورتتە 26 ادام اجال قۇشتى. مۇرات ايتقوجا. مانبە, فوتو: Lenta.Ru.