وقۋ جىلىنىڭ سوڭىندا «استانا» ۋنيۆەرسيتەتىندە شۋ شىقتى

استانا. 21 مامىر. استاناداعى «استانا» ۋنيۆەرسيتەتىندە وقۋ جىلىنىڭ سوڭىندا شۋ شىقتى. اتالعان ءبىلىم ورداسىندا وقۋ اقىسى 2 ەسەگە قىمباتتاپ, ستۋدەنتتەردىڭ الەۋمەتتىك جاعدايىنا كەرى اسەرىن تيگىزدى. وسى كەلەڭسىزدىككە بايلانىستى ۋنيۆەرسيتەتتىڭ 15 ستۋدەنتى وقۋ ورنىنىڭ باسشىلىعىنان بولعان جايتتىڭ سەبەبىن ءتۇسىندىرۋدى سۇرادى. الايدا, رەكتورات ناقتى جاۋاپ بەرگەن جوق. بۇل تۋرلى informburo.kz حابارلادى. وسىعان وراي بيىل وقۋىن اياقتايتىن ستۋدەنتتەر «ديپلومدارىمىز قولىمىزعا تيمەي قالادى» دەپ قاۋىپتەنۋدە. ال ماسەلەنىڭ اق-قاراسىن انىقتاماق بولعان ولاردى كۇزەت قىزمەتى ۋنيۆەرسيتەت عيماراتىنا جىبەرگەن جوق. «وقۋ جىلىنىڭ سوڭىندا, ءدال مەملەكەتتىك ەمتيحان الدىندا بىزگە وقۋ اقىسىنىڭ قىمباتتاعانىن حابارلادى. وسىعان دەيىنگى 3 كۋرس بويى 150-170 مىڭ تەڭگەدەن تولەپ كەلدىك. ال ەندى 450 مىڭ تەڭگە تالاپ ەتۋدە. ەگەر بۇل سومانى تولەمەسەك, ءبىزدى مەملەكەتتىك ەمتيحاندارعا جىبەرمەيدى», – دەيدى قازاق ءتىلى جانە ادەبيەتى فاكۋلتەتىنىڭ ستۋدەنتى ادىلەت جۇمادىلاەۆ. ادىلەتتىڭ كۋرستاسى ءاليا ايتۋاردىڭ ايتۋىنشا, ءوز قۇقىقتارىن تالاپ ەتكەن ستۋدەنتتەر وقۋ ورنىنىڭ رەكتورىمەن كەزدەسە الماي ءجۇر. بۇل ماسەلە جونىندە ول: «بىزگە نە ءۇشىن قوسىمشا اقشا تولەۋىمىز كەرەك ەكەنىن ەشكىم ناقتى تۇسىندىرمەدى. كەلىسىمشارت بويىنشا وقۋ اقىسى وزگەرگەن جوق», – دەپ, نارازىلىعىن ءبىلدىردى. ءوز كەزەگىندە ۋنيۆەرسيتەت رەكتورىنىڭ مىندەتىن اتقارۋشى ورىك يمانعوجينا ەشقانداي وقۋ اقىسىنىڭ وسپەگەنىن ايتتى. الايدا, لەزدە بۇل سوزىنەن اينىعان ول مۇنداي قادامعا باقىلاۋ ورگاندارىنىڭ تاپسىرماسى بويىنشا بارعانىن جانە بارلىعى مەملەكەتتىك ستاندارتتارعا ساي ەكەنىن جەتكىزدى. دەگەنمەن, ناقتى قانداي ستاندارتتار ەكەنىن اتاپ بەرە المادى. «بۇگىنگى تاڭدا باعانى ەشكىم وسىرگەن جوق. بىزگە وقۋ اقىسىن مەملەكەتتىك تالاپتارعا ساي دەڭگەيگە جەتكىزۋ تۋرالى پروكۋراتۋرا ورگاندارىنان تاپسىرما كەلدى. ۇكىمەتتىڭ بەكىتكەن مەملەكەتتىك نورماتيۆتەرى بار. بۇل تالاپتارعا ءبىزدىڭ وقۋ ورنى ساي كەلمەيدى», – دەگەن يمانعوجينا ناقتى ەش نارسەنى ءتۇسىندىرىپ بەرە المادى. سونىمەن قاتار, ول: «ستۋدەنتتەرىمىزدىڭ باسىم بولىگى اۋىلدان كەلگەندەر. وقۋ ورنىنداعى بارلىق ستۋدەنتتەرگە جەڭىلدىك قاراستىرىلادى. سونداي-اق, ءبىز مۇعالىمدەرگە ارنالعان 6 قاباتتى جاتاقحانا سالدىق», – دەپ, وقۋ اقىسىنىڭ قىمباتتاۋ سەبەبىن تۇسىندىرمەك بولدى. باسشىلىقتىڭ مۇنداي جاۋابى سوڭعى كۋرس ستۋدەنتتەرىن قاناعاتتاندىرعان جوق. ولار بۇل جايتتى ادىلەتسىز دەپ سانايدى. ەلامان قوڭىر. دەرەك, سۋرەت: informburo.kz.