قوستانايداعى مەكتەپكە عافۋ قايىربەكوۆتىڭ ەسىمى بەرىلدى

قوستاناي. 21 مامىر. قازاقستان ۇكىمەتىنىڭ قاۋلىسىمەن قوستاناي قالاسىنداعى №9 ورتا مەكتەپكە كورنەكتى اقىن, جازۋشى عافۋ قايىربەكوۆتىڭ ەسىمى بەرىلدى. بۇل تۋرالى egemen.kz ءتىلشىسى حابارلادى. قوستاناي قالاسىندا ۇزىن, باستى كوشەلەردىڭ ءبىرى دە قازاق پوەزياسىنداعى ءدۇلدۇل اقىن عافۋ قايىربەكوۆتىڭ ەسىمىمەن اتالادى. وسى كوشەنىڭ بويىندا ورنالاسقان №9 قازاق ورتا مەكتەبىن دە اقىننىڭ جارى بادەش حامزينا مەن جەرگىلىكتى زيالى قاۋىم وكىلدەرى اقىننىڭ اتىنا سۇراپ جۇرگەن بولاتىن. عافۋ ءوزى: «قايدا جۇرسەم, سەنى ەسىمنەن تاستاماي, ءوتىپ كەتتى جاقسى جىل مەن جاس تالاي. مەنىڭ اتىم ساعىنىش بوپ وزگەردى, ساعىنىشقا قولىڭدى بەر, قوستاناي!» دەپ جىرلاعان تۋعان جەرىندە كوشە مەن مەكتەپ تۇتاس انسامبل قۇرىپ تۇرعانىن قالاعان ەدى. ءبىراز كۇتتىرگەن جىلداردان كەيىن اقىن جىرلارىنا ءتانتى حالقىنىڭ تىلەۋى ورىندالدى. اقىننىڭ جارى بادەش حامزينا: «تۋعان جەرى ازاماتىن, اقىنىن سىيلاپ, ءبىلىم وشاعىنا عافەكەڭنىڭ اتىن بەرگەنىنە ريزامىن. مەكتەپ وقۋشىلارى اتاسىنىڭ اتىنا كىر كەلتىرمەي, ءبىلىمدى ازامات بولسىن», دەدى.  سالتاناتتى ءىس-شارادا قوستاناي قالاسى اكىمىنىڭ ورىنباسارى م.قاليەۆ, اقىندار ا.شاياحمەت, س.وسپانوۆ, ن.مۇقاتوۆ, جازۋشى-ساتيريك ع.احمەتچين, ءتىل جاناشىرى ق.ورمانوۆ, جانكەلدين اۋدانى اكىمىنىڭ ەكونوميكا جونىندەگى ورىنباسارى د.سەرىك ۇلى, №9 ورتا مەكتەپ ديرەكتورى ءا.مولداحالىقوۆ جانە وبلىستىق تىلدەردى دامىتۋ باسقارماسىنىڭ وكىلدەرى قاتىسىپ, جىلى لەبىزدەرىن ءبىلدىردى. وسى شاراعا وراي مەكتەپتە اقىنعا ارنالعان ادەبي كەش ءوتتى. مەكتەپتە بادەش اپايدىڭ باستاماسىمەن جانە ونىڭ ىزدەنۋىمەن, كومەگىمەن عافۋدىڭ مۋزەيى جاساقتالعان ەدى. كەشكە قاتىسۋشىلار وسى مۋزەيدى ارالاپ كوردى, ءبىلىم وشاعىنىڭ ونەرلى بالالارى قويعان كونتسەرتتى تاماشالادى. ءنازيرا جارىمبەتوۆا. دەرەك, سۋرەت: egemen.kz