اقتوبەدە ەلباسى كوپسالالى اۋرۋحانانى ارالاپ كوردى

اقتوبە. 2 ءساۋىر. بۇگىن اقتوبە جەرىنە جۇمىس ساپارىمەن كەلگەن قازاقستان پرەزيدەنتى نۇرسۇلتان نازارباەۆ باعدارلاماعا ساي وبلىستىق كوپسالالى اۋرۋحانانى ارالاپ كوردى. بۇل تۋرالى egemen.kz ءتىلشىسى حابارلادى. اۋرۋحانا اۋماعىندا ەلباسىنا وبلىستاعى دەنساۋلىق ساقتاۋ سالاسىنىڭ دامۋ بارىسى تۋرالى ەسەپ بەرىلدى. وسى جەردە مەملەكەت باسشىسى ەمدەۋ ورنىنىڭ جۇمىسىمەن تانىسىپ, ۇجىم مۇشەلەرىمەن جانە وبلىستىڭ مەديتسينا قىزمەتكەرلەرىمەن جۇزدەستى. ءوز كەزەگىندە نۇرسۇلتان نازارباەۆ اۋرۋحانانىڭ جاڭا عيماراتتا ورنالاسقانىن, زاماناۋي قۇرالدارمەن جابدىقتالعانىن اتاپ ءوتتى. «كوپ نارسە ەندى سىزدەرگە بايلانىستى. ەگەر ءوز جۇمىستارىڭىزدى ساپالى اتقارىپ, قولدا بار جابدىقتاردىڭ مۇمكىندىگىن تولىق پايدالاناتىن بولساڭىزدار, حالىق دەنساۋلىعىن جاقسارتۋعا زور ۇلەس قوساسىزدار. ءبىزدىڭ ەلىمىزدە دەنساۋلىق ساقتاۋ سالاسىنا زور كوڭىل ءبولىنىپ وتىر, قازاقستان جان باسىنا شاققاندا بۇل سالاعا بولىنەتىن قاراجات كولەمى جونىنەن دامىعان ەلدەر دەڭگەيىنە تاياپ كەلەدى. رەسپۋبليكادا سوڭعى 20 جىلدا مىڭعا جۋىق دەنساۋلىق ساقتاۋ نىسانى سالىندى. حالىق وتاندىق مەديتسيناعا سەنىم ارتا باستادى, ال كورشى ەلدەردىڭ ازاماتتارى ەمدەلۋ ءۇشىن بىزگە كەلەتىن بولدى», – دەدى مەملەكەت باسشىسى. سوڭىندا نۇرسۇلتان نازارباەۆ مەديتسينا قىزمەتكەرلەرىنە تابىس جانە باق-بەرەكە تىلەدى. اۋرۋحانا قىزمەتكەرلەرى قازاقستان پرەزيدەنتىنە رەسپۋبليكادا دەنساۋلىق ساقتاۋ سالاسىن دامىتۋعا, بىلىكتىلىكتى ارتتىرۋعا جانە تاجىريبە الماسۋعا قاجەتتى جاعداي جاسالعانى ءۇشىن العىس ايتتى. مەملەكەت باسشىسى جاقسى باعا بەرگەن 320 توسەكتىك اۋرۋحانا «100 مەكتەپ جانە 100 اۋرۋحانا» مەملەكەتتىك باعدارلاماسى اياسىندا سالىنعان. مەكەمە حالىقارالىق ستاندارتقا ساي بوي كوتەرىپ, زاماناۋي دياگنوستيكا جانە ەمدەۋ قۇرالدارىمەن جابدىقتالعان. اۋرۋحانا قۇرىلىمىنداعى 29 بولىمشەنىڭ ەندوكرينولوگيا, وتولارينگولوگيا, ۋرولوگيا, قان تامىرلارى حيرۋرگياسى, گيپەربوريالىق وكسيگەناتسيا دەپ اتالاتىن 5-ەۋى وبلىستاعى بىردەن-ءبىر ورتالىق بولىپ تابىلادى. قازىرگى تاڭدا مۇندا 104 دارىگەر (سونىڭ 55-ءى بىلىكتىلىك ساناتتارىنا يە), 283 ورتا مەديتسينالىق ءبىلىمى بار ماماندار جۇمىس ىستەيدى. ساتىبالدى ساۋىرباەۆ. مانبە: egemen.kz.