پرەزيدەنت «ۇلتتىق عىلىمي كارديوحيرۋرگيا ورتالىعى» اق توراعاسىن قابىلدادى

استانا. 27 تامىز. ەلباسى «ۇلتتىق عىلىمي كارديوحيرۋرگيا ورتالىعى» اق باسقارماسىنىڭ توراعاسى يۋري پيانى قابىلدادى. بۇل تۋرالى akorda.kz حابارلادى. كەزدەسۋ بارىسىندا قازاقستاندا مەديتسينانى, سونىڭ ىشىندە كارديوحيرۋرگيالىق جانە كارديولوگيالىق قىزمەتتى دامىتۋ پەرسپەكتيۆالارى تالقىلاندى. قازاقستان پرەزيدەنتى كارديوحيرۋرگيالىق وتا جاساتۋعا مۇقتاج ادامداردىڭ سانى از ۋاقىت بۇرىن عانا 10-15 مىڭ ادامعا جەتكەنىن ايتتى. «ءبىز بۇل ادامدارعا جاردەم بەرە المادىق. مۇمكىندىگى بارلار شەتەلگە شىقتى. الايدا, ءبارىنىڭ شاماسى كەلمەدى, ادامداردان ايرىلىپ جاتتىق. ال بۇگىندە ەلوردادا جانە قازاقستاننىڭ كوپتەگەن وبلىستارىندا جۇرەككە اشىق وتالار جاسالادى. ولاردىڭ قاتارىندا ۇلتتىق عىلىمي كارديوحيرۋرگيا ورتالىعى ءبىرىنشى ورىندى يەلەنەدى, ول قازىردىڭ وزىندە تمد ەلدەرىندە جانە الەمنىڭ باسقا دا مەملەكەتتەرىندە تانىمال بولا باستادى. ورتالىقتا جاسالعان وپەراتسيالار سونداي-اق قازاقستاننىڭ ۇلكەن يميدجدىك جوباسىنا دا اينالدى, بىراق, ەڭ باستىسى – كوپتەگەن ادامداردىڭ ءومىرىن ساقتاپ قالىپ جاتىرمىز», – دەدى مەملەكەت باسشىسى. يۋ.پيا جەكە ءوزىنىڭ جانە بۇكىل ۇجىمنىڭ اتىنان نۇرسۇلتان نازارباەۆقا كارديوحيرۋرگيا ورتالىعىن قۇرعانى ءۇشىن العىس ايتتى. «ءسىز ونى اشقان كەزدە مۇنى ساراي دەپ باعالادىڭىز. شىنىندا دا سولاي, مۇندا ناعىز عاجايىپتى جاساۋعا بولادى. بۇگىندە ءبىزدىڭ ورتالىقتى قازاقستان عانا ەمەس, بۇكىل الەم بىلەدى. مىسالى, بىرەر كۇندە بىزگە ەۋروپا ەلدەرىنەن 30-عا جۋىق مامان كەلىپ, تاجىريبەمىزدى كورەدى. قازاقستاندا جۇرگىزىلىپ جاتقان ساياساتتىڭ ارقاسىندا بۇگىنگى تاڭدا تەك ءبىزدىڭ رەسپۋبليكادا عانا قولدانىلاتىن وتا ءادىسىن ەنگىزە الدىق. سونىڭ ناتيجەسىندە ءبىز ەۋروپالىق ماماندار كەلىپ تانىساتىنداي تاجىريبەگە يە بولدىق», – دەدى «ۇلتتىق عىلىمي كارديوحيرۋرگيا ورتالىعى» اق باسقارماسىنىڭ توراعاسى. ايدار ورىسباەۆ. دەرەك, سۋرەت: akorda.kz.