ەل شەكاراسىن زاڭسىز كەسىپ وتپەك بولعان ەكى ازامات قولعا ءتۇستى

استانا. 2 ءساۋىر. «قاقپاق» زاستاۆاسىنىڭ شەكاراشىلارى نارياد بارىسىندا وزبەكستاننان قازاقستانعا زاڭسىز وتپەك بولعان ەكى ازاماتتى قۇرىقتادى. بۇل تۋرالى newtaimes.kz حابارلادى. شەكاراشىلار اينالانى بارلاۋ بارىسىندا ەكى جىگىتتى كورىپ, ولارعا جاقىنداعان ساتتە كۇدىكتىلەر قاشا جونەلگەن. قىراعى ساربازدار ءبىرىن تەز قولعا تۇسىرسە, ەكىنشىسى سۋىق قارۋمەن ولارعا قارسىلىق تانىتقان. دەگەنمەن, اعا سەرجانت ن.ايداروۆ جەكپە-جەك ءتاسىلىن قولدانۋ ارقىلى كۇدىكتىنى قۇرىقتاعان. قولعا تۇسكەن ازاماتتاردىڭ اعايىندى ەكەنى انىقتالدى. ءبىرى 30 جاستاعى قازاقستاننىڭ ازاماتى بولسا, ەكىنشىسى 35 جاستاعى وزبەكستان ەلىنىڭ تۋماسى. تەكسەرۋ بارىسىندا ولاردىڭ بۇرىن ۇرلىق پەن زاڭسىز قارۋ ساقتاعانى ءۇشىن سوتتى بولعانى بەلگىلى بولدى. ايتا كەتەيىك, كۇدىكتىلەردىڭ ۇستىنەن قازاقستان شەكاراسىن زاڭسىز كەسىپ وتپەك بولعانى جانە قولعا ءتۇسىرۋ بارىسىندا شەكاراشىلارعا قارسىلىق كورسەتكەنى ءۇشىن قىلمىستىق ءىس قوزعالادى. ال «قاقپاق» زاستاۆاسىنىڭ قىراعىلىق تانىتقان قۇرامى ماراپاتقا ۇسىنىلدى. تالعات رايىمبەك. دەرەك, سۋرەت: newtaimes.kz.