استانادا حالىقارالىق ايەلدەر فورۋمى ءوتتى

استانا. 21 مامىر. استانادا VIII استانا ەكونوميكالىق فورۋمى اياسىندا «نۇرلى جول – جاڭا مۇمكىندىكتەر» اتتى حالىقارالىق ايەلدەر فورۋمى ءوتتى. وعان مەملەكەتتىك حاتشى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى گۇلشارا ابدىقالىقوۆا قاتىستى. بۇل تۋرالى akorda.kz حابارلادى. سونداي-اق, فورۋم جۇمىسىنا پارلامەنت ءماجىلىسىنىڭ دەپۋتاتى م.قازبەكوۆا, اۋعانستان پارلامەنتىنىڭ دەپۋتاتى ش.باراكزاي, بۇۇ دامۋ باعدارلاماسىنىڭ اكىمشىسى ح.كلارك, بەيبىتشىلىك بويىنشا نوبەل سىيلىعىنىڭ 2011 جىلعى لاۋرەاتى ت.كارمان, سونداي-اق, تاياۋ جانە الىس شەت ەلدەردىڭ ساياسي, ەكونوميكالىق, بيزنەس-توپتارى وكىلدەرى قاتىستى. فورۋمدى اشقان گۇلشارا ابدىقالىقوۆا گەندەرلىك تەڭدىكتى ىلگەرلەتۋدەگى جانە ايەلدەردىڭ ىسكەرلىك بەلسەندىلىگىن ارتتىرۋداعى ەلىمىزدىڭ جەتىستىكتەرىن اتاپ ءوتتى. مەملەكەتتىك حاتشى ينستيتۋتسيونالدىق تاسىلدەردى جەتىلدىرۋدىڭ, ايەلدەر كاسىپكەرلىگىن ودان ءارى دامىتۋعا ينۆەستيتسيالار مەن يننوۆاتسيالار تارتۋدىڭ جانە ايەلدەردى وقىتۋ مەن ولاردىڭ بىلىكتىلىگىن ارتتىرۋدىڭ زاماناۋي ينفراقۇرىلىمىن جاساۋ قاجەتتىلىگىنە نازار اۋداردى. كوميسسيا ءتورايىمى قازىرگى كەزەڭدە ينفراقۇرىلىمدىق دامۋدىڭ 2015-2019 جىلدارعا ارنالعان «نۇرلى جول» مەملەكەتتىك باعدارلاماسىنداعى جوبالاردى ىسكە اسىرۋ ىسىنە ايەلدەردىڭ كوبىرەك تارتىلۋىن قامتاماسىز ەتۋ ماڭىزدى ەكەنىن ايتتى. سونىمەن بىرگە, فورۋمدا الەمدىك جاڭا ترەندتەر جاعدايىندا ايەلدەردىڭ ەكونوميكالىق بەلسەندىلىگىن ودان ءارى ارتتىرۋعا قاتىستى سىن-قاتەرلەر مەن مۇمكىندىكتەر تالقىلاندى. فورۋمدى قازاقستاننىڭ ىسكەر ايەلدەر قاۋىمداستىعى «نۇرلى جول – بولاشاققا باستار جول» جولداۋىن ىسكە اسىرۋ اياسىندا ۇيىمداستىردى. جۇمىس قورىتىندىسى بويىنشا ايەلدەردىڭ ەكونوميكالىق مۇمكىندىكتەرىن ارتتىرۋ, ولاردىڭ اراسىنداعى جۇمىسسىزدىق دەڭگەيىن تومەندەتۋ, كوشباسشىلىق الەۋەتىن ارتتىرۋ, سونداي-اق, قازاقستاندا شاعىن جانە ورتا بيزنەستى قولداۋ جونىندە ۇسىنىمدار ازىرلەندى. ەلامان قوڭىر. دەرەك: akorda.kz. سۋرەت: todaynews.kz.