سولتۇستىك قازاقستاننىڭ ىزدەۋ توپتارى 577 جاۋىنگەردىڭ سۇيەگىن تاپتى

پەتروپاۆل. 21 مامىر.  رەسەيدىڭ نوۆگورود جانە تۋلا وبلىستارىندا بولىپ, ءداستۇرلى «ەسكە الۋ ۆاحتاسىنان» ورالعان «سالانگ» جانە «پويسك» اسكەري-پاتريوتتىق كلۋبتاردىڭ وكىلدەرى بريفينگ وتكىزدى. بۇل تۋرالى egemen ءتىلشىسى حابارلادى. اتالمىش كلۋبتار «ەسكە الۋ ۆاحتاسى» ەكسپەديتسياسىنا 1989 جىلدان بەرى ۇزبەي قاتىسىپ كەلەدى. بۇل جولى ۇلى جەڭىستىڭ 70 جىلدىعى قۇرمەتىنە وتكىزىلگەن ايتۋلى شارا بارىسىندا ءبىر ايعا جۋىق قازبا جۇمىستارى جۇرگىزىلىپ, قان مايداندا حابار-وشارسىز كەتكەن جاۋىنگەرلەر مەن وفيتسەرلەردىڭ مايىتتەرى ىزدەستىرىلگەن. «19 ساۋىردە ەكسپەديتسياعا اتتانىپ, ولجالى ورالدىق.  577 بوزداقتىڭ سۇيەگى تابىلىپ, 13-ءنىڭ مەدالونى وقىلدى», دەيدى پەتروپاۆل قالاسى ءبىلىم ءبولىمىنىڭ العاشقى اسكەري دايىندىق ورتالىعى ديرەكتورىنىڭ ورىنباسارى ۆلاديمير يۋرچەنكو. «پويسك» ىزدەۋ جاساعىنىڭ جەتەكشىسى اندرەي كوشەلەۆ تۋلا وبلىسىنا قاراستى بەرەزوۆ اۋدانى اۋماعىندا 61 جاۋىنگەردىڭ سۇيەگىن تاۋىپ, ەكەۋىنىڭ اتى-جوندەرىن انىقتاعاندارىن, كەيىن زامارين دەگەن قاتارداعى ساربازدىڭ تۋعان-تۋىستارى تابىلعانىن جەتكىزدى. ءومىر ەسقالي. دەرەك, سۋرەت: egemen.kz