ەلباسى اقش-تىڭ بۇرىنعى سەناتورى سەم نانندى قابىلدادى

استانا. 27 تامىز. مەملەكەت باسشىسى اقش-تىڭ بۇرىنعى سەناتورى سەم نانندى قابىلدادى. بۇل تۋرالى akorda.kz حابارلادى. قازاقستان پرەزيدەنتى بۇل كەزدەسۋدىڭ سەمەي پوليگونى جابىلعان كۇن مەن بىرىككەن ۇلتتار ۇيىمى اتاپ وتەتىن حالىقارالىق يادرولىق سىناققا قارسى ءىس-قيمىل كۇنى قارساڭىندا ءوتۋىنىڭ سيمۆولدىق ءمانى بار ەكەنىنە توقتالدى. ەلباسى پوليگون جابىلعاننان بەرگى جىلدار بويى س.نانن ەلىمىزگە قولداۋ كورسەتىپ كەلگەنىن ايتتى. «بۇل ماسەلەنىڭ تاريحىن سىزدەن ارتىق ەشكىم بىلمەيدى. بىزدەر ۇلكەن جۇمىس اتقاردىق دەپ سانايمىن, ول جۇمىس بۇگىنگى كەلىسىمگە قول قويۋمەن اياقتالىپ وتىر. قازاقستان – دۇنيەجۇزىلىك انتيادرولىق قوزعالىستىڭ باستاماشىسى ءارى كوشباسشىسى, بۇعان ونىڭ مورالدىق قۇقىعى بار. مەن ءوزىم وسى ماسەلەگە ارنالعان بارلىق حالىقارالىق سامميتتەرگە قاتىسىپ كەلەمىن», – دەدى نۇرسۇلتان نازارباەۆ. س.نانن قازاقستاندا از بايىتىلعان ۋران بانكىن قۇرۋ تۋرالى كەلىسىمگە قويىلۋىنىڭ ماڭىزدىلىعىن اتاپ ءوتتى. «بۇل – يادرولىق ەنەرگيانى اسكەري ماقساتتا پايدالانۋدان باس تارتۋ ءۇشىن بارلىق مەملەكەتتەر ىنتىماقتاساتىن بولاشاققا قاراي جاسالعان العاشقى قادام. قازاقستان جانە ءسىز ءوزىڭىز بۇل ورايدا ءاردايىم ۇلگى كورسەتىپ كەلدىڭىز, وزگەلەردى سوڭىڭىزدان ەرتتىڭىز. ءسىزدىڭ ەلىڭىز بۇل ءۇشىن قانداي قادام جاساعانىن بۇكىل الەم بىلەدى, ويتكەنى ءدال وسى جەردە يادرولىق پوليگوندى جابۋ تۋرالى شەشىم قابىلداندى. قازاقستان يادرولىق باعدارلامالارعا قاتىستى نە ىستەۋ قاجەتتىگى تۋرالى ءاردايىم جاقسى ونەگە كورسەتىپ كەلدى», – دەدى اقش-تىڭ بۇرىنعى سەناتورى. ايدار ورىسباەۆ. دەرەك, سۋرەت: akorda.kz.