قىزىلوردادا 2 كۇندە 1400-گە جۋىق قۇقىق بۇزۋشىلىق انىقتالدى

قىزىلوردا. 27 تامىز. قىزىلوردا وبلىسىندا تامىز ايىنىڭ 24-28 كۇندەرى ارالىعىندا كريمينوگەندىك احۋالدى سەيىلتۋ, قۇقىق ءتارتىبى مەن جول قوزعالىسى قاۋىپسىزدىگىن قامتاماسىز ەتۋ, كوشەلەر مەن باسقا دا قوعامدىق ورىنداردا قىلمىستاردى ەسكەرتۋ جانە جولىن كەسۋ باعىتىندا وبلىس كولەمىندە «قۇقىق ءتارتىبى» جەدەل-پروفيلاكتيكالىق ءىس-شاراسى ءوتىپ جاتىر. بۇل تۋرالى egemen.kz ءتىلشىسى حابارلادى. اتالعان ءىس-شارانىڭ 2 كۇنىندە بارلىعى 1355 اكىمشىلىك قۇقىق بۇزۋشىلىق انىقتالدى. ونىڭ ىشىندە اۆتوكولىكتى ماس كۇيىندە باسقارعان 22 جۇرگىزۋشى انىقتالسا, قاۋىپسىزدىك بەلدىگىن تاقپاي اۆتوكولىك باسقارعان 310 جۇرگىزۋشىگە, ۇيالى تەلەفونمەن سويلەسىپ كولىك باسقارعان 210 جۇرگىزۋشىگە, جىلدامدىقتى شامادان تىس اسىرعان 98 جۇرگىزۋشىگە اكىمشىلىك حاتتاما تولتىرىلدى. سونىمەن قاتار, ەسەپتى مەرزىمدە قالالار مەن ەلدى مەكەندەردىڭ اۋماقتارىن كورىكتەندىرۋ ەرەجەلەرىن بۇزۋدىڭ 113 دەرەگى, قوعامدىق ورىنداردا سپيرتتىك ىشىمدىك ءىشۋ نەمەسە ماس كۇيىندە ءجۇرۋدىڭ 92 دەرەگى, كامەلەتكە تولماعانداردىڭ تۇنگى ۋاقىتتا زاڭدى وكىلدەرىنىڭ ەرىپ ءجۇرۋىنسىز ءۇي-جايدان تىس جەردە ءجۇرۋىنىڭ 82 دەرەگى, باسقا دا ۇساق بۇزاقىلىقتاردىڭ 87 دەرەگى انىقتالعان. جالپى, 2 تاۋلىك ىشىندە 24 قىلمىس ىزى سۋىماي اشىلدى. ىزدەۋدە جۇرگەن 3 قىلمىسكەر ۇستالىپ, بۇرىن جاسالعان 13 قىلمىس اشىلدى. ەرجان بايتىلەس. دەرەك: egemen.kz. سۋرەت: total.kz.