اۆتوكولىكتەر ايتارلىقتاي قىمباتتامايدى

ەلىمىزدىڭ ۇلتتىق بانكى مەن ۇكىمەت اعىمداعى جىلدىڭ 20 تامىزىنان باستاپ, ينفلياتسيالىق تارگەتتەۋ رەجىمىنە, ۆاليۋتالىق ءدالىزدى الىپ تاستاۋعا جانە ايىرباس باعامىن ەركىندىككە جىبەرۋگە كوشۋگە نەگىزدەلگەن جاڭا اقشا-نەسيە ساياساتىن جۇزەگە اسىرۋعا كىرىسۋ جونىندە شەشىم قابىلداعان بولاتىن. بۇل رەتتە وسى ماسەلە ەلىمىزدەگى بيزنەس وكىلدەرى تاراپىنان قولداۋ تاپتى. بۇل جونىندە پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا «قازاۆتوبيزنەس» قاۋىمداستىعىنىڭ پرەزيدەنتى اندرەي لاۆرەنتەۆ مالىمدەدى. ونىڭ ايتۋىنا قاراعاندا, تەڭگەنىڭ ەركىن باعامى بيزنەس سالاسىندا ايتارلىقتاي اۋقىمدى ماسەلە بولا قويمايدى. ءتىپتى, وسىنىڭ ارقاسىندا ەكسپورت كولەمىن ۇلعايتۋعا مول مۇمكىندىك تۋادى. ۇلتتىق بانك پەن ۇكىمەتتىڭ وسى مالىمدەمەسىنەن كەيىن 60-قا جۋىق كومپانيا باسشىلارى مەن اكتسيونەرلەردىڭ قاتىسۋىمەن ەلباسى ەكونوميكالىق ساياساتتىڭ الداعى شارالارى تۋرالى كەڭەس وتكىزگەن بولاتىن. اتالعان جيىندا مەملەكەت باسشىسى تەڭگەنىڭ ەركىن اينالىمى جونىندە شاعىن جانە ورتا بيزنەس ەكسپورتشىلارىنىڭ پىكىرىن تىڭدادى, دەي وتىرىپ قاۋىمداستىق پرەزيدەنتى اتالعان شەشىمنىڭ وڭ ناتيجە بەرەتىندىگىنە سەنىم ءبىلدىردى. سونىمەن قاتار, الداعى ۋاقىتتا ەلىمىزدە اۆتوكولىك باعاسىنىڭ قىمباتتاۋ قاۋپى جوق ەكەندىگىن جەتكىزدى. ءبىز بارلىق ديستريبيۋتورلار مەن ديلەرلەردى, سونداي-اق, بارشا وندىرۋشىلەردەن بولجالىنعان باعانىڭ ارتۋ مۇمكىندىگىنە قاتىستى سۇراقتار قويىپ, مونيتورينگ جاساپ وتىرامىز. سول سەبەپتى, وقىستان قىمباتتاۋ ماسەلەسى تۋىندامايتىنى ايدان انىق, دەدى ول. سونداي-اق, قازاقستان اۋماعىندا ساتىلىمعا شىققان اۆتوكولىكتەردىڭ باعاسى بەلگىلەنىپ قويعاندىعىن تىلگە تيەك ەتە وتىرىپ, كوپتەگەن كومپانيالار ۆاليۋتالىق ءدالىزدى 200 تەڭگە شاماسىندا ۇستاپ, وسى رەتتە ساتۋ جۇمىستارى ءجۇرىپ جاتقاندىعىن اتاپ ءوتتى. ال سيماس, اگروماشحولدينگ, سارىاركااۆتوپروم سەكىلدى كومپانيالاردىڭ ناقتى باعالاردى ورناتۋىنا وراي الداعى ۋاقىتتا وسىعان قاتىستى تۇيتكىلدەر تۋىندامايتىنىن كولدەنەڭ تارتتى. دەگەنمەن, بىرقاتار كومپانيالار ماۋسىمدىق جەڭىلدىكتەردى الىپ تاستاعاندىعىن جاسىرمادى. سونىمەن قاتار, تەڭگەنىڭ ەركىن باعامىنا بايلانىستى اۆتوكولىك كومپانيالارى ساتۋ بارىسىن توقتاتىپ قويعانى جونىندەگى اقپاراتتىڭ شىندىققا ساي ەمەستىگىن ايتا وتىرىپ, ولاردىڭ ادەتتەگىدەي ءوز جۇمىستارىن جالعاستىرۋدا ەكەندىگىن جەتكىزدى. بىزگە ەدب ارقىلى كرەديتتى دامىتۋ ماسەلەسىنە وراي 15 ملرد. تەڭگە كولەمىندە قارجى ءبولىندى, بۇل ەلىمىزدەگى مەملەكەتتىك باعدارلاما اياسىندا جۇزەگە اسىپ وتىر, دەگەن ا.لاۆرەنتەۆ مونيتورينگتىڭ ارقاسىندا كۇرت قىمباتتاۋدىڭ بولمايتىندىعىن تاعى دا اتاپ ءوتتى. جيىن بارىسىندا باق وكىلدەرىنىڭ ساۋالىنا جاۋاپ بەرگەن قاۋىمداستىق پرەزيدەنتى جىل سوڭىنا دەيىن اۆتوكولىكتەردىڭ باعاسىنىڭ ارتۋ كولەمى 5-6 پايىزدان اسپايتىندىعىن اتاپ ءوتتى. جانە دە ءبىزدىڭ مەملەكەتتىڭ ءبىرتۇتاس ەكونوميكالىق كەڭىستىكتە بولعاندىقتان باعالاردى ارتتىرۋدىڭ ەلىمىزگە ءتيىمسىز ەكەندىگىن ناقتىلادى. ەلميرا ماتىباەۆا, «ەگەمەن قازاقستان».