انشىلەر اۋلەتى

24 نەمەرە, 24 شوبەرە سۇيگەن نۇرعازيەۆتاردىڭ نۇرلى شاڭىراعى مەملەكەت باسشىسى نۇرسۇلتان نازارباەۆتىڭ تاپسىرماسى بويىنشا ەلىمىزدە وتباسى قۇندىلىقتارىن دارىپتەۋ ماقساتىندا «مەرەيلى وتباسى» بايقاۋى بيىل ەكىنشى مارتە ۇيىمداستىرىلىپ, جۋىردا اتالعان بايقاۋدىڭ وڭىرلەردەگى جەڭىمپازدارى بەلگىلى بولعانى ءمالىم. شىعىس وڭىرىندە وتكەن «مەرەيلى وتباسى» بايقاۋىندا ۇزدىك ۇشتىكتەن كورىنگەن اۋلەتتىڭ ءبىرى – نۇرعازيەۆتار وتباسى. اۋلەتتىڭ يەلەرى قيسا نۇر­عا­­زي ۇلى مەن ساندۋعاش كەڭىس­پايقىزى وتاسقاندارىنا جارتى عا­سىردان استام ۋاقىت بولىپ, ءدالى­رەك ايتقاندا 52 جىل بويى قول ۇستاسىپ, ءومىردىڭ ۇلكەن بەلەسىنەن وتكەن ابزال جاندار. قيسا قاريا وسىدان ون شاقتى جىل بۇرىن ومىردەن وتسە, ساندۋعاش انا سەكسەننىڭ سەڭگىرىنەن اسىپ, بالا-شاعاسىنىڭ قىزىعىن كورىپ وتىر. التايدىڭ باۋرايىنداعى ۇلكەن نارىن اۋىلىندا تۇرادى. باقىتتى دا باراقاتتى شاڭىراقتىڭ باستاۋىندا تۇرعان بۇل اۋلەتتىڭ اناسى بۇگىندە 11 بالا تاربيەلەپ, 24 نەمەرە, 24 شوبەرە ءسۇيىپ وتىر. ساندۋعاش كەڭىسپايقىزى كەڭەس وداعىنىڭ كەزىندە «باتىر انا» اتاعىن السا, تاۋەلسىزدىك جىلدارى ەلباسىنىڭ قولى قويىلعان «التىن القا» يەگەرى بولدى. «بالالى ءۇي بازار» دەگەندەي, ىشكى ىستەر ورگاندارىندا 32 جىل بويى ەڭبەك ەتكەن اۋلەتتىڭ اكەسى قيسا قاناتىمەن سۋ سەپكەن قارلىعاشتاي, بارلىق بالانى جالعىز ەڭبەكاقىسىمەن ەشكىمنەن كەم قىلماي, تاربيەلەپ جەتكىزسە, جان جارى ساندۋعاش كۇيەۋىنىڭ قيىن دا جاۋاپتى قىزمەتىن ابىرويمەن الاڭسىز اتقارۋىنا بولىسىپ, ۇيدە بالا تاربيەسىمەن اينالىستى. اكە-شەشەمىزدىڭ انگە دەگەن اۋەستىگى مەن قۇمارلىعى بارلىق بالالارىنا قوندى. اسىرەسە, ۇلدار اكە جولىن لايىقتى جالعاستىرىپ, جوعارى بيىكتەردى باعىندىردى. ماسەلەن, مۇرات قۇرمانعازى اتىنداعى قازاق ۇلتتىق كونسەرۆاتورياسىن ءبىتىردى. «قازاقستاننىڭ ەڭبەك سىڭىرگەن قايراتكەرى» اتاندى. ءالى كۇنگە تابيعات تارتۋ ەتكەن دارا داۋىسىمەن كونتسەرتتەردە تىڭدارمانداردىڭ قۇلاق قۇرىشىن قاندىرىپ كەلەدى. پرەزيدەنت وركەسترىنىڭ ءانشىسى بولىپ ەڭبەك ەتتى. پودپولكوۆنيك شەنىندەگى مۇرات قازىر قۇرمەتتى دەمالىستا. قايرات پەن بولات تا اعا ىزىمەن ءجۇرىپ, وسكەمەن قالاسىنداعى مۋزىكالىق ۋچيليششەنى ءتامامدادى. قايرات اۋداندىق مادەنيەت ۇيىندە 30 جىل جۇمىس ىستەدى. قايراتتىڭ جارى داريعاش تا, قىزى دا ءانشى. ايەلى قازىر بالاباقشادا ادىسكەر بولىپ ەڭبەك ەتسە, قىزى مادەنيەت ۇيىندە جۇمىس ىستەپ ءجۇر. تىڭدارماندارى تالانتتارىنا باس يەدى. ال اسقار مۋزىكالىق ءبىلىمى بولماسا دا, ءان سالعاندى ايرىقشا ۇناتادى. ءتىپتى, ءوزى جازعان اندەرى دە بار. ول ءوزىن مەملەكەتتىك قىزمەت سالاسىندا سىناپ كوردى. ۇزاق جىل بويى وسكەمەن قالاسىنىڭ اكىمدىگىندە ەڭبەك ەتتى. قالا اكىمىنىڭ ورىنباسارى قىزمەتىن اتقاردى. قازىرگى كەزدە وبلىستىق ءبىلىم باسقارماسىنىڭ جەتەكشىسى بولىپ ەڭبەك ەتەدى. قىزدار دا وزدەرىن جاقسى قىرلارىنان تانىتتى. گاۋھار كوپتەگەن جىلدار بويى باسشىلىق قىزمەتتەر اتقاردى. كاتونقاراعاي اۋداندىق ءماسليحاتىنىڭ حاتشىسى بولىپ ەڭبەك ەتتى, «زەينەتاقى قورىنىڭ ەڭبەك سىڭىرگەن قىزمەتكەرى» اتاندى. باسقا بالالار دا ومىردەن ءوز جولدارىن تاپتى. ولار بۇگىندە ءبىلىم, ساۋدا, تەلەكوممۋنيكاتسيا سىندى ءتۇرلى سالالاردا ەڭبەك ەتۋدە. دۋمان اناش, «ەگەمەن قازاقستان». شىعىس قازاقستان وبلىسى, كاتونقاراعاي اۋدانى.