سالتاناتتى جيىن

كەشە جوعارعى سوتتا قازاق­­ستان رەسپۋبليكاسىنىڭ كونستيتۋتسياسى كۇنىنە ارنال­عان سالتاناتتى جيىن بولىپ ءوتتى. ءىس-شاراعا جوعارعى سوت توراعاسى قايرات ءمامي, پار­لامەنت ءماجىلىسى زاڭناما جانە سوت-قۇقىقتىق رەفورما كوميتەتىنىڭ توراعاسى راحمەت مۇقاشەۆ, جوعارعى سوت سۋديالارى, قازاقستان رەسپۋبليكاسى سۋديالار وداعىنىڭ مۇشەلەرى, جوعارعى سوت جانىنداعى سوت­تاردىڭ قىزمەتىن قامتاماسىز ەتۋ دەپارتامەنتىنىڭ باسشىلىعى مەن قىزمەتكەرلەرى, جوعارعى سوتتىڭ وتستاۆكاداعى سۋديا­لارى مەن ارداگەرلەر قاتىستى. «وسىدان جيىرما جىل بۇ­رىن جەتى ميلليوننان استام قازاقستاندىقتار 1995 جىلعى 30 تامىزداعى بۇكىلحالىقتىق رەفەرەندۋمدا – قازىرگى كونس­تيتۋتسيانى قابىلداۋ ءۇشىن ءبىر­اۋىزدان داۋىس بەرىپ, ءوزىنىڭ تاريحي تاڭداۋىن جاساعان ەدى. وسىلايشا, حالقىمىزدىڭ عا­سىر­­لار بويعى اسىل ارمانى جۇزەگە اسىپ, تاۋەلسىز ەلىمىزدىڭ جاڭا اتا زاڭى دۇنيەگە كەلدى. كونستيتۋتسيامىز سول ۋاقىتتان بەرى رەسپۋب­ليكاداعى تاتۋلىعى جاراسقان بارلىق ۇلتتاردىڭ ءبىر شاڭىراق استىندا الاڭسىز ءومىر ءسۇرۋىن قامتاماسىز ەتۋدە», – دەپ اتاپ ءوتتى جوعارعى سوت توراعاسى. قايرات ءمامي بۇدان كەيىن جيىنعا قاتىسۋشىلاردى مەم­­لەكەت باسشىسىنىڭ باس­تاماسىمەن جۇزەگە اسىرىلىپ جاتقان «100 ناقتى قادام – بارشاعا ارنال­عان قازىرگى زامانعى مەملەكەت» اتتى ۇلت جوسپارى شەڭ­بەرىندە سوت جۇيەسىن رەفورمالاۋ جايىنان حاباردار ەتتى. وسىدان سوڭ سالتاناتتى شارا باستالدى. ونىڭ بارىسىندا جوعارعى سوت سۋديالارى مەن دەپارتامەنت قىزمەتكەرلەرىنە ەلباسى جارلىعىنا سايكەس «قازاقستان كونس­تيتۋتسياسىنا 20 جىل» مەرەيتويلىق مەدالى, ايرىقشا بەلگىلەر, قۇرمەت گراموتالارى مەن العىس حاتتار تاپسىرىلدى, دەپ حابارلادى جوعارعى سوتتىڭ ءباسپاسوز قىزمەتى.