كەشە مەملەكەت باسشىسى نۇرسۇلتان نازارباەۆ ەلىمىزگە رەسمي ساپارمەن كەلگەن پاكىستان يسلام رەسپۋبليكاسىنىڭ پرەمەر-ءمينيسترى ناۆاز شاريفپەن كەزدەستى.
كەزدەسۋدە ساۋدا-ەكونوميكالىق, كولىك-ترانزيتتىك, عىلىمي-تەحنيكالىق جانە مادەني-گۋمانيتارلىق سالالارداعى ەكىجاقتى ىنتىماقتاستىقتى نىعايتۋ ماسەلەلەرى تالقىلاندى. سونىمەن قاتار, حالىقارالىق كۇن تارتىبىندەگى وزەكتى جايتتار ءسوز بولدى.
كەزدەسۋ بارىسىندا قازاقستان پرەزيدەنتى پاكىستاننىڭ جۇيەلى دامۋىنداعى ناۆاز ءشاريفتىڭ اتقارعان ءرولىن اتاپ كورسەتتى.
«ءسىز كۇردەلى جاعدايدا ەلدە ەكونوميكالىق جانە ساياسي رەفورمالاردى تابىستى ىسكە اسىرىپ, پاكىستاننىڭ بەدەلى مەن ءرولىن كوتەرەتىن بەلسەندى حالىقارالىق ساياسات جۇرگىزىپ وتىرسىز. قازاقستان مەن پاكىستان ورنالاسقان ءوڭىردىڭ ەلدەرى ءوزارا ساۋدا جانە مادەني قارىم-قاتىناستار تۇرعىسىنان ءاردايىم تىعىز بايلانىستا بولدى. ىلگەرىدە ءسىز ءبىزدىڭ بۇرىنعى استانامىز الماتىعا كەلگەن بولاتىنسىز. سودان بەرگى از ۋاقىت ىشىندە ءبىز جاڭا ەلوردا سالدىق, ونى بۇكىل قازاقستاندىقتار ماقتان تۇتادى. بۇل قالا – ءبىزدىڭ تاۋەلسىزدىگىمىز بەن ەلىمىز ەگەمەندىك جىلدارىندا جەتكەن جەتىستىكتەردىڭ سيمۆولى», دەدى مەملەكەت باسشىسى.
ال ن.شاريف ءوز كەزەگىندە نۇرسۇلتان نازارباەۆقا شاقىرتۋى ءۇشىن العىس ايتىپ, ەكى حالىقتىڭ بايلانىستارىنىڭ سان عاسىرلىق تاريحى بار ەكەنىن اتاپ ءوتتى. «مەن ءسىزدىڭ كوشباسشىلىق قاسيەتىڭىزگە ءتانتىمىن جانە ءسىزدى ەرەكشە قابىلەت يەسى دەپ ەسەپتەيمىن. بۇگىندە استانادان ءبىزدىڭ كورەتىندەرىمىزدىڭ ءبارى – ءسىزدىڭ ەڭبەگىڭىز», دەدى پاكىستان پرەمەر-ءمينيسترى.
ەكىجاقتى كەزدەسۋدەن سوڭ قازاقستان پرەزيدەنتى مەن پاكىستان پرەمەر-ءمينيسترى كەڭەيتىلگەن قۇرامدا وتكەن كەلىسسوزدەرگە قاتىستى. وندا قازاقستان پرەزيدەنتى ءوز سوزىندە ناۆاز ءشاريفتىڭ ساپارى ەكىجاقتى قارىم-قاتىناستى جانداندىرۋعا تىڭ سەرپىن بەرەتىنىنە سەنىم ءبىلدىردى.
«قازاقستاندىقتار ەلىمىزدىڭ تاۋەلسىزدىگىن العاشقىلاردىڭ ءبىرى بولىپ پاكىستاننىڭ تانىعانىن ەشقاشان ۇمىتپايدى. حالىقارالىق كۇن تارتىبىنە قاتىستى ۇستانىمدارىمىزدىڭ ۇقساستىعى, سان عاسىرلىق دوستىق جانە مادەني بايلانىستار ءبىزدى جاقىن ءارى باۋىرلاس ەلدەرگە اينالدىرادى. بۇگىنگى احۋال جاعدايىندا قارىم-قاتىناستارىمىزدىڭ جاڭا كەزەڭىن باستاۋ ءۇشىن بارلىق مۇمكىندىكتى پايدالاناتىن ۋاقىت جەتتى. ءسىزدىڭ ساپارىڭىز ءدال وسى ماقساتقا ساي كەلەتىنىنە سەنىمدىمىن», دەدى مەملەكەت باسشىسى.
پاكىستان پرەمەر-ءمينيسترى ءبىزدىڭ ەلگە دەگەن ايرىقشا كوڭىلى مەن نۇرسۇلتان نازارباەۆپەن اراداعى جىلى قارىم-قاتىناسى تۋرالى ايتتى. «مەن قازاقستاندى ءوزىمنىڭ ەكىنشى مەكەنىم سانايمىن, سوندىقتان ءسىزدىڭ ەلگە كوپ جىلدان كەيىنگى ساپارىم ايرىقشا اسەرگە بولەدى. وسى مۇمكىندىكتى پايدالانا وتىرىپ, ءسىزدى وزىڭىزگە قولايلى ۋاقىتتا پاكىستانعا كەلۋگە شاقىرامىن. بۇل – مەنىڭ استاناعا ءبىرىنشى كەلۋىم. بۇل قالا ءسىزدىڭ كورەگەندىگىڭىزدىڭ سيمۆولى دەپ سانايمىن. ءسىزدىڭ باسشىلىعىڭىزبەن قازاقستان زور الەۋمەتتىك-ەكونوميكالىق جەتىستىكتەرگە جەتتى, دەدى ن.شاريف. ول سونداي-اق, ءپاكىستاننىڭ قازاقستانمەن جانە ورتالىق ازيا ەلدەرىمەن ىنتىماقتاستىق اياسىن كەڭەيتكىسى كەلەتىنىن اتاپ كورسەتتى. «ءبىز ەنەرگەتيكا, ساۋدا جانە ەكونوميكا, كولىك سالالارىن قوسا قامتيتىن كوپتەگەن سالالاردا قارىم-قاتىناستى دامىتقىمىز كەلەدى. وسىعان بايلانىستى قازاقستاندى قىتاي-پاكىستان كولىك جۇيەسىنىڭ جۇمىسىنا اتسالىسۋعا شاقىرامىز. بۇل ءسىزدىڭ ەل جانە وسى وڭىردەگى باسقا دا مەملەكەتتەر ءۇشىن پارسى شىعاناعىنا شىعۋعا جول اشادى», دەدى پاكىستان پرەمەر-ءمينيسترى.
سونىمەن قاتار, ناۆاز شاريف نۇرسۇلتان نازارباەۆتى, سونداي-اق, بۇكىل قازاقستان حالقىن قازاق حاندىعىنىڭ 550 جىلدىعىمەن جانە ەل كونستيتۋتسياسىنىڭ 20 جىلدىعىمەن قۇتتىقتادى.
كەلىسسوزدەر ناتيجەسىندە قازاقستان رەسپۋبليكاسىنىڭ پرەزيدەنتى مەن پاكىستان يسلام رەسپۋبليكاسى پرەمەر-مينيسترىنىڭ بىرلەسكەن مالىمدەمەسىنە قول قويىلدى. سونىمەن قاتار, قازاقستان رەسپۋبليكاسىنىڭ قورعانىس مينيسترلىگى مەن پاكىستان يسلام رەسپۋبليكاسىنىڭ قورعانىس مينيسترلىگى اراسىنداعى قازاقستان رەسپۋبليكاسى قارۋلى كۇشتەرىنىڭ اسكەري قىزمەتشىلەرىن پاكىستان يسلام رەسپۋبليكاسى قورعانىس مينيسترلىگىنىڭ اسكەري وقۋ ورىندارىندا وقىتۋ تۋرالى كەلىسىمگە, قازاقستان رەسپۋبليكاسىنىڭ سىرتقى ساۋدا پالاتاسى مەن پاكىستان يسلام رەسپۋبليكاسىنىڭ ساۋدا جانە ونەركاسىپتىك پالاتالارى فەدەراتسياسى اراسىنداعى بىرلەسكەن ىسكەرلىك كەڭەستى قۇرۋ تۋرالى ءوزارا تۇسىنىستىك مەموراندۋمعا قول قويىلدى.
كەلىسسوزدەر قورىتىندىسى بويىنشا قازاقستان پرەزيدەنتى مەن پاكىستان پرەمەر-ءمينيسترى بىرلەسكەن بريفينگ وتكىزدى.
بريفينگتە قازاقستان پرەزيدەنتى كەلىسسوزدەر بارىسىندا ەكىجاقتى ىنتىماقتاستىقتىڭ كەڭ اۋقىمداعى ماسەلەلەرى قوزعالعانىن جانە ءوڭىردىڭ احۋالى, سونىڭ ىشىندە اۋعانستان مەن تاياۋ شىعىستاعى جاعدايدىڭ تالقىلانعانىن اتاپ ءوتتى. مەملەكەت باسشىسى كولىك-ترانزيت سالاسىنداعى ىقپالداستىقتى دامىتۋعا ايرىقشا كوڭىل ءبولىنگەنىن, ەكى ەلدىڭ تاۋار اينالىمى دەڭگەيىن ارتتىرۋدىڭ وسىعان بايلانىستى ەكەنىن ايتتى.
«قازاقستاننىڭ «نۇرلى جول» باعدارلاماسى مەن قىتايدىڭ «جىبەك جولىنىڭ ەكونوميكالىق بەلدەۋى» جانە قاراقورىم جولى مەملەكەتتەر اراسىنداعى ىنتىماقتاستىقتى جانداندىرۋعا سەپتىگىن تيگىزەدى دەپ سانايمىن. سونىمەن بىرگە, قازاقستان-تۇرىكمەنستان-يران تەمىرجولى پاكىستاننىڭ تەڭىز پورتتارىنا شىعۋعا جول اشادى. وسى كولىك بايلانىستارى ءبىزگە ساۋدا جانە ەكونوميكالىق قارىم-قاتىناستاردى جاقسارتۋعا مۇمكىندىك بەرەدى, دەدى قازاقستان پرەزيدەنتى. نۇرسۇلتان نازارباەۆ ونەركاسىپكە, فارماتسەۆتيكاعا, ەنەرگەتيكاعا, اسكەري-تەحنيكالىق سالاعا, عىلىمعا جانە باسقا دا ماڭىزدى باعىتتارعا قاتىستى قازاقستان مەن پاكىستاننىڭ ناقتى قادامدارى تۋرالى ۋاعدالاستىققا قول جەتكىزىلگەنىن اتاپ ايتتى. سونداي-اق, اۋىل شارۋاشىلىعى ونىمدەرىن وڭدەۋ, حيميا جانە جەڭىل ونەركاسىپ, بانك سەكتورى سياقتى سالالاردا ىنتىماقتاستىقتى جولعا قويۋ ماقساتىندا ىسكەرلىك كەڭەس قۇرىلعانىنا دا توقتالىپ ءوتتى. سونىمەن قوسا, پاكىستان ن.ءشاريفتىڭ باسشىلىعىمەن ەكونوميكالىق ءوسىم قارقىنىن ۇدەتىپ, الەمدىك ساياساتتاعى سالماقتى ورنى بار ەلگە اينالىپ كەلە جاتقانىن اتاپ ءوتتى.
نۇرسۇلتان نازارباەۆ ازياداعى ءوزارا ءىس-قيمىل جانە سەنىم شارالارى كەڭەسىن وتكىزۋ, ەكسپو-2017 كورمەسىن وتكىزۋ قۇقىعى ءۇشىن داۋىس بەرۋ, قازاقستاننىڭ دسۇ-عا كىرۋى ماسەلەلەرىنە قاتىستى ءبىزدىڭ ەلىمىزدى پاكىستاننىڭ قولداعانىنا جانە بۇگىنگى تاڭدا قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە كانديداتۋراسىن دا قولداپ وتىرعانىنا نازار اۋداردى. وسىعان وراي مەملەكەت باسشىسى پاكىستان تاراپىنا زور العىس ءبىلدىردى.
پاكىستان پرەمەر-ءمينيسترى ءوز كەزەگىندە جىلى قابىلداۋ مەن قوناقجايلىلىق ءۇشىن تاعى دا العىس ايتىپ, جاڭا ەلوردا – استانا قالاسى قازاقستاننىڭ ىلگەرىلەۋى مەن وركەندەۋىنىڭ سيمۆولى بولىپ سانالاتىنىن اتاپ ءوتتى.
«مەنى نۇرسۇلتان نازارباەۆتىڭ كەمەل باسشىلىعىنىڭ ارقاسىندا قازاقستاننىڭ قول جەتكىزگەن الەۋمەتتىك-ەكونوميكالىق تابىستارىنىڭ اۋقىمى ءتانتى ەتتى. ءبىز ەلدەرىڭىزگە الداعى ۋاقىتتا دا تابىس پەن باق-بەرەكە تىلەيمىز. ءبىزدىڭ مەملەكەتتەرىمىزدە قارىم-قاتىناس پەن ءوزارا ىنتىماقتاستىقتى جاقسارتۋعا قاجەتتى زور الەۋەت بار, دەدى ن.شاريف. ول ساپار بارىسىندا تاراپتار ەكىجاقتى قارىم-قاتىناستار مەن حالىقارالىق كۇن تارتىبىندەگى كەڭ اۋقىمدى ءماسەلەلەردى تالقىلاعانىن ايتتى. «ءبىز ءبىلىم جانە عىلىم, ەكونوميكا, كولىك, كەمە قۇرىلىسى, سونداي-اق, اۋە قاتىناسى سالالارىنداعى ءوزارا ىقپالداستىقتى نىعايتۋعا كەلىستىك. قازاقستان مۇنايى مەن گازىنىڭ يمپورتىنا, جەڭىل ونەركاسىپتە, اۋىل شارۋاشىلىعىندا, فارماتسەۆتيكا جانە باسقا سالالاردا ءبىرلەسكەن كاسىپورىندار اشۋعا قاتىستى ۋاعدالاستىقتارعا قول جەتكىزىلدى», دەدى پاكىستان يسلام رەسپۋبليكاسىنىڭ پرەمەر-مينيسترى.
ن.شاريف ەكىجاقتى قاتىناستارداعى ينستيتۋتتىق تەتىكتەردى نىعايتۋ ينتەگراتسيالىق ۇدەرىستەرگە, بۇكىل وڭىردەگى بەيبىتشىلىك پەن تۇراقتىلىقتى ساقتاۋعا وڭ ىقپال ەتەتىنىن ايتتى. «قازاقستان مەن پاكىستان شىۇ جانە بۇۇ سياقتى حالىقارالىق ۇيىمدار اياسىندا بۇدان ءارى دە ىنتىماقتاسۋعا ىقىلاس تانىتىپ وتىر», دەدى پاكىستان پرەمەر-ءمينيسترى.
دينارا بىتىكوۆا,
«ەگەمەن قازاقستان».
سۋرەتتەردى تۇسىرگەندەر
س.بوندارەنكو, ب.وتارباەۆ.
