قۇجاتتارعا ءتىل بىتسە...

ەلىمىزدىڭ ۇلتتىق مۇراعاتى «قازاقستان رەسپۋبليكاسىنىڭ اتا زاڭىنا – 20 جىل» اتتى قۇجاتتىق كورمە ۇيىمداستىرىپ, ونىڭ العاشقى قوناقتارىنىڭ قاتارىندا كونستيتۋتسيانى دايىنداۋدىڭ باسى-قاسىندا جۇرگەن جۇمىس توبىنىڭ مۇشەلەرى دە بولدى. ەل تاريحىن قاتتاپ جاتقان ۇلتتىق مۇراعات بىلگەن جانعا ەلورداداعى قاسيەتتى ورىننىڭ ءبىرى. مۇنداعى تاريحي قۇجاتتار قورى ءالى تالاي زەرتتەۋشىنىڭ ىندەتىپ قازىپ, تالاي-تالاي عىلىمي-زەرتتەۋ جۇمىستاردىڭ دەرەككوزىنە اينالىپ, كەۋدەسىنە شەجىرە توقىعىسى كەلگەن تالاي جاننىڭ ازىعى بولارى انىق. وسى جولى تاريحي قۇجاتتاردى, دەرەكتەردى ەلدىڭ كوز الدىنا الىپ كەلگەن مۇراعاتتىقتار 20 جىلعى تاريحتى سويلەتۋدى مۇرات تۇتىپتى. الدەقانداي ءبىر كوشىرمە ەمەس, تاريحي قۇجاتتاردىڭ تۇپنۇسقالارى قويىلعان كورمە ءاربىر كەلۋشىنى مازمۇندىلىعىمەن باۋرايدى. كورمەدەن قوعام مەن مەملەكەتتىڭ نەگىزگى زاڭىنىڭ دايىندالۋ بارىسى مەن قابىلدانۋىنان تاريحى سىر اقتارىلعاندا, قۇجاتتارمەن تانىسقان كورەرمەن ءۇشىن ونى ازىرلەۋگە قاتىسقانداردىڭ العان اسەرلەرىن كورۋ دە ءبىر عانيبەت بولدى. سول كەزەڭدەردى ەسىنە العان زينايدا فەدوتوۆا: «1995 جىلى كونستيتۋتسيانى ازىرلەۋ بارىسىنا ءبىز سول كۇننىڭ مەملەكەتتىك مەرەكە بولاتىنىن ارينە, بىلگەن جوقپىز. شىنىندا بۇل – ۇلى مەرەكە. 20 جىلدا ەلىمىز وراسان زور تابىستارعا جەتتى. وسى جىلدار ىشىندە اتا زاڭنىڭ اياسىندا ءبىزدىڭ قوعامىمىز دا ءوسىپ-جەتىلدى, سوندىقتان ەلىمىز ءۇشىن بۇل مەرەكەنىڭ ورنى بولەك», دەپ تولقىسا, مۇراعات باسشىسى مارات ابسامەتوۆ اتا زاڭعا بايلانىستى قۇجاتتاردى كوپشىلىك نازارىنا ۇسىنا وتىرىپ بىزدەر ونىڭ قازاقستاننىڭ دامۋىنا, الەۋەتىنىڭ ارتۋىنا قوسقان ولشەۋسىز ۇلەسىن كورسەتكىمىز كەلدى, «كونستيتۋتسيامىزدىڭ ارقاسىندا حالقىمىزدى الەم ەلدەرى تانىدى. قازاق حالقى وسى قالپىندا كوكتەن تۇسە قالعان جوق, ول تاريحتىڭ كوشىندە ءوز ورنىن العان حالىق. تالايدى باستان كەشىرىپ, ارمان ەتكەن مەملەكەتىن قۇرىپ, اتا زاڭىن باسشىلىققا الىپ, كوپەتنوستى جۇرتتى ءبىر تۋ استىنا  بىرىكتىرگەن ەل. سوندىقتان بابالارىمىزدىڭ مۇراتىنا جەتكەنىن بۇگىنگى ۇرپاقتارى كورىپ وتىر», دەدى. مۇراعاتتىڭ بىرنەشە قورىنىڭ, اتاپ ايتقاندا, قازاقستان رەسپۋبليكاسىنىڭ كونستيتۋتسياسى, جوعارعى كەڭەس, ورتالىق سايلاۋ كوميسسياسى, ۇكىمەت اپپاراتى, كونستيتۋتسيالىق سوتىنىڭ قۇندى قۇجاتتارى كورمە سورەلەرىنەن ورىن الىپتى. ونى ارالاعان جان اتا زاڭنىڭ بۇكىلحالىقتىق تالقىلاۋدان قالاي وتكەنىنەن, رەفەرەندۋمنىڭ ازىرلىك بارىسى مەن ونىڭ وتكىزىلۋىنەن, وسى جىلدار ىشىندە باستى زاڭىمىزعا ەنگىزىلگەن وزگەرىستەر مەن تولىقتىرۋلاردىڭ قالاي جۇزەگە اسىرىلعانىنان دا حاباردار بولادى. كورمەنىڭ اشىلۋ راسىمىنە مەملەكەت جانە قوعام قايراتكەرلەرى, كونستيتۋتسيانى دايارلاۋ بويىنشا جۇمىس توبىنىڭ مۇشەلەرى, پارلامەنت دەپۋتاتتارى, مادەنيەت جانە سپورت مينيسترلىگىنىڭ وكىلدەرى, تاريحشى عالىمدار مەن مۇراعاتشىلار قاتىستى. استانالىقتار مەن قوناقتارىنىڭ تاريحي تۇپنۇسقا قۇجاتتار قويىلعان كورمەنى قىركۇيەك ايىنىڭ سوڭىنا دەيىن تاماشالاي الاتىنىن ەسكە سالا كەتۋ دە ارتىق ەتپەس. انار تولەۋحانقىزى, «ەگەمەن قازاقستان».