زاڭگەر-ۇستاز, قايراتكەر

قازاق گۋمانيتارلىق زاڭ ۋنيۆەرسيتەتىنىڭ پرەزيدەنتى, جوعارى مەكتەپ عىلىمدارى حالىقارالىق اكادەمياسىنىڭ اكادەميگى, زاڭ عىلىمدارىنىڭ دوكتورى, پروفەسسور ماقسۇت سۇلتان ۇلى نارىكباەۆ جاقىندا 75 جاسقا تولادى. مەن ماقسۇت سۇلتان ۇلىن 1990 جىلداردىڭ باسىنان بىلەمىن, جاقىن تانىسۋىمىز 1993 جىلى 12 تامىزدا سارىاعاش اۋداندىق سوتىنىڭ باستاماسىمەن وتكىزىلگەن رەسپۋبليكالىق سەمينار-كەڭەستە باستالعان بولاتىن. وسى سەمينارعا سول كەزدەگى ادىلەت ءمينيسترى ن.شاي­كەنوۆ پەن قازاقستان رەس­پۋبليكاسى پرەزيدەنتى اپپاراتى قۇقىق ءبولىمىنىڭ مەڭگەرۋشىسى م.نارىكباەۆ قاتىسقان ەدى. مىنە, سول ۋاقىتتان بەرى ماقسۇت سۇل­تان ۇلىمەن قىزمەت بابىندا ءجيى ارالاساتىن بولدىم. ول تالدىقورعان وبلىسىندا قازاق ورتا مەكتەبىن بىتىرگەن سوڭ, ۋكراينانىڭ دنەپرودزەرجينسك قالاسىنداعى №8 تەحنيكالىق ۋچيليششەدە مەتاللۋرگ ماماندىعىن الدى. سودان كەيىن س.م.كيروۆ اتىنداعى قازاق مەملەكەتتىك ۋنيۆەرسيتەتىنىڭ زاڭ فاكۋلتەتىن ءتامامدادى. بولاشاق تانىمال قۇقىق­تانۋشى تەمىرتاۋ قالاسىنداعى قاراعاندى مەتاللۋرگيا كومبي­ناتىنىڭ قۇرىلىس جۇمىستارىندا ەڭبەك ەتىپ, مادەني-اعارتۋ مەكە­مەلەرىندە, بۇقارالىق اقپا­رات قۇرالدارىندا ءارتۇرلى لاۋا­زىمداعى قىزمەتتەردە باي تاجىريبە جينادى. تالدىقورعان وبلىسىندا تەرگەۋشى, ادۆوكات, حالىق سۋدياسى, ادىلەت مينيسترلىگى مەن باس پروكۋراتۋرا اپپاراتىندا ەڭبەك ەتىپ, ۇلكەن ءومىر مەكتەبىنەن ءوتتى. ەگەمەن ەلىمىزدىڭ قالىپتاسۋ كەزەڭدەرىندە قۇقىقتىق رەفورما ساتىلارى بويىنشا م.نارىكباەۆ وزىندىك ۇلەسىن قوستى. 1993-1995 جىلدارى قازاقستان رەسپۋبليكاسى پرەزيدەنتى مەن مينيسترلەر كابينەتى اپپاراتىندا مەملەكەتتىك-قۇقىقتىق سەكتور مەڭگەرۋشىسى, قۇقىق قورعاۋ ورگاندارى ءبولىمىنىڭ مەڭگەرۋشىسى, رەس­پۋبليكا باس پروكۋرورى­نىڭ ­ورىنباسارى, جوعارعى سوت ءتور­اعاسى­نىڭ ءبىرىنشى ورىنباسارى بولىپ قىزمەت ىستەدى. ال 1995-2000 جىلدارى باس پروكۋرور, جوعارعى سوت توراعاسى ءتارىزدى جوعارى لاۋازىمداردى ابىرويمەن اتقاردى. سوڭىنان جوعارعى سوت كەڭەسىن باسقارىپ, قر پرەزيدەنتى جانىنداعى قۇقىقتىق ساياسات جونىندەگى كەڭەسىنىڭ جانە قازاقستان رەسپۋبليكاسى پارلامەنتى جانىنداعى ادام قۇقىعى جونىندەگى كوميسسيانىڭ مۇشەسى, پارلامەنتى ءماجىلىسى جانىنداعى قوعامدىق پالاتا توراعاسىنىڭ ورىنباسارى قىزمەتتەرىن دە اتقاردى. جوعارعى سوتتان كەيىن م.ءنا­رىكباەۆتىڭ قىزمەتى ەڭ الدىمەن ءبىلىم بەرۋ جۇيەسىمەن بايلانىستى بولدى. 2000 جىلعى شىلدە ايىنان باستاپ ول قازاق گۋمانيتارلىق زاڭ ۋنيۆەرسيتەتىن باسقاردى. بۇل ۋنيۆەرسيتەتتە ءۇز­دىك ستۋدەنتتەرگە گرانتتار بەرى­لەدى, از قامتىلعان وتباسىدان شىققان, جەتىم جانە اتا-انا­نىڭ قامقورلىعىنسىز قالعان ستۋدەنتتەردى الەۋمەتتىك قولداۋ باعدارلامالارى دا بار. ونىڭ جەتەك­شىلىگىمەن التى زاڭ عىلىم­دارىنىڭ دوكتورى جانە ون عىلىم كانديداتتارى دايارلاندى. م.نارىكباەۆ قوعام قايراتكەرى رەتىندە «قۇقىقتىق قازاقستان ءۇشىن» قوعامدىق بىرلەستىگىنىڭ جانە «ادىلەت» دەموكراتيالىق پارتياسىنىڭ توراعاسى سياقتى جوعارى لاۋازىمدارداعى ساياسي جۇمىستارمەن اينالىستى. مەملەكەت الدىندا سىڭىرگەن ەڭ­بەگى ءۇشىن «پاراسات», II دارە­جەلى «بارىس» وردەندەرىمەن مارا­پاتتالعان. سونداي-اق, ول قازاقستان رەسپۋبليكاسىنىڭ ەڭبەك سىڭىرگەن قايراتكەرى. بۇدان باسقا كوپتەگەن ناگرادالار مەن اتاقتاردىڭ يەگەرى بولىپ تابىلادى. قوعامداعى سان قىرلى قىز­مەتى مەن ۇيىمداستىرۋشىلىق قابىلەتىنە قاراپ ماقسۇت سۇل­تان ۇلىن ناعىز ازامات دەپ ايتۋعا ابدەن بولادى. بۇعان ونىڭ تاۋەلسىز مەملەكەتتىڭ دامۋىندا ماڭىزدى ءرول اتقاراتىن زاڭنامانىڭ قا­لىپتاسۋى مەن جۇزەگە اسىرىلۋىنا, سوت جۇيەسىن, زاڭ عىلىمدارى مەن قۇقىق قولدانۋ تاجىريبەسىن رەفورمالاۋعا قوسقان ەرەن ەڭبەگى كۋا. ەسبەرگەن الاۋحانوۆ, زاڭ عىلىمدارىنىڭ دوكتورى, پروفەسسور, قازاقستاننىڭ ەڭبەك سىڭىرگەن قايراتكەرى.