ەلىمىزدىڭ دامۋىنا, ونىڭ الەم الدىنداعى بەدەلىنىڭ ارتۋىنا سۇبەلى ۇلەس قوسىپ جۇرگەن بويجەتكەندەرىمىز از ەمەس. اسىرەسە, سپورت سالاسىندا تەر توگىپ, ءباسى بيىك باسەكەلەردە ەل نامىسىن ابىرويمەن قورعاپ جۇرگەن ارۋلارىمىزدىڭ قاتارى جىل سايىن ارتىپ كەلەدى. تۇسىنە بىلگەنگە, بۇل ۇلكەن جەتىستىك.
سوڭعى جىلدارى ەلىمىزدىڭ عانا ەمەس, بۇكىل الەمنىڭ نازارىن وزىنە اۋدارىپ, لايىقتى باعاسىن الىپ جۇرگەن قىزدارىمىزدىڭ اراسىندا ۆولەيبولشى سابينا التىنبەكوۆانىڭ ەسىمىن ەرەكشە ايتۋعا بولادى. 1996 جىلى اقتوبە قالاسىندا تۋعان سپورتشى قىز 14 جاسىنان باستاپ ۆولەيبولمەن شۇعىلدانا باستايدى. «قازحروم» (اقتوبە), «الماتينوچكا» (الماتى) كلۋبتارىندا ونەر كورسەتكەن ول مامانداردىڭ نازارىنا ىلىگىپ, 17 جاسىندا, ياعني 2013 جىلى ۆولەيبولدان قازاقستان ايەلدەر قۇراماسىنا قابىلدانادى.
سابينا تەيبەي قالاسىندا جالاۋىن كوتەرگەن ازيا چەمپيوناتىندا جۇرتشىلىقتىڭ ەرەكشە ءىلتيپاتىنا بولەنىپ, تانىمالدىلىعى ارتا ءتۇستى. ۆولەيبولدان 19 جاسقا دەيىنگى قىزدار اراسىندا وتكەن بۇل باسەكەدە قازاق قىزىنىڭ ويىنىنداعى شەبەرلىگىنە, ءوزىن-ءوزى ۇستاۋىنا, ءجۇرىس-تۇرىسىنا جانە كوركى مەن تۇلا بويىنىڭ سىمباتتىلىعىنا تالايلار ءتانتى بولدى. قىتاي, جاپونيا جانە باسقا دا ازيالىق ەلدەردىڭ جۋرناليستەرى سابينادان جارىسا سۇحبات الىپ, رەپورتاجدار ءتۇسىردى. سول سياقتى ينتەرنەتتە كوپتەگەن روليكتەر پايدا بولدى. ازيالىق جانكۇيەرلەر ونىڭ كەلبەتىنىڭ ءتۇرلى جاعىمدى كەيىپكەرلەرگە ۇقسايتىنىن جەتكىزدى. ءوز كەزەگىندە ءبىزدىڭ قوعام شەتەلدىكتەردىڭ بۇل سپورتشىمىزعا دەگەن قۇرمەتىن جالپى قازاق قىزدارىنا كورسەتىلگەن ىستىق ىقىلاس دەپ قابىلدادى. وسى ارادا ءبىر ايتا كەتەر جايت, تانىمالدىلىعى كۇرت وسكەن ۆولەيبولشى ارۋ مۇنىڭ ءبارىن سالقىنقاندىلىقپەن قابىلدادى. اسىپ-ساسقان جوق. كەۋدەمسوقتىققا, تاكاپپارلىققا بوي الدىرماي, ناعىز قازاق قىزىنا ءتان بايسالدىلىق تانىتا ءبىلدى. بۇل سابينا التىنبەكوۆانىڭ زور قۇرمەتكە لايىقتى ارۋ ەكەنىن بىلدىرسە كەرەك.
وسى ورايدا تاعى ءبىر سپورتشى قىزىمىز – زارينا دياس جونىندە دە از-كەم توقتالا كەتسەك ارتىقتىق ەتپەس.
بۇگىندە زارينانى الەم تانيدى. 1993 جىلى الماتى قالاسىندا تۋعان ول تەننيستە جوعارى كورسەتكىشكە قول جەتكىزگەن قازاقستاندىق العاشقى ساڭلاق. زارينا سپورتتاعى جۇلدىزدى جولىن 2009 جىلى باستادى. سودان بەرى ول ITF ساناتىنداعى تۋرنيرلەردە 5 مارتە جەڭىسكە جەتكەن. سونداي-اق, 2014 جىلى وساكادا (جاپونيا) وتكەن WTA تۋرنيرىندە فينالعا دەيىن جەتتى. ال تەننيستە شوقتىعى بيىك بولىپ سانالاتىن «ۇلكەن دۋلىعا» تۋرنيرلەرىنە وسىعان دەيىن 5 رەت قاتىستى. سونىڭ ىشىندە ەڭ جوعارعى ناتيجەسى 2014 جىلعى ۋيمبلدون تۋرنيرىندە تىركەلدى. ناقتى ايتار بولساق, سول جارىستا ءبىزدىڭ قىز 4-ءشى اينالىمعا دەيىن جەتتى. جالپى, زارينا «ۇلكەن دۋلىعا» باسەكەلەرىنە تەك 2014 جىلدان بەرى قاتىسا باستادى. ايتا كەتەيىك, وتكەن جىلدىڭ باسىندا زارينا WTA رەيتينگىندە جۇزدىككە دە كىرمەيتىن ەدى. ال سول جىلدىڭ سوڭىندا الەمدەگى ەڭ ۇزدىك 40 تەننيسشىنىڭ قاتارىنا قوسىلدى. بۇگىندە سايىپقىران ساڭلاعىمىز جاھاننىڭ 32-ءشى راكەتكاسى. بۇرىن-سوڭدى قازاقستان تەننيسى تاريحىندا ءدال مۇنداي مەجەگە ەشكىم جەتكەن ەمەس.
جولدىباي بازار,
«ەگەمەن قازاقستان».
