ىنتىماقتاستىق ارتا تۇسەتىن بولادى

پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ جانە قكپ وك ساياسي بيۋروسى تۇراقتى كوميتەتىنىڭ مۇشەسى, قحر مەملەكەتتىك كەڭەسىنىڭ ۆيتسە-پرەمەرى چجان گاولي پەكيندە ىنتىماقتاستىق جونىندەگى قازاقستان-قىتاي كوميتەتىنىڭ جەتىنشى وتىرىسىن وتكىزدى, دەپ حابارلادى پرەمەر-ءمينيستردىڭ ءباسپاسوز قىزمەتى. بۇل وتىرىس قازاقستان پرە­زيدەنتى نۇرسۇلتان نازارباەۆ­تىڭ 31 تامىز – 3 قىركۇيەك ارا­­­­لى­عىن­داعى قىتايعا ساپارى قارساڭىندا ءوتىپ وتىر. وتىرىس بارىسىندا تاراپتار قازاقستان پرەزيدەنتىنىڭ قحر-عا ساپارى بارىسىندا قول قويىلاتىن بىرقاتار كەلىسىمدەردى قارادى, نۇرسۇلتان نازارباەۆ جاريالاعان «نۇرلى جول» جاڭا ەكونوميكالىق ساياساتى مەن قحر توراعاسى سي تسزين­پين­نىڭ «ءبىر بەلدەۋ, ءبىر جول» باستاماسى شەڭبەرىندەگى جوبالاردى جۇزەگە اسىرۋ جولدارىن تالقىلادى. ال ولار ەلدەر اراسىندا ءوزارا ءتيىمدى ىنتىماقتاستىقتىڭ جاڭا پەرسپەكتيۆالارىن اشاتىن بولادى. كەلىسسوزدەر بارىسىندا سول سياقتى, ساۋ­دا-ەكونوميكالىق, يندۋستريالىق جانە ينۆەستيتسيالىق ىنتىماقتاستىق, ترانزيتتىك كولىك جوبالارى شەڭبەرىندەگى ءوزارا ءىس-قيمىلدار, ترانسشەكارالىق وزەندەردىڭ سۋ رەس­ۋرستارىن وڭتايلى پايدالانۋ جانە قورعاۋ بويىنشا ىنتىماقتاستىقتى نىعايتۋ ماسەلەلەرى تالقىلاندى. وتىرىسقا قاتىسۋشىلار ەنەر­گەتيكا, اۋىل شارۋاشىلىعى, عىلىمي-تەحنيكا­لىق قىزمەت جانە باسقا دا سالالارداعى ءارىپ­تەستىكتى اڭگىمە وزەگىنە اينالدىردى. قازاقستان رەسپۋبليكاسى پرەمەر-مينيس­ترىنىڭ ءبىرىنشى ورىنباسارى قىتاي كومپانيالارىن استانادا وتەتىن ەكسپو-2017 حالىقارالىق كورمەسىنە بەلسەندى قاتىسۋعا شاقىردى, سونداي-اق, كورمە شەڭبەرىندە شىۇ پاۆيلونىن اشۋ تۋرالى قازاقستاننىڭ باستاماسىن جۇزەگە اسىرۋعا ناقتى ماڭىز بەرۋدى ۇسىندى. باقىتجان ساعىنتاەۆ سول سياقتى, قكپ وك ساياسي بيۋروسى تۇراقتى كوميتەتىنىڭ مۇشەسى, قحر مەملەكەتتىك كەڭەسىنىڭ پرەمەرى لي كەتسيانمەن كەزدەسۋ وتكىزىپ, ونىڭ بارىسىندا تاراپتار مەملەكەتتەردىڭ مۇناي-گاز سەكتورى, اتوم ەنەرگياسى, اۋىل شارۋاشىلىعى, تۋريزم جانە باسقا دا باسىمدىقتى سالالارداعى ىنتىماقتاستىعىن جالعاستىرۋى قاجەتتىگىن اتاپ كورسەتتى.