«قازپوشتا» كونستيتۋتسياعا ارناپ مەرەكەلىك ماركا شىعاردى

«قازپوشتا» اق قازاقستان رەسپۋبليكاسى كونستيتۋتسياسىنىڭ 20 جىلدىعىنا ارنالعان ماركانى پوشتالىق اينالىمعا شىعاردى. ايتۋلى شاراعا وراي, ۇيىمداستىرىلعان ماركانى باستىرۋ سالتاناتىنا كونستيتۋتسيالىق كەڭەس توراعاسى يگور روگوۆ پەن «قازپوشتا» اق باسقارما توراعاسى باعدات مۋسين قاتىستى. – ىلۋدە ءبىر ورىن الاتىن, وتە سيرەك ۇيىمداستىرىلاتىن مۇنداي شارالاردىڭ وزىندىك ءمان-ماڭىزىنا وراي, بۇل تاريحي وقيعالاردىڭ ءبىرى. سوندىقتان دا, اتاۋلى كۇندە ارنايى ماركا باسىپ شىعارۋ ءىسى ءبىزدىڭ كونستيتۋتسيامىزدىڭ قۇندىلىعىن ودان سايىن ارتتىرا تۇسەدى. اتا زاڭىمىزدىڭ ابىروي-بەدەلىن بىلدىرەتىن مەرەكەلىك ماركا فيلاتەليمەن اينالىسۋشىلار اراسىندا (ماركا جيناۋشىلار) زور سۇرانىس تۋدىرىپ, تاريح قويناۋىنان وزىنە تيەسىلى تۇعىرلى ورنىن الادى دەگەن سەنىمدەمىن, – دەدى كونستيتۋتسيالىق كەڭەس توراعاسى. وسىلايشا, جۇرەكجاردى لەبىزىن بىلدىرگەن يگور يۆانوۆيچ اتاۋلى كۇنگە ارنايى ماركا شىعارۋعا مۇددەلىلىك تانىتقان «قازپوشتا» اق باسقارما توراعاسى باعدات مۋسينگە شەكسىز العىسىن ايتىپ, ەستەلىك سىي رەتىندە قازاقستان رەسپۋبليكاسى كونستيتۋتسياسىنىڭ اشەكەيلەنگەن سۋرەتتى باسىلىمىن تارتۋ ەتتى. ءوز كەزەگىندە ءسوز العان «قاز­پوشتا» اق توراعاسى مار­كانىڭ «ەستەلىك جانە مەرەي­توي­لىق داتالار» سەرياسىندا شىعا­رىل­عاندىعىن اتاپ ءوتتى. ءتورت بوياۋ­لى وفسەتتى باسپا پەرفوراتسيا­سى جوتالى بولىپ كەلەدى.  ال شىعارىلىم ءتۇرى ماركالى پاراق. ولشەمى – 130ح108 ميلليمەترلىك پوشتالىق ماركانىڭ نومينالى – «ا» ليتەرلى, قۇنى – 112 تەڭگە. بۇل زاڭدى تۇلعالارعا ارنال­عان قازاقستان رەسپۋبليكاسى اۋما­عىندا جەر ءۇستى كولىگىمەن 20 گرامعا دەيىنگى سالماقتا قاراپايىم حاتتى جىبەرۋ تاريفىنە سايكەس كەلەدى. تارالىمى – 5000 دانا,  دەدى باعدات باتىربەك ۇلى. ايتا كەتەيىك, مەرەكەلىك مار­كانىڭ سۋرەتىن قۋات يبرايشين سالعان بولسا, ونى باسىپ شىعارعان ورنى قازاقستان رەسپۋبليكاسى ۇلتتىق بانكىنىڭ «بانكنوت فابريكاسى» رەسپۋبليكالىق كاسىپورنى بولىپ تابىلادى. نۇرلىبەك دوسىباي, جۋرناليست.