ءماجىلىس توراعاسى قابيبوللا جاقىپوۆ رەسەي فەدەراتسياسىنىڭ قارجىلىق مونيتورينگ جونىندەگى فەدەرالدى قىزمەتىنىڭ باسشىسى يۋ. ءچيحانچيندى قابىلدادى, دەپ حابارلادى ءماجىلىستىڭ ءباسپاسوز قىزمەتى.
ق.جاقىپوۆ رەسەي قازاقستاننىڭ ستراتەگيالىق ارىپتەسى ەكەنىن ءسوز ەتە كەلىپ, ەكى ەل باسشىلارى كەلىسىمدەرىنىڭ ارقاسىندا ىنتىماقتاستىقتىڭ جىل سايىن قارقىن الىپ كەلە جاتقانىن اتاپ ءوتتى.
ءوز كەزەگىندە يۋ.چيحانچين ەكى ەل ارىپتەستىگىنىڭ بولاشاعى زور ەكەنىن, قازاقستان پرەزيدەنتى ۇسىنعان 5 ينستيتۋتتىق رەفورمانىڭ ءبىزدىڭ ەلىمىزدىڭ دامىعان 30 ەلدىڭ قاتارىنا كىرۋ جولىنداعى ناقتى قادام-
داردىڭ ءبىرى ەكەنىن اتاپ ءوتتى.
ق.جاقىپوۆ پەن يۋ.چيحانچين قوس مەملەكەتتىڭ ەكونوميكالىق قاۋىپسىزدىگىن قامتاماسىز ەتۋ ماسەلەلەرىنە ايرىقشا كوڭىل ءبولىپ, وسى سالاداعى نورماتيۆتىك-قۇقىقتىق بازانى ودان ءارى جەتىلدىرۋدىڭ ماڭىزدىلىعىنا توقتالدى.
ءماجىلىس توراعاسىنىڭ اتاپ وتكەنىندەي, قازاقستاندا 2009 جىلدان «قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قىرجىلاندىرۋعا قارسى ءىس-قيمىل تۋرالى» زاڭ قولدانىسقا ەنگىزىلگەن.
قازىرگى ۋاقىتتا ماجىلىستە وسى زاڭعا تۇزەتۋلەر ەنگىزۋدى كوزدەيتىن, سونداي-اق, مەملەكەتتىك اۋديت پەن قارجىلىق باقىلاۋعا قاتىستى زاڭ جوبالارىمەن جۇمىس جالعاسۋدا. سوندىقتان, تاراپتار ءوزارا تاجىريبە الماسىپ, وسى باعىتتا ساپالى زاڭ جوبالارىن دايىنداۋعا ەرەكشە نازار اۋداراتىن بولادى.
كەزدەسۋگە, سونداي-اق, ءماجىلىس توراعاسىنىڭ ورىنباسارى داريعا نازارباەۆا, قارجى جانە بيۋدجەت كوميتەتىنىڭ ءتورايىمى گۇلجان قاراعۇسوۆا قاتىستى.
