قىزىلوردا. 19 مامىر. سىر توپىراعىندا تۋىپ, ونەرىمەن قازاقستاندى عانا ەمەس الىس-جاقىن شەتەلدى مويىنداتقان حاس تالانت, تانىمال ءانشى, دارىندى كومپوزيتور باتىرحان شوكەنوۆتى جەرلەستەرى ەسكە الدى. بۇل تۋرالى egemen.kz سايتى حابارلايدى.
ورتالىق الاڭدا وتكەن شاراعا ونىڭ تىڭدارماندارى مەن ومىردەگى جانە ونەردەگى دوستارى, باۋىرلارى, اناسى كەلدى. شاراعا وبلىس اكىمى قىرىمبەك كوشەرباەۆ قاتىسىپ, تالانتتى ءانشىنى ەسكە الدى.
«سىر بويىنىڭ تالانتتى ۇلى, ونەر تارلانى باتىرحان شوكەنوۆتىڭ قازاسى بارشا قازاق ەلىنىڭ قابىرعاسىن قايىستىردى. باتىرحاندى ۇلكەن دە, كىشى دە قادىر تۇتتى, جاس تا, جاسامىس تا اندەرىن جاتقا ايتتى. ول ەلدەن جىراقتا جۇرسە دە ارقاشان ءوز وتانىنىڭ ناعىز پاتريوتى بولدى. باتىر xالىقارالىق يۋنيسەف بالالاردىڭ قۇقىعىن قورعاۋ قورىندا دا ءوزىنىڭ ازاماتتىعىن كورسەتە الدى. سوڭىندا وشپەس ءىز قالدىرعان باتىرxان شوكەنوۆتى xالقى ۇمىت قالدىرعان جوق. ەلىمىزدىڭ بارلىق ايماقتارىندا ەسكە الۋ شارالارى ۇيىمداستىرىلىپ, اندەرى شىرقالۋدا. شوكەنوۆتىڭ شىعارمالارىنا سۋسىنداپ وسكەن مىڭداعان ادام الەۋمەتتىك جەلىلەردە جىلى لەبىزدەرىن ءبىلدىرىپ جاتىر. باتىر باۋىرىمىزدىڭ ەسىمى قازاق ونەرىنىڭ تاريxىندا التىن ارىپتەرمەن ماڭگى جازىلىپ قالا بەرمەك», – دەدى وبلىس اكىمى.
ەسكە الۋ راسىمىندە مارقۇمنىڭ بەلگىلى اندەرى شىرقالدى. باتىرحان شوكەنوۆتىڭ دوستارى ول تۋرالى جىلى ەستەلىكتەر ايتتى. تالانتتى ءانشىنىڭ ءومىرى مەن ونەرىنە ارنالعان «ساعىم دۇنيە» دەرەكتى فيلم كورسەتىلىپ, ءومىرىنىڭ سوڭعى ۋاقىتىندا قاتىسقان رەسەي تەلەارنالارىنداعى «ودين ۆ ودين» جوباسىنان ۇزىندىلەر كورسەتىلدى. قازاقتىڭ سۇيىكتى دە تۋما تالانتتى ءانشى ۇلىن ەسكە الۋعا جينالعاندار ونىڭ اندەرىن شىرقاپ, اۋەگە شار ۇشىردى.
ەرجان بايتىلەس.
دەرەك, سۋرەت: egemen.kz.
