الدىمىزدا بولاشاعىمىزدى تاڭداۋ مىندەتى تۇر

كەشە قازاقستان رەسپۋبليكاسىنىڭ پرەزي­دەنتتىگىنە كانديدات نۇرسۇلتان نازارباەۆتىڭ رەسپۋبليكالىق قوعامدىق شتابىنىڭ (رقش) مۇشەلەرى وسكەمەن قالاسىندا ءۇلبى مەتاللۋرگيا زاۋىتىنىڭ جۇمىسشىلارىمەن, جاستار بەلسەندىلەرىمەن جانە شىعىس قازاقستان وبلىسىندا حالىقتى الەۋمەتتىك قورعاۋ ماسەلەلەرىن ۇيلەستىرۋمەن اينالىساتىن ۇەۇ وكىلدەرىمەن كەزدەستى. دەلەگاتسيا قۇرامىندا رەسپۋبليكالىق قوعامدىق شتابتىڭ جەتەكشىسى مۇحتار قۇل-مۇحاممەد, «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك, قازاقستان پاتريوتتار پارتياسىنىڭ توراعاسى عاني قاسىموۆ, «اق جول» دەموكراتيالىق پارتياسىنىڭ توراعاسى ازات پەرۋاشەۆ, «بىرلىك» پارتياسىنىڭ توراعاسى سەرىك سۇلتانعالي, قازاقستان مۇگەدەكتەر كونفەدەراتسياسىنىڭ پرەزيدەنتى جانات وماربەكوۆا, «كتك-نىڭ» جەكە حابار تاراتۋشى ديرەكتورى ارتۋر پلاتونوۆ, قازاقستان رەسپۋبليكاسى تاۋ-كەن ونەركاسىبى ەڭبەكشىلەرى كاسىپوداعىنىڭ توراعاسى اسىلبەك نۇرالين, پارلامەنت ءماجىلىسىنىڭ دەپۋتاتتارى باقىتجان ەرتاەۆ, تولەگەن يبراەۆ, نۇرتاي سابيليانوۆ, وليمپيادا چەمپيونى ولگا رىپاكوۆا, ت.ب. بولدى. وسكەمەن قالاسىندا ءۇلبى مەتاللۋرگيا زاۋىتىنىڭ تانتال ءوندىرىسى تسەحىنىڭ جۇمىسشىلارىمەن كەزدەسۋ ءوتتى. «نۇرسۇلتان ءابىش ۇلى نازارباەۆتىڭ جاسامپازدىق قىزمەتىنىڭ جەمىستەرى بارشاڭىزدىڭ كوز الدارىڭىزدا. ولار وسىندا – قازاقستاننىڭ شىعىسىندا دا بار. شىعىس وتانىمىزداعى بارلىق يننوۆاتسيالىق ءونىمنىڭ بەستەن ءبىر بولىگىن بەرەدى. بۇل تاعدىر سىيى ەمەس, ەلباسىنىڭ اسا زور ەڭبەگىنىڭ ناتيجەسى. ءبىز شىعىسقازاقستاندىقتار مەملەكەت باسشىسىن قولداۋدىڭ ەڭ جوعارى ناتيجەسىن كورسەتەتىنىنە سەنىمدىمىز», دەپ اتاپ كورسەتتى كەزدەسۋدە م.قۇل-مۇحاممەد. ءوز كەزەگىندە زاۋىت جۇمىسشىلارى ن.ءا.نازارباەۆتى قولدايتىندىقتارىن ءبىلدىردى. «زاۋىت جاستارى مەملەكەت باسشىسىنىڭ ستراتەگيالىق جوسپارلارىن قولدايدى جانە ءبىز وسى وراسان مىندەتتەردى جۇزەگە اسىرۋ ءۇشىن بارلىق كۇش-جىگەرىمىزدى جۇمسايمىز. 26 ساۋىردە الدىمىزدا اسا ماڭىزدى مىندەت – ءوزىمىزدىڭ بولاشاعىمىزدى تاڭداۋ مىندەتى تۇر! ەگەر جاستارىمىز ەلباسىمىزعا قاراپ بوي مەن وي تۇزەۋگە ۇمتىلاتىن بولسا, وندا قازاقستاننىڭ زور تابىستارعا جەتەتىنى كۇمانسىز. نۇرسۇلتان نازارباەۆتىڭ قازاقستاندى قۋاتتى, بەرىك جانە وركەندەگەن ەل جاسايتىنىنا سەنىمدىمىز!» – دەدى ءوزىنىڭ سوزىندە «ءۇمز» اق-تىڭ ءوندىرىس ينجەنەرى رينات قۇداباەۆ. «سىزدەردىڭ زاۋىتتارىڭىز – 65 جىلدىق وندىرىستىك ءداستۇرى بار كەرەمەت كاسىپورىن. بۇگىندە مۇندا شامامەن 4 000 ادام جۇمىس ىستەيدى. ەستەرىڭىزگە تۇسىرىڭىزدەرشى, وسىدان بار-جوعى 20 جىل  عانا بۇرىن ەلىمىزدە شاحتالار مەن كاسىپورىندار جابىلىپ, ەڭبەكاقى مەن زەينەتاقى تولەنبەدى, جۇمىس تا جوق ەدى. بىراق ءبىز وسى اسا اۋىر كەزەڭنەن ءوتىپ, قۋاتتى ەلگە اينالدىق, وتانىمىزدا وراسان زور وزگەرىستەر ءجۇردى. وسى جاۋاپتى, تاريحي ساتتە تاعى دا نۇرسۇلتان نازارباەۆقا ءوزىمىزدىڭ قولداۋىمىزدى كورسەتەتىن ۋاقىت كەلدى. ءبىز تەك ەلباسىمەن عانا جاڭا ۇلى جەڭىستەرگە جەتەمىز!», – دەپ اتاپ كورسەتتى ب.بايبەك. رقش مۇشەلەرى ساپارلارى بارىسىندا «ءۇلبى» مادەنيەت ۇيىندە بولدى. سونداي-اق, وقۋشىلاردىڭ شىعارماشىلىق ءۇيى مەن مەتاللۋرگتەردىڭ مادەنيەت ۇيىنە اتباسىن تىرەدى. شارالارعا مىڭداعان وسكەمەندىك قاتىستى. وزدەرىنىڭ سوزدەرىندە ولار تاۋەلسىزدىكتىڭ 23 جىلىندا ەلباسى قازاقستاننىڭ بەرىك ىرگەتاسىن قالىپتاستىرعانىن اتاپ كورسەتتى. «ەلىمىزدە 130 ۇلت پەن ۇلىس ءومىر سۇرسە, تەك شىعىس قازاقستان وبلىسىندا ولاردىڭ سانى – 105! ەگەمەن مەملەكەت قالىپتاستىرۋدىڭ العاشقى ساتىنەن ەلباسى ۇلتارالىق بىرلىكتى, كەلىسىم مەن تۇراقتىلىقتى, ەكونوميكالىق ءوسىپ-وركەندەۋگە نەگىزدەلگەن قۋاتتى دا دەموكراتيالى, الەۋمەتتىك باعدارلانعان مەملەكەت قۇرۋدى ەڭ باستى باسىمدىق رەتىندە قاراستىرىپ كەلەدى. ەلباسىنىڭ سارابدال ساياساتىنىڭ ارقاسىندا, ۇلتىمىز بەن دىنىمىزگە قاراماستان, ءبىزدىڭ ارقايسىمىزدىڭ داۋىسىمىز جارقىن شىعادى!», – دەدى قازاقستان حالقى اسسامبلەياسىنىڭ مۇشەسى لەو شيك. دۋمان اناش, «ەگەمەن قازاقستان». وسكەمەن.