كوميسسيا جۇمىسىن باستادى

سايلاۋ ناۋقانىنان قوعامدىق بىرلەستىكتەردىڭ دە تىسقارى قال­ماي­تىندىعى «قازاقستان رەسپۋب­ليكا­سىنداعى پرەزيدەنت سايلاۋىن باقىلاۋ جونىندەگى رەسپۋبليكالىق كوميسسيا» رەسپۋبليكالىق قوعامدىق بىرلەستىگىنىڭ استانا قالالىق فيليالىنىڭ بۇقارالىق اقپارات قۇرالدارى وكىلدەرىمەن بولعان كەشەگى بريفينگىندە ايتىلدى. بەلگىلى بولعانداي, ەلوردا قالالىق فيليالىنىڭ قۇرامىنا قوعامدىق بىرلەستىكتەر كوشباسشىلارى, كاسىپكەرلەر, مادەنيەت قايراتكەرلەرى جانە وزگە دە بەلسەندى توپ وكىلدەرى كىرىپ وتىر ەكەن. كوميسسيا توراعاسىنىڭ ورىنباسارى, كوميسسيانىڭ استانا قالالىق فيليالىنىڭ ءتورايىمى تامارا لاۆرينەنكو كەزەكتەن تىس پرەزيدەنتتىك سايلاۋدى وتكىزۋ بارىسىندا ەرىكتىلەرمەن جۇمىس جانداناتىندىعىنا توقتالىپ ءوتتى. ونىڭ ايتۋىنشا, ەرىكتىلەر استانا قالاسىنداعى 250-گە تارتا سايلاۋ ۋچاسكەسىندە جۇمىس ىستەيتىن كورىنەدى. قازىر ولارمەن ءتۇسىندىرۋ جۇمىستارى جۇرگىزىلىپ, ادىستەمەلىك ادەبيەتتەرمەن تانىستىرۋ ءوتىپ جاتىر ەكەن. بۇل رەتتە, كوميسسيا ءوز جۇمىسىن 2005 جىلدان باستاپ جۇرگىزگەندىگىن, پرەزيدەنتتىك جانە پارلامەنتتىك سايلاۋلار بارىسىنا بايقاۋ جاساعاندىعىن جانە دە ولاردىڭ نەگىزىندە ەرىكتىلەر ءۇشىن ادىستەمەلىك قۇرالدار ازىرلەنگەنىن ايتا كەتۋ كەرەك. كوميسسيا ءتورايىمىنىڭ سوزىنە قاراعاندا, بايقاۋ بارىسىندا ورىن العان قاتەلىكتەردى قالاي تۇزەۋ قاجەتتىگى باستى نازارعا الىنادى. وندا دا مۇنداي قاتەلىكتەر مەن كەمشىلىكتەر سايلاۋ وتكىزىلەتىن كۇنگە دەيىن ءوز شەشىمىن تابۋى ءتيىس. شتاب قىزمەتى تۋرالى دا ءسوز ەتىلدى. ازىرگە ول ءوز جۇمىسىن تاڭعى ساعات 9:00-دەن باستاپ كەشكى 18:00-گە دەيىن جالعاستىرماق. «قحا قورى» قق ديرەكتورى, مەديتسينا عىلىمدارىنىڭ كانديداتى الماگۇل سالىمباەۆانىڭ سوزىنە قاراعاندا, 37-31-90 تەلەفونىنا نەمەسە www.baikau.kz سايتىنا حابارلاسىپ, ءوز ساۋالدارىن قويعاندارعا ناقتى جاۋاپتار بەرىلەدى. سونىمەن قاتار, قالاي ەرىكتىلەر قاتارىنا كىرۋگە بولاتىنى, قانداي جاڭالىقتار ورىن الىپ جاتقانىمەن دە تانىسۋعا مۇمكىندىك تۋعىزىلادى. جانە دە بۇل بايلانىس قۇرالدارى تاۋلىك بويى جۇمىس ىستەيدى دەپ كۇتىلۋدە. سايلاۋ ناۋقانى بارىسىنداعى بايقاۋشىلاردىڭ ماڭىزدى ءرولى تۋرالى  كوميسسيا توراعاسىنىڭ ورىنباسارى, كوميسسيانىڭ استانا قالاسى فيليالىنىڭ ءتورايىمى تامارا لاۆرينەنكو بىلايشا سيپاتتاپ بەردى: «سايلاۋ پروتسەسىندەگى بايقاۋشىنىڭ ءرولى – ەڭ ماڭىزدى ماسەلەنىڭ ءبىرى. بايقاۋشى بۇزۋشىلىقتاردى بەلگىلەۋ تۇرعىسىنان عانا ەمەس, ولاردىڭ الدىن الۋ بويىنشا دا قىرۋار جۇمىس ىستەيدى». سونداي-اق, بريفينگتە ءسوز العان قوعام قايراتكەرى ارىستان جۇماعالي ەلىمىز تاۋەلسىزدىك العاننان بەرى بىرقاتار وزگەرىستەر بولعاندىعىنا ەرەكشە نازار اۋدارتتى. ەل ازاماتتارىنىڭ ەرىك-جىگەرىنىڭ ارقاسىندا قازاقستان وركەندەۋ جولىنا تۇسسە, ەندىگى كەزەكتە ەلىمىزدىڭ دەموكراتيالىق دامۋىنا وزىندىك ۇلەستەرىن قوسۋى ءتيىس. سايلاۋدىڭ ناتيجەلى ءوتۋى بارلىق قازاقستاندىقتار ءۇشىن ابىرويلى مىندەت ءارى ءاربىر قازاقستاندىقتىڭ ورتاق ىسكە قوسقان يگى ۇلەسى بولىپ تابىلماق. اسقار تۇراپباي ۇلى, «ەگەمەن قازاقستان».