9-10 ساۋىردە «جاس وتان» جاستار قاناتىنىڭ كەزەكتەن تىس III سەزى وتەدى. بۇل تۋرالى كەشە «جاس وتان» جاستار قاناتىنىڭ 2020 جىلعا دەيىنگى «جاستار – وتانعا!» باعدارلاماسىن ازىرلەۋ بويىنشا ۇيىمداستىرىلعان قورىتىندى جينالىس بارىسىندا بەلگىلى بولدى.
بۇل باعدارلاما «جاس وتان» جاستار قاناتىنىڭ كەزەكتەن تىس III سەزىندە قابىلداناتىن بولادى. ول ۇيىمنىڭ ءارى قارايعى ءىس-قيمىلى ءۇشىن يدەولوگيالىق باعدار بولماق, سونداي-اق, «قازاقستان-2050» ستراتەگياسىن ىسكە اسىرۋدا تابىسقا قول جەتكىزۋگە باعىتتالعان.
وتىرىس بارىسىندا «جاس وتان» جاستار قاناتىنىڭ اتقارۋشى حاتشىسى نۇرلان سىدىقوۆ ءسوز الىپ, اتالعان باعدارلامادا 4 نەگىزگى باعىتقا ايرىقشا نازار اۋدارىلعانىنا, بۇل قۇجاتتىڭ نەگىزىندە «نۇرلى جول» باعدارلاماسى مەن «نۇر وتان» پارتياسىنىڭ ساياسي دوكتريناسىندا كورسەتىلگەن قۇندىلىقتار جاتقانىنا توقتالدى. «جاڭا باعدارلامادا ءار جاس قازاقستاندىق تابىسىنىڭ نەگىزى رەتىندە 4 نەگىزگى باعىت كورىنىس تاپقان. ءبىز پاتريوتيزم, جەكە قابىلەتتى دامىتۋ, ءبىلىم مەن ەڭبەككە قۇشتارلىق, كاسىبي ورلەۋ مەن وتباسىلىق قۇندىلىقتار سياقتى باسىمدىقتارعا ەرەكشە نازار اۋداردىق», دەدى ن. سىدىقوۆ. ول, سونداي-اق, سەزد جۇمىسىنا قازاقستاننىڭ ايماقتارىنان 2 مىڭعا تارتا ازامات قاتىساتىنىن, ولار «جاس وتان» جاستار قاناتىنىڭ بەلسەندىلەرى, جاستار ۇيىمدارىنىڭ مۇشەلەرى, شىعارماشىل جاستار, جاس عالىمدار, سپورتشىلار, ءماسليحات دەپۋتاتتارى, جۇمىسشىلار, اۋىل جاستارى ەكەنىن اتاپ ءوتتى.
بۇگىنگى كۇنگە دەيىن اتالعان باعدارلاما جوباسى ەلىمىز بويىنشا جاستاردىڭ اراسىندا جان-جاقتى تالقىلانعان. مۇنداي تالقىلاۋلار «ەركىن پىكىر» پىكىرتالاس كلۋبى وتىرىسىنىڭ شەڭبەرىندە وڭىرلىك كونفەرەنتسيالاردا, «جاس وتان» جاستار قاناتىنىڭ 1700 باستاۋىش بولىمىندە وتكەن. بۇل باعدارلامانى ازىرلەۋ بارىسىندا ساراپشىلار مەن رەسپۋبليكانىڭ بارلىق وڭىرىندەگى جاستاردىڭ ۇسىنىستارى ەسكەرىلگەن ەكەن.
ءلايلا ەدىلقىزى,
«ەگەمەن قازاقستان».
سۋرەتتى تۇسىرگەن,
ەرلان وماروۆ.
