اقسۋاتتاعى الامان

ىرعىزباي دوسحانا ۇلى اتىنداعى تۋرنيردە موڭعول بالۋانى جەڭىسكە جەتتى بارقىتبەل باۋىرىندا قازاق كۇرەسىنەن ىرعىزباي دوسحانا ۇلى اتىنداعى حالىقارالىق گران-پري ءتۋرنيرى جوعارى دارەجەدە ءوتتى. بيىل ءۇشىنشى مارتە ۇيىمداستىرىلعان بالۋاندار باسەكەسىنە 38 سپورتشى قاتىستى. ولاردىڭ اراسىندا قازاقستان, ارمەنيا, ازەربايجان, رەسەي, بەلارۋس, قىتاي, تاجىكستان, ۋكراينا, ەستونيا, ليتۆا, كورەيا, وزبەكستان, قىرعىزستان, گرۋزيا سىندى 16 ەلدەن كەلگەن سپورتشىلار بار. تارباعاتاي اۋدانىنىڭ ورتا­لىعى – اقسۋات اۋىلىندا وتكەن ءدۇبىرلى باسەكەگە وبلىس اكىمىنىڭ ورىنباسارى جاقسىلىق ومار, مادەنيەت جانە سپورت مينيسترلىگى سپورت كوميتەتى توراعاسىنىڭ ورىنباسارى ءابىل ءدوڭباي, فيلا حالىقارالىق كۇرەس تۇرلەرى كوميتەتىنىڭ توراعاسى گينتاۋتاس ۆيلەيتا, دۇنيەجۇزىلىك قازاق كۇرەسى فەدەراتسياسىنىڭ پرەزيدەنتى سەرىك توكەەۆ جانە وبلىستىق قۇقىق قور­عاۋ ورگاندارىنىڭ جەتەكشىلەرى قاتىستى. اتالعان تۋرنيرگە پرەمەر-ءمينيستردىڭ ورىنباسارى بەر­دىبەك ساپارباەۆ ارنايى قۇتتىق­تاۋ جەدەلحاتىن جولداعان ەكەن. ونى وبلىس اكىمىنىڭ ورىنباسارى وقىپ بەردى. تۋرنيرگە كىلەڭ سايدىڭ تاسىنداي ازۋلى بالۋاندار, الەمدىك, قۇرلىقتىق جارىستاردىڭ ءجۇل­دەگەرلەرى مەن جەڭىمپازدارى قاتىستى. 80 كيلوعا دەيىنگى سالماق دارەجەسىندە اقتىق سىنعا قۋانىش مۇراتوۆ شىعىپ, گرۋزيا بالۋانى گ.پەرۋلاۆانى جامباس ادىسىمەن تازا ۇتتى. تارباعاتاي اۋدانىنىڭ تۋماسى ق.مۇراتوۆ وگىز بالۋان اتاعىن وتكەن جىلى دا جەڭىپ العان بولاتىن. كورەرمەندەردىڭ ايبەك نۇعىماروۆ پەن تالعات امىرەنوۆتىڭ كۇرەسىنە كوزايىم بولعانىن ايتا كەتكەن ابزال. كىلەمدە ءبىر-ءبىرىن الا الماعان بالۋاندارعا تورەشىلەر بەلدەسۋ بەلگىلەپ, ناتيجەسىندە ايبەك اقتىق سىنعا شىقتى. تۇيە بالۋان اتاعى ءۇشىن بولعان تارتىس­تا ايبەك نۇعىماروۆ پەن موڭعول بالۋانى التانگەرەل داۆاانيان اراسىنداعى بەلدەسۋ ءتۋرنيردىڭ باستى باسەكەسى بولدى. از عانا باسىمدىقپەن بۇل سىندا موڭعوليا سپورتشىسى باس جۇلدەنى قانجىعاعا بايلاپ, 10 مىڭ اقش دوللارىنا يە بولدى. ءداستۇرلى ءتۋرنيردى ۇيىمداس­تىرۋشى, قازاق كۇرەسىنىڭ جاناشىرى بادەلحان كامالحان ۇلىنىڭ ايتۋىنشا, ىرعىزباي دوسحانا ۇلى اتىنداعى تۋرنير بۇگىندە ءوز ماق­ساتىنا جەتىپ, ەل مەن جەردى ناسي­حاتتاۋدىڭ ءتيىمدى جولىنا اينالدى. شىنىندا, بالۋاندار باسەكەسىنىڭ ەرەكشەلىگى – وبلىس ورتالىعىندا ەمەس, شەتكەرى شەكارالىق اۋداندا وتكىزىلۋى بولسا كەرەك.   دۋمان اناش, «ەگەمەن قازاقستان». شىعىس قازاقستان وبلىسى, تارباعاتاي اۋدانى. سۋرەتتە: تۇعىرداعى جەڭىمپازدار. سۋرەتتى تۇسىرگەن عىلىمبەك ءسابيتوۆ.