تەڭدەسى جوق قۇرىلعى

قازاقستاندا تۇڭعىش رەت قۇنى 1 ميلليارد 366 ميلليون تەڭگەنى قۇرايتىن قاتەرلى ىسىكتى جوعارى دەڭگەيدە ەمدەيتىن ساۋلەلەندىرۋ قۇرىلعىسى ىسكە قوسىلدى الماتىدا قازاق ونكولوگيا جانە راديولوگيا عىلىمي-زەرتتەۋ ينستيتۋتىندا قاتەرلى ىسىكتى جوعارى دەڭگەيدە ەمدەيتىن «TrueBeam» ساۋلەلەندىرۋ قۇرىلعىسىنىڭ تۇساۋكەسەرى ءوتتى. اشىلۋ راسىمىنە دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى الكساندر تسوي, الماتى قالالىق دەنساۋلىق ساقتاۋ باسقارماسىنىڭ باسشىسى جانات قاسىمجانوۆا, سونداي-اق رەسپۋبليكالىق دەڭگەيدەگى ەمدەۋ ورىندارىنىڭ باسشىلارى قاتىستى. جيىندى اشقان اتالمىش ينستيتۋتتىڭ ديرەكتورى, مەديتسينا عىلىمدارىنىڭ دوكتورى قۋانىش نۇرعازيەۆ قۇنى 1 ميلليارد 366 ميلليون تەڭگەنى قۇرايتىن بۇل جوعارى تەحنولوگيالىق اپپاراتتى ورناتۋ 2012-2016 جىلدارعا ارنالعان «ونكولوگيالىق كومەكتى دامىتۋ» مەملەكەتتىك باعدارلاماسى اياسىندا جۇزەگە اسىرىلعاندىعىن جەتكىزدى. – بۇل باعدارلاما كەزىندە مەملەكەت باسشىسىنىڭ باستاماسىمەن قولعا الىنعان بولاتىن. باعدارلامانىڭ جالپى بيۋدجەتى – 211 ملرد. تەڭگە. ول 5 جىلعا جوسپارلانعان. باعدارلامانى جۇزەگە اسىرۋ ونكولوگيالىق اۋرۋلارعا دۋشار بولعان ناۋقاستارعا مەديتسينالىق كومەك كورسەتۋ ساپاسىن جاڭا دەڭگەيگە كوتەرۋگە مۇمكىندىك بەرەدى. ءبىز ينس­تيتۋت جانىنان جاڭا بىرەگەي عيمارات سالدىق. وعان 1,5 جىل ۋاقىت كەتتى. ءسويتىپ, بۇل كەشەننىڭ ىشىنە جوعارى ەنەرگەتيكالىق جۇيەلىك ۇدەتكىش ورناتىلدى. ونىمەن جۇمىس ىستەيتىن كادرلار دايارلادىق. مىنا اپپارات ەندى ساۋلەلى تەراپيا­نى وتە جوعارى دەڭگەيدە جۇرگىزۋگە مۇمكىندىك بەرەدى», – دەدى ەلىمىزدىڭ باس ونكولوگى. «TrueBeam» اپپاراتىن الەمدەگى ونكواۋ­رۋلاردى ساۋلە, راديوحيرۋرگيا, پروتوندىق جانە براحيتەراپيا ادىستەرىمەن ەمدەۋ قۇرىلعىلارىمەن تانىمال Varian Medical Systems كومپانياسى شىعارعان. بۇگىندە بۇل كومپانيانىڭ 7 000 ءتۇرلى قۇرىلعىسىندا الەم بويىنشا 350 000 ناۋقاس كۇن سايىن ەمدەلەدى. الدىمەن شاراعا قاتىسۋشىلار جاڭادان ورناتىلعان «TrueBeam» قۇرىلعىسىنىڭ جۇمىسىمەن تانىستى. «TrueBeam» ساۋلەلەندىرۋ قۇرىلعىسى ناۋقاستىڭ وزگە اعزالارىن زاقىمداماي, تەك وبىر ورنالاسقان ايماقتى ساۋلەلەندىرەدى. حالىقارالىق ەسەپ بويىنشا, قازىر قاتەرلى ىسىكتىڭ ءبىرىنشى ساتىسىندا تۇرعان ناۋقاستاردىڭ 70 پايىزى ساۋلە تەراپياسىنا مۇقتاج. ال «TrueBeam» قۇرىلعىسىندا ناۋقاستاردى جوعارى تەحنولوگيالىق ساۋلەمەن ەمدەۋدىڭ زاماناۋي, تەكسەرىلگەن ادىستەرىن بارىنشا كەڭىنەن قولدانۋعا مۇمكىندىك بار. بۇل اپپاراتتىڭ قوسىمشا قالقاندارى ناۋقاستىڭ وبىرىنا سايكەس ءتۇرلى فورماعا ەنىپ, ىسىك وشاعىنا ساۋلەنىڭ ەڭ كوپ مولشەرىن جىبەرەدى. ناۋقاستىڭ قاتەرلى ىسىگىنىڭ كولەمى كۇن سايىن قاداعالانىپ, سوعان سايكەس ساۋلەنىڭ باعىتى دا وزگەرىپ وتىرادى. وسىلايشا از ۋاقىتتىڭ ىشىندە ناتيجەلى ەمگە قول جەتكىزۋگە بولادى. ەڭ قيىن نۇكتەلەردە ورنالاسقان ىسىكتەردى ساۋلەلەندىرۋگە وسى اپپاراتتىڭ كومپيۋتەرلىك توموگرافى قولدانىلادى. ءتىپتى, ناۋقاستىڭ دەمى ارقىلى ىسىكتى ەمدەۋ ءادىسى دە ءتيىمدى تۇردە پايداعا اسىرىلادى. وزگە ساۋ اعزالار مۇلدەم زاقىمدانبايدى. قوسىمشا اۋىرسىنۋ سياقتى ەمنىڭ زياندى اسەرلەرى بولمايدى. قازىر ەلىمىزدە ونكولوگيالىق اۋرۋلار ءولىم-ءجىتىم كورسەتكىشى بويىنشا ەكىنشى ورىندا تۇر. جىل سايىن 17 000 ادام وسى دەرتتىڭ سەبەبىنەن كوز جۇمادى. ءوز كەزەگىندە دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى الەكسەي تسوي بولاشاقتا وسىنداي قۇرىلعى استانا, اقتوبە جانە سەمەي قالالارىندا دا ىسكە قوسىلاتىندىعىن جەتكىزدى. –پرەزيدەنت نۇرسۇلتان نازارباەۆتىڭ دەنساۋلىق سالاسىنا ەرەكشە كوڭىل ءبولۋى وتاندىق ونكولوگيانى جوعارى دەڭگەيگە كوتەردى. مەملەكەت باسشىسىنىڭ تاپسىرماسىمەن قابىلدانعان باعدارلاما اياسىندا ءۇش جىلدان بەرى تالاي اسۋلاردى باعىندىردىق. قازىر بۇكىل رەسپۋبليكا بويىنشا ونكولوگيالىق ديسپانسەرلەر زامانۋي كومپيۋتەرلەرمەن, توموگرافيالارمەن, رەنتگەندىك, ەندوسكوپيالىق جانە باسقا دا تەحنولوگيالارمەن جابدىقتالۋدا. ونكولوگيالىق قىزمەتتەردىڭ 100-دەن اسا قىزمەتكەرلەرى شەتەلدەردە بىلىكتىلىگىن ارتتىرىپ كەل­دى. ەلىمىزدە قاتەرلى ىسىك اۋرۋلارىنىڭ الدىن الۋ ماقساتىندا 6 سكري­نينگ­تىك باعدارلاما جۇزەگە اسىرىلا­دى. ولار جىلىنا 2 ملن. ادام­دى قامتيدى. قازاقستان قازىر ناۋ­قاستاردى حيميوتەراپيامەن تەگىن قامتاماسىز ەتەدى. سونىمەن قاتار, استانا, اقتوبە, قاراعاندى, سەمەي جانە الماتىدا ونكولوگيالىق ديسپانسەرلەر بازاسىندا 5 جوعارى تەحنولوگيالىق ورتالىقتار اشىلدى, – دەدى ۆيتسە-مينيستر. ستاتيستيكالىق دەرەككە سۇيەن­سەك, 2015 جىلدىڭ 1 قاڭتارىندا 150 436 ادام تىركەۋگە الىنعان. ال 2013 جىلى 146 404 ادام تىركەۋدە تۇرعان. كورىپ وتىرعانىمىزداي, جىل سايىن قاتەرلى ىسىكتى ەرتە ساتىسىندا انىقتاۋ كورسەتكىشى ارتىپ كەلەدى. تۇرعىنداردى ءدارى-دارمەكپەن قامتۋ 82 پايىزعا جەتتى. ونكولوگيا سالاسىنا 2015 جىلى مەملەكەت بيۋدجەتىنەن 32 ملرد. تەڭگە ءبولىندى. ەندى «TrueBeam» ساۋلەلەندىرۋ قۇرىلعىسىنىڭ ارقاسىندا قازاقستاننىڭ ونكولوگيا سالاسى جاڭا دەڭگەيگە كوتەرىلمەك. ياعني, جاڭا تەحنولوگيا ارقىلى سوڭعى ەمدەۋ ستاندارتتارىنا كوشۋ, مامانداردىڭ بىلىكتىلىگىن ارتتىرۋمەن قاتار ناۋقاستاردىڭ جوعارى تەحنولوگيالىق ەمدەۋ ادىسىنە قول جەتكىزۋىنە, قىسقا ۋاقىتتا ناتيجەلى ەم الىپ, جۇمىسقا قابىلەتتىلىگىن ساقتاۋعا مۇمكىندىك بەرەدى. ورتالىق ازيا ەلدەرى ىشىندە تۇڭعىش رەت ساتىپ الىنعان بۇل قۇرىلعى الداعى ءساۋىر ايىنان باستاپ, تولىعىمەن قولدانىسقا بەرىلەدى. وندا كۇنىنە 60 ناۋقاسقا ەم جاسالادى دەپ كۇتىلۋدە. گۇلزەينەپ سادىرقىزى, «ەگەمەن قازاقستان».