ماسكەۋدە فەدەرالدى قىزمەتتىڭ ەكس-باسشىسى قامالدى

استانا. 1 ءساۋىر. ماسكەۋدىڭ پرەسنيا سوتى جازالاردى ورىنداۋ فەدەرالدى قىزمەتىنىڭ بۇرىنعى باسشىسى الەكساندر رەيمەردى «ەلەكتروندى بىلەزىك» ساتىپ الۋ كەزىندەگى الاياقتىعى ءۇشىن قاماۋعا الدى. بۇل تۋرالى تاسس حابارلادى. سوتتىڭ مالىمەتىنشە, قۇقىق قورعاۋ سالاسىنىڭ شەنەۋنىگى اتالعان الاياقتىعى ارقىلى مەملەكەتكە 2,7 ملرد. ءرۋبلدىڭ زالالىن كەلتىرگەن. ايىپتالۋشى دەنساۋلىعى جاعدايى تۋرالى ەگجەي-تەگجەيلى مالىمەتتىڭ تاراپ كەتپەۋى تۋرالى قورعاۋ جاعىنىڭ ءوتىنىشى بويىنشا ءىس جابىق وتىرىس جاعدايىندا قارالدى. رەيمەر ءوزىنىڭ كىناسىن مويىندامايتىنىن مالىمدەدى. سوت قاۋلىسىنان تەرگەۋ مەرزىمى 28 تامىزعا دەيىن ۇزارتىلعانى بەلگىلى بولدى. ال تەرگەۋشى رەيمەرگە جاسىرىنىپ قالۋ نەمەسە ءوزىنىڭ قىزمەتتىك داعدىلارى مەن تامىر-تانىستىقتارىن پايدالانىپ, ايعاقتار جيناۋعا كەدەرگى كەلتىرۋ نيەتىندە دەگەن كۇدىك ءبىلدىردى. سونىمەن ءبىر مەزگىلدە رەيمەردىڭ قورعاۋشىلارى ونىڭ اۋىر ناۋقاس ەكەنىن جانە تەرگەۋ پوزيتسياسىنىڭ نەگىزسىز ەكەنىن كورسەتەتىن قوسىمشا دالەلدەر جيناۋ ءۇشىن وتىرىستى 72 ساعاتقا كەشەۋىلدەتۋدى قادالىپ سۇرادى. رەيمەر 31 مامىرعا دەيىن ق ۇلىپ استىندا بولادى. بۇدان بۇرىن تۇتقىندالعان جاعدايدا ونىڭ «لەفورتوۆو» تەرگەۋ وقشاۋلاعىشىندا وتىراتىنى ايتىلعان ەدى. قورعاۋشىلار وزدەرى قورعاۋىنداعى ايىپتالۋشىنى قاماۋعا الۋ جونىندەگى شەشىمگە كەلىسپەۋشىلىگىن قالالىق سوتتىڭ اپەللياتسياسىنا بىلدىرە الادى. مۇنىڭ الدىندا وسى ءىستىڭ باسقا فيگۋرانتى – كاسىپكەر نيكولاي مارتىنوۆ 30 مامىرعا دەيىن قاماۋعا الىنعان ەدى. مۇرات ايتقوجا.